ନୂଆଦିଲ୍ଲୀ : ମଧ୍ୟପ୍ରାଚ୍ୟ ଯୁଦ୍ଧ ଯୋଗୁଁ ଭାରତ ସମେତ ବିଶ୍ବର ଅଧିକାଂଶ ଦେଶର ବିମାନସେବା ପ୍ରଭାବିତ ହେବାରେ ଲାଗିଛି। ତେବେ ସୋମବାର ନୂଆଦିଲ୍ଲୀରୁ ମାଞ୍ଚେଷ୍ଟର (ବ୍ରିଟେନ) ଯାଉଥିବା ଇଣ୍ଡିଗୋ ଏୟାରଲାଇନ୍ସର ଏକ ବିମାନ ଦୀର୍ଘ ୭ ଘଣ୍ଟା ଉଡିବା ପରେ ଯୁଦ୍ଧ ପରିସ୍ଥିତିର ସମ୍ମୁଖୀନ ହୋଇ ପୁଣି ଦିଲ୍ଲୀ ଫେରିଆସିଥିବା ଜଣାପଡିଛି। ସୂଚନାଯୋଗ୍ୟ ଉକ୍ତ ବିମାନଟି ସୋମବାର ସକାଳେ ନୂଆଦିଲ୍ଲୀରୁ ମାଞ୍ଚେଷ୍ଟର ଅଭିମୁଖେ ଯାତ୍ରାରମ୍ଭ କରିଥିଲା। ଯୁଦ୍ଧ ଯୋଗୁଁ ବିମାନଟି ପରିବର୍ତ୍ତିତ ରୁଟ୍ (ଭାୟା ଏଡେନ ଉପସାଗର ଓ ପୂର୍ବ ଆଫ୍ରିକା)ରେ ଯାତ୍ରା କରିଥିଲା।
ତେବେ ବିମାନଟି ଆଫ୍ରିକୀୟ ରାଷ୍ଟ୍ର ଇଥିଓପିଆ ଓ ଏରିଟ୍ରିୟା ସୀମା ଉପରେ ଉଡୁଥିବାବେଳେ ହଠାତ୍ ଆକାଶସୀମା ସିଲ୍ ହୋଇଥିବାର ସୂଚନା ମିଳିଥିଲା। ସେତେବେଳକୁ ବିମାନଟି ଦୀର୍ଘ ୭ ଘଣ୍ଟା ଉଡିସାରିଥିଲା। ଫଳରେ ପାଇଲଟ ଅନନ୍ୟୋପାୟ ହୋଇ ବିମାନକୁ ପୁଣି ନୂଆଦିଲ୍ଲୀ ଫେରାଇ ଆଣିଥିବା ଜଣାପଡିଛି। ଦିଲ୍ଲୀ-ମାଞ୍ଚେଷ୍ଟର ମଧ୍ୟରେ ଦୂରତା ୬୮୨୯ କିମି ହୋଇଥିବାବେଳେ ବିମାନ ଯାତ୍ରା ପାଇଁ ୧୧ ଘଣ୍ଟା ସମୟ ଲାଗିଥାଏ। ଫେରିଆସିଥିବା ବିମାନ ଯାତ୍ରୀ କିପରି ଗନ୍ତବ୍ୟସ୍ଥଳରେ ପହଞ୍ଚିବେ, ସେଥିନେଇ ଇଣ୍ଡିଗୋ କର୍ତ୍ତୃପକ୍ଷ ବିଭିନ୍ନ ସ୍ତରରେ ଆଲୋଚନା ଜାରି ରଖିଛନ୍ତି।
