ନୂଆଦିଲ୍ଲୀ : ଇସ୍ରୋ ଆଉ ଏକ ନୂଆ ଇତିହାସ ସୃଷ୍ଟି କରିବାକୁ ଯାଉଛି । ଆସନ୍ତାକାଲି ଲଞ୍ଚ ହେବ ନିସାର ମିଶନ । ପ୍ରଥମ ଥର ପାଇଁ ନାସା-ଇସ୍ରୋ ସିନ୍ଥେଟିକ୍ ଆପରେଚର ରାଡାର(ନିସାର) ସାଟେଲାଇଟକୁ GSLV-S16 ଜରିଆରେ ମହାକାଶକୁ ପଠାଯିବ । ଆସନ୍ତାକାଲି ସନ୍ଧ୍ୟା ୫.୪୦ ମିନିଟ ସମୟରେ ଶ୍ରୀହରିକୋଟାର ସତିଶ ଧାୱନ ମହାକାଶ କେନ୍ଦ୍ରରୁ ଉତକ୍ଷେପଣ କରାଯିବ ।
ନିସାର ମିଶନର ବଜେଟ୍ ରହିଛି ୧୨ ହଜାର ୫ଶହ କୋଟି ଟଙ୍କା । ନାସା-ଇସ୍ରୋ ସିନ୍ଥେଟିକ୍ ଆପରଚର ରାଡାର (ନିସାର) ସାଟେଲାଇଟ, ନାସା-ଇସ୍ରୋ ସହଭାଗିତାରେ ଏକ ମାଇଲ ଖୁଣ୍ଟ ହେବାକୁ ଯାଉଛି ବୋଲି ଇସ୍ରୋ ତରଫରୁ କୁହାଯାଇଛି । ପ୍ରତି ୧୨ ଦିନରେ ପୃଥିବୀର ଗୋଟିଏ ଘେରା ବୁଲିବ ଏହି ସାଟେଲାଇଟ୍ । ରାତି-ଦିନ ଏବଂ ସବୁ ଋତୁରେ ହାଇରିଜୋଲ୍ୟୁସନର ଡାଟା ପଠାଇବ । ଏହି ସାଟେଲାଇଟ୍ ସମୁଦ୍ର ସ୍ତରର ପରୀକ୍ଷାନିରୀକ୍ଷା ସହ ଜାହାଜଗୁଡିକୁ ସହଜରେ ଠାବ କରିପାରିବ। ବାତ୍ୟା ଉପରେ ନଜର ରଖିବା ସହ ଜଳ ସମ୍ପଦର ମ୍ୟାପିଂ ମଧ୍ୟ କରି ପାରିବ ।
ଏହାରି ମଧ୍ୟରେ ଇସ୍ରୋ ଅଧ୍ୟକ୍ଷ କହିଛନ୍ତି ଯେ, ନିସାର ମିଶନ ପରେ ଆସନ୍ତା ଡିସେମ୍ବରରେ ଇସ୍ରୋର ହ୍ୟୁମାନୋଏଡ ମିଶନ ରହିଛି। ଯେଉଁଥିରେ ରୋବୋଟ୍ ବ୍ୟୋମମିତ୍ରକୁ ମହାକାଶ ପଠାଯିବ । ଏହା ସଫଳରେ ହେଲେ ଆସନ୍ତା ବର୍ଷ ଆଉ ଦୁଇଟି ମାନବବିହୀନ ମିଶନ ଲଞ୍ଚ ହେବ । ସବୁ ପରୀକ୍ଷଣ ପରେ ମାର୍ଚ୍ଚ ୨୦୨୭ରେ ଇସ୍ରୋ ଲଞ୍ଚ କରିବ ଗଗନାୟନ ମିଶନ ।
