ଷ୍ଟାର ହେଲ୍‌ଥ ଇନସ୍ୟୁରେନ୍ସକୁ ୭୪ ହଜାର ଟଙ୍କା ଜରିମାନା

ବରଗଡ଼ : ବରଗଡ଼ ଖାଉଟୀ ଅଦାଲତରେ ଏକ ମାମଲାର ବିଚାର କରି ସେବା ଯୋଗାଇଥିବାରେ ବିଫଳ ହୋଇଥିବା ଷ୍ଟାର ହେଲଥ ଇନସ୍ୟୁରେନ୍ସକୁ ୭୪ ହଜାର ଟଙ୍କା ଜରିମାନା କରାଯାଇଛି।। ବରଗଡ଼ ଶକ୍ତିନଗର ନିବାସୀ ଆକାଶ ଅଗ୍ରୱାଲ ସ୍ଥାନୀୟ ବିକାଶ ହସପିଟାଲରେ ଚିକିତ୍ସିତ ହେବା ପରେ ତାଙ୍କ ବିଲ୍‌କୁ ବୀମା କମ୍ପାନୀ ଦେଇ ନ ଥିଲା। ଏଥିପାଇଁ ସେ ସେବା ଖିଲାପର ଅଭିଯୋଗ କରି ଖାଉଟି ଅଦାଲତର ଆଶ୍ରୟ ନେଇଥିଲେ। ବୀମା ସମ୍ପର୍କିତ ସମସ୍ତ କାଗଜପତ୍ର ଓ ହସପିଟାଲର ବିଲ୍‌ ମଧ୍ୟ ଦାଖଲ କରିଥିଲେ। ଖାଉଟୀ ଅଦାଲତ ଏହି ମାମଲାରେ ବୀମା କମ୍ପାନୀକୁ ସ୍ୱାସ୍ଥ୍ୟ ସେବା ବାବଦରେ ୩୯, ୫୪୬ ଟଙ୍କା ସହ ମାନସିକ ନିର୍ଯାତନା ପାଇଁ ଆହୁରି ୨୫ ହଜାର ଟଙ୍କା ଓ ମାମଲା ପରିଚାଳନା ଖର୍ଚ୍ଚ ବାବଦକୁ ୧୦ ହଜାର ଟଙ୍କା ଅଭିଯୋଗକାରୀଙ୍କୁ ଦେବା ପାଇଁ ଷ୍ଟାର ହେଲଥକୁ ନିର୍ଦ୍ଦେଶ ଦେଇଛନ୍ତି। ଆବେଦନକାରୀ ପକ୍ଷରୁ ଆଇନଜୀବୀ ବି.ବେହେରା ଏହି ମାମଲା ପରିଚାଳନା କରୁଥିବା ବେଳେ ଖାଉଟୀ ଅଦାଲଦର ଅଧ୍ୟକ୍ଷ ଜିଗିସା ମିଶ୍ର ଓ ସଦସ୍ୟା ଅଞ୍ଜୁ ଅଗ୍ରୱାଲ ଏହି ମାମଲାର ଶୁଣାଣି କରିଛନ୍ତି।