ଦିନେ ଥିଏଟରରେ ନାୟିକା ଭୂମିକାରେ କରୁଥିଲେ ଅଭିନୟ କିନ୍ତୁ ପରିସ୍ଥିତି ଆଜି କରିଦେଇଛି ଚା’ ଦୋକାନୀ । ସତରେ ଦର୍ଶକବନ୍ଧୁ ପରିସ୍ଥିତି କେତେବେଳେ କାହାକୁ କେଉଁଠାକୁ ଆଣିବା ତାହା କହିବା ସମ୍ଭବ ନୁହେଁ । ସମୟ ଚକ୍ରରେ କିଏ ଆଜି ରାଜା ତ କାଲି ରଙ୍କ । ତେବେ ଆମେ କହୁଛୁ ଜଗତସିଂହପୁର ଜିଲ୍ଲା ସଦରବ୍ଲକ ଅଳା ପଞ୍ଚାୟତର ମକରମପୁର ଗାଁର ରାଉତ ଛକରେ ଥିବା ଚା ଦୋକାନୀ ସାଗରବାଳା ପଟନାୟକ ଓରଫ ବାସନ୍ତୀ ଅପାଙ୍କ କଥା ।
ଦିନେ ଅନ୍ନପୂର୍ଣା ଥିଏଟରରେ ନାୟିକା ଭୂମିକାରେ ଅଭିନୟ କରୁଥିବା ସାଗରବାଳା ପଟନାୟକ ଓରଫ ବାସନ୍ତି ଅପା ଆଜି ଏକ ଚା’ ଦୋକାନ କରି ନିଜ ପରିବାର ଗୁଜୁରାଣ ମେଣ୍ଟାଉଛନ୍ତି । କିନ୍ତୁ ଅରିକ୍ଷିତକୁ ଦଇବ ସାହା ହେଲା ଭଳି ବାସନ୍ତୀ ଅପାଙ୍କ ଏ ଅସମୟରେ ତାଙ୍କୁ ସହାୟତାର ହାତ ବଢାଇଛନ୍ତି କମେଡି କ୍ଲବର ବିଶିଷ୍ଟ ଚଳଚିତ୍ର ହାସ୍ୟଅଭିନେତା ହରିଭାଇ । ୧୯୬୫ ମସିହାରେ କଟକର ଅନ୍ନପୂର୍ଣା ଗ୍ରୁପରେ ଯୋଗଦେଇଥିଲେ ବାସନ୍ତୀ ଅପା ।
୭୦ରୁ ୮୦ ଦଶକ ମଧ୍ୟରେ ପ୍ରାୟ ଏକ ହଜାରରୁ ଉର୍ଦ୍ଧ ଥିଏଟରରେ ଅଭିନୟ କରି ଦର୍ଶକମାନଙ୍କ ହୃଦୟରେ ଏକ ସ୍ବତନ୍ତ ସ୍ଥାନ ଅଧିକାର କରିଥିଲେ ସାଗରବାଳା ପଟନାୟକ ଓରଫ ବାସନ୍ତୀ ଅପା । ଓଡ଼ିଶା ତଥା ଓଡିଶା ବାହାରେ ବେଶ ସୁନାମ ଅର୍ଜନ କରିଥିଲେ । କିନ୍ତୁ ସ୍ବାମୀଙ୍କ ବିୟୋଗ ପରେ ପରିସ୍ଥିତିକ୍ରମେ ଘରକୁ ଆସି ଅକର୍ମଣ୍ୟ ପୁଅ ବୋହୁ ଓ ଦୁଇ ନାତିନାତୁଣୀକୁ ନେଇ ପରିବାର ଚଳେଇବା କଷ୍ଟସାଧ୍ୟ ହୋଇପଡିଥିଲା । ପରେ ସ୍ଥାନୀୟ ଲୋକମାନଙ୍କ ସହାୟତାରେ ଏକ ଚା’ ଦୋକାନ କରି ନିଜର ପରିବାର ବହୁ କଷ୍ଟରେ ଚଳାଉଛନ୍ତି । ତେବେ ଏହି ଖବର ସୋସିଆଲ ମିଡିଆରେ ମଧ୍ୟ ବେଶ ଭାଇରାଲ ହେଉଛି ।
ବାସନ୍ତୀ ଅପାଙ୍କ ଏଭଳି ଦୁର୍ଦିନର ଖବର ସୋସିଆଲ ମିଡିଆ ତଥା ଗଣମାଧ୍ୟମରୁ ପାଇ ସିନେଜଗତର ଆଗଧାଡ଼ିର ପ୍ରସିଦ୍ଧ ହାସ୍ୟ ଅଭିନେତା ହରିଭାଇ ତାଙ୍କ ଦ୍ୱାରା ଗଠିତ ହରିଭାଇ କମେଡି କ୍ଲବ ମାଧ୍ୟମରେ ତାଙ୍କୁ ସହାୟତାର ହାତ ବଢ଼େଇଛନ୍ତି । ଡିସେମ୍ବର ୧୯ରେ ଭୁବନେଶ୍ୱରରେ ତାଙ୍କ କମେଡି କ୍ଳବର ଏକ ଉତ୍ସବରେ ତାଙ୍କୁ ସମ୍ବର୍ଦ୍ଧିତ କରିବା ସହ ବଞ୍ଚିଥିବା ପର୍ଯ୍ୟନ୍ତ ତାଙ୍କୁ ୧ ହଜାର ଟଙ୍କା ସହାୟତା ରାଶି ପ୍ରଦାନ କରିବେ ବୋଲି ଘୋଷଣା କରିଛନ୍ତି ।
ହରି ଭାଇ ନିଜେ ରାଉତ ଛକରେ ଥିବା ବାସନ୍ତୀ ଅପାଙ୍କ ଚା’ ଦୋକାନରେ ପହଞ୍ଚି ବାସନ୍ତୀ ଅପାଙ୍କ ଚା’ ପିଇବା ସହ ଏହି ଖୁସି ଖବର ତାଙ୍କୁ ଦେଇଛନ୍ତି । ଏଥିରେ ବାସନ୍ତୀ ଅପା ଖୁସି ହୋଇ ହରି ଭାଇଙ୍କୁ ଆଶୀର୍ବାଦ ଦେବା ସହ ତାଙ୍କର ଦୀର୍ଘଜୀବନ କାମନା କରିଛନ୍ତି । ଏଥିରେ ଗ୍ରାମବାସୀମାନେ ମଧ୍ୟ ବେଶ ଖୁସି ବ୍ୟକ୍ତ କରିଛନ୍ତି । ହରିଭାଇଙ୍କ ଏଭଳି ମାନବିକତା ସତରେ ବେଶ ପ୍ରଶଂସାଯୋଗ୍ୟ । ଏହା ଆଜିକାଲିର ଯୁବପିଢିଙ୍କ ପାଇଁ ପ୍ରେରଣାଯୋଗ୍ୟ ନିଶ୍ଚୟ ।
