ଭୁବନେଶ୍ୱର : ରାଜସ୍ୱ ସେବାରେ ବଡ଼ ସଂସ୍କାର । ଏବେ ଗାଁରେ ବସିବ ତହସିଲ୍ କୋର୍ଟ, ଆସୁଛି ନୂଆ ଆର-ଆଣ୍ଡ-ଆର ପଲିସି । ରାଜସ୍ୱ ମନ୍ତ୍ରୀ ସୁରେଶ ପୂଜାରୀ ଆଜି ରାଜ୍ୟର ରାଜସ୍ୱ ବ୍ୟବସ୍ଥାକୁ ଅଧିକ ସ୍ୱଚ୍ଛ, ସହଜ ଏବଂ ଲୋକାଭିମୁଖୀ କରିବା ପାଇଁ କେତେକ ସଂସ୍କାର ବିଷୟରେ ଘୋଷଣା କରିଛନ୍ତି । ଜନସାଧାରଣଙ୍କ ଜମିଜମା ସମସ୍ୟାର ସମାଧାନ କରିବା ସହ ବିସ୍ଥାପିତଙ୍କୁ ଉଚିତ୍ ନ୍ୟାୟ ଦେବା ପାଇଁ ସରକାର ଏହି ବଡ଼ ପଦକ୍ଷେପ ନେବାକୁ ଯାଉଛନ୍ତି ।
ଲୋକମାନଙ୍କୁ ଆଉ ଛୋଟ ଛୋଟ କାମ ପାଇଁ ତହସିଲ ଅଫିସ ଦୌଡ଼ିବାକୁ ପଡ଼ିବ ନାହିଁ । ଏଣିକି ପ୍ରତି ପଞ୍ଚାୟତ ସ୍ତରରେ ‘କ୍ୟାମ୍ପ କୋର୍ଟ’ ଆୟୋଜନ କରାଯାଇ ଜମି ଚିହ୍ନଟ, ରେକର୍ଡ ସଂଶୋଧନ ଏବଂ ଅନ୍ୟାନ୍ୟ ରାଜସ୍ୱ ଜନିତ ସମସ୍ୟାର ସମାଧାନ ଘଟଣାସ୍ଥଳରେ ହିଁ କରାଯିବ । ରାଜ୍ୟର ପୁରୁଣା ପୁନର୍ବାସ ନୀତି ବଦଳରେ ଆସିବାକୁ ଯାଉଛି ‘ଆର-ଆଣ୍ଡ-ଆର ପଲିସି ୨୦୨୬’।
ଏହି ଆଧୁନିକ ନୀତିରେ ପ୍ରକଳ୍ପ ଯୋଗୁଁ ଭିଟାମାଟି ହରାଉଥିବା ଏବଂ କ୍ଷତିଗ୍ରସ୍ତ ହେଉଥିବା ପରିବାରଗୁଡ଼ିକର ଅଧିକାରକୁ ସର୍ବାଧିକ ପ୍ରାଥମିକତା ଦିଆଯିବ । ସହର ଭିତରେ ଥିବା ଯେଉଁ ଜମିଗୁଡ଼ିକ କାଗଜପତ୍ରରେ ‘ଚାଷ ଜମି’ ହୋଇ ରହିଛି, ହେଲେ ବାସ୍ତବରେ ସେଠାରେ ଆଉ ଚାଷ ହେଉନାହିଁ, ସେଭଳି ଜମିର ‘କିସମ ପରିବର୍ତ୍ତନ’ ନିୟମକୁ କୋହଳ କରାଯିବ ।
ଏଥିପାଇଁ ନୂଆ SOP ଅଣାଯାଉଛି, ଯାହା ଦ୍ୱାରା ସାଧାରଣ ଲୋକେ ହଇରାଣ ହେବାରୁ ରକ୍ଷା ପାଇବେ । ଓଡ଼ିଶାର ସମସ୍ତ ୩୨୧ଟି ତହସିଲର କାର୍ଯ୍ୟଦକ୍ଷତାକୁ ପ୍ରତି ଦୁଇ ମାସରେ ଥରେ ଯାଞ୍ଚ କରାଯିବ ଏବଂ ସେମାନଙ୍କର ରାଙ୍କିଂ ଜାରି କରାଯିବ । କେଉଁ ତହସିଲ ୧ ନମ୍ବରରେ ଅଛି ଏବଂ କିଏ ସବୁଠୁ ପଛରେ, ତାହା ସର୍ବସାଧାରଣରେ ପ୍ରକାଶ ପାଇବ ।
