କୋଲକାତା: ସଂରକ୍ଷଣ ବିରୋଧୀ ଛାତ୍ର ଆନ୍ଦୋଳନ ପରେ ବାଂଲାଦେଶ ପ୍ରଧାନମନ୍ତ୍ରୀ ଶେଖ ହସିନାଙ୍କୁ ତାଙ୍କ ପଦରୁ ଇସ୍ତଫା ଦେବାକୁ ପଡିଛି। ଗତ ଦୁଇ ମାସ ଧରି ଦେଶରେ ସଂରକ୍ଷଣ ବିରୋଧୀ ଛାତ୍ର ଆନ୍ଦୋଳନ ଚାଲିଛି। ଏହି ହିଂସାତ୍ମକ ଆନ୍ଦୋଳନ ଯୋଗୁ ହସିନା ଦେଶ ଛାଡିଛନ୍ତି। ଏହି ସମୟରେ ମହିଳା ଟି-୨୦ ବିଶ୍ୱକପ ଆୟୋଜନ ସମ୍ପର୍କରେ ଆଇସିସି ଏକ ବଡ଼ ମନ୍ତବ୍ୟ ଦେଇଛି। ବାସ୍ତବରେ ଅକ୍ଟୋବରରେ ବାଂଲାଦେଶରେ ମହିଳା ଟି-୨୦ ବିଶ୍ୱକପ ଅନୁଷ୍ଠିତ ହେବ। ଏହି ଟୁର୍ନାମେଣ୍ଟ ୩ ରୁ ୨୦ ଅକ୍ଟୋବର ପର୍ଯ୍ୟନ୍ତ ଚାଲିବ।
ବାଂଲାଦେଶରେ ମହିଳା ଟି-୨୦ ବିଶ୍ୱକପ ଆୟୋଜନ ସମ୍ପର୍କରେ ଆଇସିସି କହିଛି, ‘ଆଇସିସିର ସମସ୍ତ ସଦସ୍ୟ ନିରପେକ୍ଷ ଭାବେ ବାଂଲାଦେଶର ସୁରକ୍ଷା ମନିଟରିଂ ବ୍ୟବସ୍ଥା ଉପରେ ନଜର ରଖିଛନ୍ତି। ପରିସ୍ଥିତିକୁ ତୀକ୍ଷଣ ନଜର ରଖାଯାଉଛି, କିନ୍ତୁ ଟୁର୍ନାମେଣ୍ଟ ଆରମ୍ଭ ହେବାକୁ ସାତ ସପ୍ତାହ ବାକି ଥିବାବେଳେ ଏହି ଟୁର୍ନାମେଣ୍ଟ ବାଂଲାଦେଶରୁ ସ୍ଥାନାନ୍ତରିତ ହେବ କି ନାହିଁ ସେ ସମ୍ପର୍କରେ ଏତେ ଶୀଘ୍ର ମନ୍ତବ୍ୟ ଦେବା ଠିକ୍ ହେବ ନାହିଁ ।
ବାଂଲାଦେଶର ପରିସ୍ଥିତିକୁ ଦୃଷ୍ଟିରେ ରଖି ଭାରତର ବୈଦେଶିକ ବ୍ୟାପାର ମନ୍ତ୍ରଣାଳୟ ଭାରତୀୟ ନାଗରିକମାନଙ୍କୁ ବାଂଲାଦେଶ ଯାତ୍ରା ନ କରିବାକୁ ପରାମର୍ଶ ଦେଇଛି। ସେଠାରେ ଥିବା ରାଜନୈତିକ ପରିସ୍ଥିତିକୁ ଅନୁଧ୍ୟାନ କରି ଭାରତୀୟ ମହିଳା ଦଳ ବାଂଲାଦେଶ ଯିବେ କି ନାହିଁ ସେ ସମ୍ପର୍କରେ ବିସିସିଆଇ ପକ୍ଷରୁ କୌଣସି ମନ୍ତବ୍ୟ ଆସିନାହିଁ। ଏଭଳି ପରିସ୍ଥିତିରେ ବିସିସିଆଇ ସବୁବେଳେ ସରକାରଙ୍କ ପରାମର୍ଶକୁ ଅନୁସରଣ କରିଥାଏ।
ଏଭଳି ପରିସ୍ଥିତିର ମୁକାବିଲା ପାଇଁ ଆଇସିସି ଯୋଜନା ଆରମ୍ଭ କରିଛି। ଆଇସିସି ମଧ୍ୟ ଶ୍ରୀଲଙ୍କାରେ ଏହି ଟୁର୍ନାମେଣ୍ଟ ଆୟୋଜନ କରିପାରିବ ବୋଲି କୁହାଯାଉଛି।
