ତାମିଲ ଏବଂ ମାଲାୟଲମ ଫିଲ୍ମ ଇଣ୍ଡଷ୍ଟ୍ରିର ଜଣେ ଜଣାଶୁଣା ଅଭିନେତ୍ରୀ ଅଞ୍ଜୁ କ୍ରିଷ୍ଣା । ନିକଟରେ ଏହି ଅଭିନେତ୍ରୀଙ୍କୁ ଚେନ୍ନାଇରୁ ଗିରଫ କରାଯାଇଛି । ତାଙ୍କଠାରୁ ଡ୍ରଗ୍ସ ମଧ୍ୟ ଜବତ କରାଯାଇଛି । ଏହି ଗିରଫଦାରୀର ଖବର ଫିଲ୍ମ ଇଣ୍ଡଷ୍ଟ୍ରିରେ ଚର୍ଚ୍ଚା ଜୋର ଧରିଛି । ରିପୋର୍ଟ ଅନୁଯାୟୀ, ଗୁରୁବାର ଦିନ, ଆଣ୍ଟି-ନାର୍କୋଟିକ୍ସ ଇଣ୍ଟେଲିଜେନ୍ସ ୟୁନିଟ୍ (ANIU)ର ସାଉଥ୍ ଟିମ୍ ଭାଲାସରାବକ୍କମ୍ ଅଞ୍ଚଳରେ ଚଢାଉ କରିଥିଲା । ଏହି ସମୟରେ ଅଞ୍ଜୁ କ୍ରିଷ୍ଣା ଏବଂ ଅନ୍ୟମାନଙ୍କୁ ଅଟକ ରଖାଯାଇଛି । ଟିମ୍ ମେଥାମ୍ଫେଟାମାଇନ୍ ଏବଂ ନିଷିଦ୍ଧ ପଦାର୍ଥ ଜବତ କରାଯାଇଛି ।
ଗିରଫ ହୋଇଥିବା ବ୍ୟକ୍ତିଙ୍କ ମଧ୍ୟରେ ଅଛନ୍ତି ଅଞ୍ଜୁ କ୍ରିଷ୍ଣା, ସହକାରୀ ନିର୍ଦ୍ଦେଶକ ଭିନ୍ସି ନିବେଦ, କାର୍ତ୍ତିକ ରାଜା, ଯଶୱନ୍ତ, ଶ୍ରୀରାମ, ଆଲବିବିଂଶା ଏବଂ ଭେଙ୍କଟେଶ କୁମାର । ପୋଲିସର ସୂଚନା ଅନୁଯାୟୀ, ଚଢାଉ ସମୟରେ ଛଅ ଗ୍ରାମ ମେଥାମ୍ଫେଟାମାଇନ, ସାତ ଗ୍ରାମ ଓଜି ଗଞ୍ଜେଇ, ୧୫ ଗ୍ରାମ ଗଞ୍ଜେଇ, ଗୋଟିଏ ଏଲଏସଡି ଷ୍ଟାମ୍ପ ଏବଂ ନଅଟି ମୋବାଇଲ ଫୋନ୍ ଜବତ କରାଯାଇଛି ।
ଏହି ମାମଲାରେ ଅଞ୍ଜୁ କ୍ରିଷ୍ଣାଙ୍କ ନାମ ଆସିବା ପୂର୍ବରୁ ମଧ୍ୟ ସେ ତାମିଲ ଏବଂ ମାଲାୟଲମ ଚଳଚ୍ଚିତ୍ରରେ ତାଙ୍କର ଅଭିନୟ ପ୍ରତିଭା ପାଇଁ ଜଣାଶୁଣା ଥିଲେ । ୩୧ ବର୍ଷୀୟା ଏହି ମହିଳା ଅନେକ ଚଳଚ୍ଚିତ୍ରରେ କାମ କରିଛନ୍ତି । ରିପୋର୍ଟ ଅନୁଯାୟୀ, ସେ ‘ଆକାଶମ୍ କଦନ୍ନନ୍’, ‘ଆରୋ’ ଏବଂ ‘ଓମ୍ ଭେଲିମାଲାଇ’ ଭଳି ଚଳଚ୍ଚିତ୍ରରେ ଅଭିନୟ କରିଥିଲେ । ନିକଟରେ ମୁକ୍ତିଲାଭ କରିଥିବା ‘ଓମ୍ ଭେଲିମାଲାଇ’, ଓମ୍ ବିଜୟଙ୍କ ଦ୍ୱାରା ନିର୍ଦ୍ଦେଶିତ ହୋଇଥିଲା ଏବଂ ଏଥିରେ ସୁପରଗୁଡ୍ ସୁବ୍ରମଣି ଏବଂ ବୀରା ସୁଭାଷ ମୁଖ୍ୟ ଭୂମିକାରେ ଅଭିନୟ କରିଥିଲେ ।
ଅଞ୍ଜୁ କ୍ରିଷ୍ଣା ସୋସିଆଲ ମିଡିଆରେ ବହୁତ ଲୋକପ୍ରିୟ । ଇନଷ୍ଟାଗ୍ରାମରେ ତାଙ୍କର ୨୩.୬ ହଜାର ଫଲୋଅର୍ସ ଅଛନ୍ତି । ସେ ନିୟମିତ ଭାବରେ ତାଙ୍କର ମଡେଲିଂ କାମ, ଫଟୋସୁଟ୍ ଏବଂ ବ୍ୟକ୍ତିଗତ ଫଟୋ ପୋଷ୍ଟ କରନ୍ତି ।
ଏଥିସହ ଜାଣିରଖନ୍ତୁ ଯେ, ଅଞ୍ଜୁ କ୍ରିଷ୍ଣାଙ୍କ ଗିରଫଦାରୀ ଶିଳ୍ପରେ ନିଶାଦ୍ରବ୍ୟ ଅପବ୍ୟବହାର ବିଷୟରେ ପୁଣି ଆଲୋଚନା ଆରମ୍ଭ କରିଛି । ଗତ କିଛି ବର୍ଷ ଧରି, ଅନେକ ଚଳଚ୍ଚିତ୍ର ବ୍ୟକ୍ତିତ୍ୱ ନିଶାଦ୍ରବ୍ୟ ମାମଲାରେ ଜଡିତ ଅଛନ୍ତି ଏବଂ ଏହି ଘଟଣାକୁ ଇଣ୍ଡଷ୍ଟ୍ରି ପାଇଁ ଏକ ବଡ଼ ଆଘାତ ବୋଲି ବିବେଚନା କରାଯାଉଛି ।
