ସ୍କୁଲରେ ତାଲା ପକାଇ ଧାରଣା ଦେଲେ ଅଭିଭାବକ, ଶିଶୁ ସେବିକା ନିଯୁକ୍ତିରେ ଅନିୟମିତତା ଅଭିଯୋଗ

ବାଙ୍କୀ : ଉଚ୍ଚ ପ୍ରାଥମିକ ବିଦ୍ୟାଳୟରେ ଶିଶୁ ସେବିକା ନିଯୁକ୍ତିରେ ଅନିୟମିତତା ଅଭିଯୋଗ । ସ୍କୁଲରେ ତାଲା ପକାଇ ଧାରଣାରେ ବସିଲେ ସରପଞ୍ଚ ଓ ଅଭିଭାବକ। ବାଙ୍କୀ ଡମପଡ଼ା ବ୍ଲକ ନରଗାଙ୍ଗ ଉଚ୍ଚ ପ୍ରାଥମିକ ବିଦ୍ୟାଳୟରେ ତାଲା ପକାଇଛନ୍ତି ସ୍ଥାନୀୟ ସରପଞ୍ଚ ଓ ଅଭିଭାବକ । ନିଯୁକ୍ତିରେ ଅନିୟମିତତା ଦର୍ଶାଇ ପୁନର୍ବାର ବିଚାର କରି ସଠିକ୍ ପ୍ରାର୍ଥୀଙ୍କୁ ନିଯୁକ୍ତି କରିବାକୁ ପୂର୍ବରୁ ଅଭିଯୋଗ କରିଥିଲେ । କେହି ନ ଶୁଣିବାରୁ ଆଜି ସ୍କୁଲ ଖୋଲିବା ବେଳକୁ ଶତାଧିକ ଗ୍ରାମବାସୀ ଏକାଠି ହୋଇ ଫାଟକରେ ତାଲା ପକାଇ ଧାରଣାରେ ବସିଥିଲେ । ନିଯୁକ୍ତି କୁ ବାତିଲ କରି ପୁନର୍ବାର ପରିଚାଲନା କମିଟିର ନିଷ୍ପତ୍ତି ଅନୁଯାୟୀ ସଠିକ୍ ଭାବେ ନିଯୁକ୍ତି ପ୍ରକ୍ରିୟା କରିବାକୁ ଦାବି କରିଛନ୍ତି । ବିଦ୍ୟାଳୟର ପ୍ରଧାନ ଶିକ୍ଷକ ନିଜର ସମ୍ପର୍କୀୟଙ୍କୁ ନିଯୁକ୍ତି କରାଇ ଥିବାରୁ ଅସନ୍ତୋଷ ପ୍ରକାଶ ପାଇଛି । ଘଟଣା ସ୍ଥଳରେ ବାଙ୍କୀ ପୋଲିସ ପହଞ୍ଚିଛି ।