ଆମେରିକାରୁ ମାଡି ଆସୁଛି କେଉଁ ରୋଗ, ବିଶେଷଜ୍ଞ ଦେଲେ ଚେତାବନୀ

ନୂଆଦିଲ୍ଲୀ: ସମଗ୍ର ବିଶ୍ୱରେ ବାର୍ଡ ଫ୍ଲୁ ରୋଗ ଦ୍ରୁତ ଗତିରେ ବୃଦ୍ଧି ପାଉଥିବା ବେଳେ ସ୍ପେନ ବିଶେଷଜ୍ଞମାନେ ଚେତାବନୀ ଦେଇଛନ୍ତି ଯେ ପରବର୍ତ୍ତୀ ମହାମାରୀ ଆମେରିକାରୁ ଆସିପାରେ। ରିପୋର୍ଟ ଅନୁଯାୟୀ, ବିଶେଷଜ୍ଞମାନେ କହିଛନ୍ତି , ଆମେରିକାରେ H5N1 ଏଭିଆନ ଫ୍ଲୁ ଦ୍ରୁତ ଗତିରେ ବ୍ୟାପୁଛି, ତେଣୁ ଏହା ନିକଟ ଭବିଷ୍ୟତରେ ଏକ ନୂତନ ମହାମାରୀ ସୃଷ୍ଟି କରିପାରେ। ଏଭିଆନ ଇନଫ୍ଲୁଏଞ୍ଜାକୁ ବାର୍ଡ ଫ୍ଲୁ ମଧ୍ୟ କୁହାଯାଏ। ପକ୍ଷୀମାନଙ୍କ ବ୍ୟତୀତ ଏହି ଜୀବାଣୁ ବର୍ତ୍ତମାନ ଗାଈ ଏବଂ ଅନ୍ୟ ପ୍ରାଣୀମାନଙ୍କ ନିକଟରେ ପହଞ୍ଚିଛି। ଏପର୍ଯ୍ୟନ୍ତ ମନୁଷ୍ୟ କୌଣସି ମାମଲା ଚିହ୍ନଟ ହୋଇନାହିଁ, କିନ୍ତୁ ବିଶେଷଜ୍ଞମାନେ ଭୟ କରୁଛନ୍ତି ଯେ, ଏପରି ଏକ ମ୍ୟୁଟାଣ୍ଟ ଯେକୌଣସି ସମୟରେ ବାହାରିପାରେ କିମ୍ବା ଏହା ପଶୁମାନଙ୍କଠାରୁ ମନୁଷ୍ୟକୁ ଆକ୍ରାନ୍ତ କରିପାରେ। ଏଭଳି ପରିସ୍ଥିତିରେ ଆସନ୍ତୁ ଜାଣିବା ଏହି ମହାମାରୀ କେତେ ବିପଜ୍ଜନକ ହୋଇପାରେ। ପ୍ରାୟ ୬ ମାସ ପୂର୍ବେ ଆମେରିକାର ୪୮ଟି ରାଜ୍ୟରେ ୯ କୋଟିରୁ ଅଧିକ କୁକୁଡ଼ାକୁ ଏଭିଆନ ଇନଫ୍ଲୁଏଞ୍ଜା ବ୍ୟାପି ଯାଇଥିଲା। ଏହି ଜୀବାଣୁ ଗାଈ ମାନଙ୍କଠାରେ ମଧ୍ୟ ଦେଖିବାକୁ ମିଳିଥିଲା। ତେବେ ରୋଗ ନିୟନ୍ତ୍ରଣ ଏବଂ ପ୍ରତିରୋଧ କେନ୍ଦ୍ର (ସିଡିସି)ର ପୂର୍ବତନ ନିର୍ଦ୍ଦେଶକ ରବର୍ଟ ରେଡଫିଲ୍ଡ ମଧ୍ୟ ଦାବି କରିଛନ୍ତି ଯେ ପରବର୍ତ୍ତୀ ମହାମାରୀ ବାର୍ଡ ଫ୍ଲୁ ଦ୍ୱାରା ହୋଇପାରେ।