ଚେନ୍ନାଇ: ଦ୍ରାବିଡ ମୁନ୍ନେତ୍ରା କସଗମ (ଡିଏମକେ) ସଭାପତି ତଥା ତାମିଲନାଡୁର ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନ ସ୍ୱୀକାର କରିଛନ୍ତି ଯେ ତାଙ୍କ ପୁଅ ତଥା କ୍ରୀଡ଼ା ମନ୍ତ୍ରୀ ଉଦୟନିଧିଙ୍କୁ ଉପମୁଖ୍ୟମନ୍ତ୍ରୀ କରିବା ପାଇଁ ଦଳ ମଧ୍ୟରେ ଆଲୋଚନା ଚାଲିଛି | କିନ୍ତୁ ତାଙ୍କୁ ଉପମୁଖ୍ୟମନ୍ତ୍ରୀ କରିବାର ସମୟ ଏବେ ଆସିନାହିଁ | ଏକ କାର୍ଯ୍ୟକ୍ରମରେ ସାମ୍ବାଦିକମାନଙ୍କ ସହ କଥାବାର୍ତ୍ତା କରୁଥିବାବେଳେ ଷ୍ଟାଲିନଙ୍କୁ ପଚରାଯାଇଥିଲା ଯେ ଉଦୟନିଧିଙ୍କୁ ଉପ-ମୁଖ୍ୟମନ୍ତ୍ରୀ କରିବା ପାଇଁ ଦଳର ଏକ ଗୋଷ୍ଠୀ ଦାବି କରୁଛନ୍ତି କି? ଏନେଇ ଷ୍ଟାଲିନ କହିଛନ୍ତି ଯେ ଏନେଇ ତ ଦାବି ହେଉଛି | କିନ୍ତୁ ଏହାକୁ କାର୍ଯ୍ୟକାରୀ କରିବାର ସମୟ ଆସିନାହିଁ |
ଉଦୟନିଧିଙ୍କୁ ଆଗକୁ ନେବା ପାଇଁ ଉପଯୁକ୍ତ ସମୟ ଏପର୍ଯ୍ୟନ୍ତ ଆସିନାହିଁ ବୋଲି ମୁଖ୍ୟମନ୍ତ୍ରୀ ସୂଚାଇ ଦେଇଥିଲେ। ଦଳରେ କିଛି ଦିନ ଧରି ଆଶା କରାଯାଉଥିଲା ଯେ ଉଦୟନିଧିଙ୍କୁ ଉପମୁଖ୍ୟମନ୍ତ୍ରୀ କରାଯିବ। କ୍ରୀଡ଼ା ଏବଂ ଯୁବ କଲ୍ୟାଣ ମନ୍ତ୍ରୀ ଥିବା ଉଦୟନିଧି ଅନେକ ଗୁରୁତ୍ୱପୂର୍ଣ୍ଣ ବିଭାଗର ଦାୟିତ୍ୱ ତୁଲାଇଛନ୍ତି | ଚେନ୍ନାଇ ମେଟ୍ରୋ ରେଳ ଫେଜ -୨ ପରି ପ୍ରମୁଖ ପ୍ରକଳ୍ପ ତାଙ୍କ ଉପରେ ନ୍ୟସ୍ତ ହୋଇଛି | ବାସ୍ତବରେ ରାଜ୍ୟ ପଛୁଆ ବର୍ଗର କଲ୍ୟାଣ ମନ୍ତ୍ରୀ ରାଜା କନ୍ନପନ୍ ଶୁକ୍ରବାର ଦିନ ରାମନାଥପୁରମରେ ଏକ ସାଧାରଣ କାର୍ଯ୍ୟକ୍ରମରେ ଉଦୟନିଧି ଷ୍ଟାଲିନଙ୍କୁ ଉପ-ମୁଖ୍ୟମନ୍ତ୍ରୀ ଭାବରେ ସମ୍ବୋଧିତ କରିଥିଲେ । ତେବେ ସେ ତୁରନ୍ତ ନିଜକୁ ସଂଶୋଧନ କରି କହିଥିଲେ ଯେ ସେ ଅଗଷ୍ଟ ୧୯ ପରେ ହିଁ ଉଦୟନିଧିଙ୍କୁ ଉପମୁଖ୍ୟମନ୍ତ୍ରୀ ଭାବରେ ସମ୍ବୋଧନ କରିପାରିବେ। ଏହା ପରେ ଚର୍ଚ୍ଚା ଜୋର ଧରିଥିଲା ଯେ ଉଦୟନିଧିଙ୍କୁ କୌଣସି ବଡ ଦାୟିତ୍ୱ ମିଳିପାରେ |
ଉଦୟନିଧିଙ୍କୁ ଉପମୁଖ୍ୟମନ୍ତ୍ରୀ କରିବାର ସମୟ ଆସିନାହିଁ: ଷ୍ଟାଲିନ
