ନୂଆଦିଲ୍ଲୀ: ନଭେମ୍ବର ୧୧ରେ ସୁପ୍ରିମକୋର୍ଟର ଜଷ୍ଟିସ ସଞ୍ଜୀବ ଖାନ୍ନା ଦେଶର ୫୧ତମ ପ୍ରଧାନ ବିଚାରପତି ଭାବରେ ଶପଥ ଗ୍ରହଣ କରିବେ। ଜଷ୍ଟିସ ସଞ୍ଜୀବ ଖାନ୍ନା ଦିଲ୍ଲୀରେ ଜନ୍ମଗ୍ରହଣ କରିଥିଲେ ଏବଂ ସେଠାରେ ବଢ଼ିଥିଲେ। ଏବେ ପ୍ରଧାନ ବିଚାରପତି ପଦବୀ ସହ ଏକ ବଡ ଦାୟିତ୍ବ ଗ୍ରହଣ କରିବାକୁ ଯାଉଛନ୍ତି ଜଷ୍ଟିସ ସଞ୍ଜୀବ ଖାନ୍ନା । ଏହି ଦାୟିତ୍ବ ସହିତ ତାଙ୍କ ସୁରକ୍ଷା ବଢ଼ିଛି, ଯାହା ତାଙ୍କ ଦୈନନ୍ଦିନ କାର୍ଯ୍ୟ ଉପରେ ପ୍ରଭାବ ପକାଇଛି। ପ୍ରଧାନ ବିଚାରପତି ହେବା ପରେ, ସେ ଆଉ ଯେକୌଣସି ସମୟରେ ନିଜ ଇଚ୍ଛା ଅନୁଯାୟୀ ଖୋଲା ସ୍ଥାନକୁ ଯାଇପାରିବେ ନାହିଁ | କୁହାଯାଉଛି ଯେ ତାଙ୍କ ନାମ ପ୍ରଧାନ ବିଚାରପତି ଭାବେ ଘୋଷଣା ହେବା ପରଠାରୁ ସେ ବର୍ତ୍ତମାନ ପ୍ରୋଟୋକଲ୍ ଅନୁସରଣ କରିବାକୁ ବାଧ୍ୟ ହୋଇଛନ୍ତି। ଏହି ପ୍ରୋଟୋକଲ୍ ତାଙ୍କର ସକାଳ ଚାଲିବା ଉପରେ ମଧ୍ୟ ସିଧାସଳଖ ପ୍ରଭାବ ପକାଇଛି | ପ୍ରଧାନ ବିଚାରପତି ଭାବରେ ନିଯୁକ୍ତିର ବିଜ୍ଞପ୍ତି ଆସିବା ପରେ ତାଙ୍କର ଘର ବାହାରେ ସକାଳ ବୁଲିବା ମଧ୍ୟ ବନ୍ଦ ହୋଇଯାଇଥିବା ଜଣାଯାଇଛି।
ପୂର୍ବରୁ ସେ ଏକାକୀ କାର୍ ଚଳାଇ ନିଜ ବନ୍ଧୁଙ୍କ ଘରକୁ ଚାଲିଯାଉଥିଲେ। ଯେତେବେଳେ ଯେଉଁଆଡେ ମନ ଯାଉଥିଲେ। ସକାଳୁ ସକାଳୁ ଉଠି ସେ ଚାଲିବାକୁ ଏକାକୀ ବାହାରକୁ ଚାଲିଯାଉଥିଲେ। ଲୋଧି ଗାର୍ଡେନରେ ସେ ସକାଳୁ ୧୦କିଲୋମିଟର ଚାଲି ଘରକୁ ଫେରୁଥିଲେ। ହେଲେ ଏବେ ପ୍ରଧାନ ବିଚାରପତି ହେବା ପରେ ସେ ସବୁ ବନ୍ଦ କରିବାକୁ ପଡ଼ିଛି। ସୁରକ୍ଷାକର୍ମୀଙ୍କୁ ସାଥିରେ ନେଇ ସେ ସକାଳୁ ଚାଲିବାକୁ ଯିବା ପାଇଁ ଚାହୁନଥିବାରୁ ଏବେ ସକାଳୁ ବାହାରକୁ ଯାଇ ଚାଲିବାଟା ବନ୍ଦ କରିଥିବା ସାମ୍ନାକୁ ଆସିଛି।
