କ୍ରିକେଟ ଜଗତକୁ ଏକ ଅତ୍ୟନ୍ତ ଦୁଃଖଦ ଖବର ମିଳିଛି । କ୍ରିକେଟ ଇତିହାସର ସର୍ବଶ୍ରେଷ୍ଠ ଅଲରାଉଣ୍ଡର ଭାବରେ ବିବେଚିତ ୱେଷ୍ଟଇଣ୍ଡିଜ୍ କିମ୍ବଦନ୍ତୀ ସାର୍ ଗାରଫିଲ୍ଡ ସୋବର୍ସଙ୍କ ୮୯ ବର୍ଷ ବୟସରେ ପରଲୋକ ଘଟିଛି । ତାଙ୍କ ପରଲୋକରେ କ୍ରିକେଟର ଏକ ସୁବର୍ଣ୍ଣ ଯୁଗର ଅନ୍ତ ଘଟିଛି । କ୍ରିକେଟ ୱେଷ୍ଟଇଣ୍ଡିଜ୍ ଏହାର ଅଫିସିଆଲ୍ ଏକ୍ସ ଆକାଉଣ୍ଟ ମାଧ୍ୟମରେ ତାଙ୍କ ମୃତ୍ୟୁକୁ ନିଶ୍ଚିତ କରିଛି । ଆସନ୍ତା ୨୮ ଜୁଲାଇରେ ସେ ନିଜର ୯୦ତମ ଜନ୍ମଦିନ ପାଳନ କରିଥାନ୍ତେ, ମାତ୍ର ଏହାର ୧୧ ଦିନ ପୂର୍ବରୁ ଅର୍ଥାତ୍ ୧୭ ଜୁଲାଇରେ ସେ ଦୁନିଆକୁ ଅଲବିଦା କହିଛନ୍ତି । ବାରବାଡୋସ୍ରୁ ଆସି କ୍ରିକେଟ୍ ଦୁନିଆରେ ରାଜ୍ କରିଥିବା ସୋବର୍ସଙ୍କୁ କ୍ରିକେଟ୍ ଇତିହାସର ସବୁଠାରୁ ଶ୍ରେଷ୍ଠ ଓ ପ୍ରଭାବଶାଳୀ ଖେଳାଳି ଭାବେ ଗଣନା କରାଯାଏ ।
ସାର୍ ଗାରଫିଲ୍ଡ ସୋବର୍ସଙ୍କ ଜନ୍ମ ୨୮ ଜୁଲାଇ ୧୯୩୬ରେ ବାରବାଡୋସରେ ହୋଇଥିଲା । ସେ ତାଙ୍କର ଚମତ୍କାର ଖେଳ ସହିତ କ୍ରିକେଟକୁ ପୁନଃପରିଭାଷିତ କରିଥିଲେ । ସେ ଜଣେ ଚମତ୍କାର ବାମହାତୀ ବ୍ୟାଟସମ୍ୟାନ ଥିଲେ ଏବଂ ଦ୍ରୁତ-ମଧ୍ୟମ ଗତି ଏବଂ ବାମହାତୀ ସ୍ପିନ୍ ଉଭୟ ବୋଲିଂରେ ପାରଙ୍ଗମ ଥିଲେ । ସାର୍ ଗାରଫିଲ୍ଡ ସୋବର୍ସ ୧୭ ବର୍ଷ ବୟସରେ ୱେଷ୍ଟଇଣ୍ଡିଜ୍ ପାଇଁ ତାଙ୍କର ଟେଷ୍ଟ ଡେବ୍ୟୁ କରିଥିଲେ । ପରବର୍ତ୍ତୀ ସମୟରେ ସେ ୯୩ଟି ଟେଷ୍ଟ ମ୍ୟାଚ୍ ଖେଳି ୫୭.୭୮ ହାରରେ ୮୦୩୨ ରନ୍ କରିଥିଲେ, ଯେଉଁଥିରେ ୨୬ଟି ଶତକ ସାମିଲ। ସେ ବଲ୍ ସହିତ ମଧ୍ୟ ଅସାଧାରଣ ଭାବରେ ଭଲ ପ୍ରଦର୍ଶନ କରିଥିଲେ, ୨୩୫ଟି ୱିକେଟ ନେଇଥିଲେ । ତାଙ୍କର କ୍ଷେତ୍ରରକ୍ଷଣ ମଧ୍ୟ ଗୁରୁତ୍ୱପୂର୍ଣ୍ଣ ଥିଲା, ଟେଷ୍ଟ କ୍ରିକେଟରେ ୧୦୯ଟି କ୍ୟାଚ୍ ନେଇ ନିଜର ମୂଲ୍ୟ ପ୍ରମାଣ କରିଥିଲେ।
ସେହିପରି ନିଜର ପ୍ରଥମ ଶ୍ରେଣୀ କ୍ରିକେଟ କ୍ୟାରିୟରରେ ସେ ମୋଟ ୩୮୩ଟି ମ୍ୟାଚ୍ ଖେଳି ୫୪.୮୭ ହାରରେ ୨୮,୩୧୪ ରନ୍ (୮୬ଟି ଶତକ ସହ) କରିବା ସହ ୧,୦୪୩ଟି ଉଇକେଟ୍ ନେଇ ଏକ ଅଲିଭା କୀର୍ତ୍ତିମାନ ସ୍ଥାପନ କରିଛନ୍ତି । ତାଙ୍କର ଏହି ମହାପ୍ରୟାଣ ସହ ବିଶ୍ୱ କ୍ରିକେଟ୍ର ଏକ ସ୍ୱର୍ଣ୍ଣିମ ଅଧ୍ୟାୟର ଅନ୍ତ ଘଟିଛି ।
