ମହିଳାମାନେ ସବୁବେଳେ ନିଜ ଘର ଏବଂ ପରିବାରର ଦାୟିତ୍ୱ ବେଶ ପ୍ରଶଂସନୀୟ ଭାବରେ ତୁଲାଇଥାନ୍ତି । କିନ୍ତୁ ଯେତେବେଳେ ସେମାନଙ୍କ ସ୍ୱାସ୍ଥ୍ୟର କଥା ଆସେ, ସେମାନେ ପ୍ରାୟତଃ ଏହାକୁ ଅବହେଳା କରନ୍ତି । ଯାହାଦ୍ୱାରା ସାଧରଣତଃ ମହିଳାମାନେ ବିଭିନ୍ନ ରୋଗର ଶିକାର ହୋଇଥାନ୍ତି । ଅନେକ ସମୟରେ, ସେମାନେ ଅନେକ ରୋଗର ଲକ୍ଷଣ ଅନୁଭବ କରନ୍ତି କିନ୍ତୁ ସେମାନେ ସେଗୁଡ଼ିକୁ ସାମାନ୍ୟ ସମସ୍ୟା ଭାବି ଧ୍ୟାନ ଦିଅନ୍ତି ନାହିଁ କିନ୍ତୁ ପରବର୍ତ୍ତୀ ସମୟରେ ଏହି ସବୁ ରୋଗ ସେମାନଙ୍କ ପାଇଁ ଅତ୍ୟନ୍ତ ଭୟଙ୍କର ସାବ୍ୟସ୍ତ ହୋଇଥାଏ । ତେବେ ଆଜି ଆସନ୍ତୁ ମହିଳାମାନଙ୍କଠାରେ ଥିବା “ସାଇଲେଣ୍ଟ କିଲର୍” ରୋଗଗୁଡିକ ବିଷୟରେ ଜାଣିବା ।
ମହିଳାମାନଙ୍କଠାରେ ଏହି ରୋଗଗୁଡ଼ିକ ଦ୍ରୁତ ଗତିରେ ବୃଦ୍ଧି ପାଉଛି:
ରକ୍ତହୀନତା: ଶରୀରରେ ଲୋହିତ ରକ୍ତ କଣିକାର ଅଭାବ ହେତୁ ରକ୍ତହୀନତା ହୁଏ । ଏହା ମହିଳାମାନଙ୍କଠାରେ ଅଧିକ ଦେଖାଯାଏ । ଏହି ଅବସ୍ଥା ଥକ୍କାପଣ, ନିଶ୍ୱାସ ନେବାରେ କଷ୍ଟ, ମୁଣ୍ଡ ବିନ୍ଧା ତଥା ମୁଣ୍ଡ ବୁଲାଇବା ଏବଂ ଦ୍ରୁତ ହୃଦସ୍ପନ୍ଦନ ସୃଷ୍ଟି କରେ । ରକ୍ତହୀନତା ରୋକିବା ପାଇଁ, ଆଇରନ, ଭିଟାମିନ୍ ସି ଏବଂ ଫୋଲେଟ୍ ଯୁକ୍ତ ଖାଦ୍ୟ ଖାଆନ୍ତୁ ।
ସ୍ତନ କର୍କଟ: ମହିଳାମାନଙ୍କ ମଧ୍ୟରେ ସ୍ତନ କର୍କଟ ଏକ ଗମ୍ଭୀର ଏବଂ ଦ୍ରୁତ ଗତିରେ ବୃଦ୍ଧି ପାଉଥିବା ସ୍ୱାସ୍ଥ୍ୟ ସମସ୍ୟା । ଆଉ ଏହି ରୋଗ ବିଷୟରେ ବିଳମ୍ୱରେ ଜାଣିବା ଏହାର ଗମ୍ଭୀରତାକୁ ଆହୁରି ବାଢ଼ିଦେଇଥାଏ । ଏହା ସେତେବେଳେ ଘଟେ ଯେତେବେଳେ ସ୍ତନ କୋଷଗୁଡ଼ିକ ଅନିୟନ୍ତ୍ରିତ ଭାବରେ ବୃଦ୍ଧି ପାଏ ଏବଂ ଟ୍ୟୁମର ଗଠନ କରେ । ପ୍ରାରମ୍ଭିକ ସମୟରେ ଏହି ରୋଗ ଚିହ୍ନଟ ହେବା ଦ୍ୱାରା ଆରୋଗ୍ୟ ହେବାର ସମ୍ଭାବନା ୯୫% ପର୍ଯ୍ୟନ୍ତ ବୃଦ୍ଧି ପାଏ ଏବଂ ଶରୀରର ଅନ୍ୟ ଅଂଶକୁ କର୍କଟ ରୋଗ ବ୍ୟାପିବାରୁ ରୋକାଯାଇପାରେ ।
ହାଡ଼ ଦୁର୍ବଳ ହେବା: ଗର୍ଭାବସ୍ଥାରେ ଏବଂ ୩୦ ବର୍ଷ ବୟସ ପରେ ମହିଳାଙ୍କ ହାଡ଼ ଦୁର୍ବଳ ହେବା ଆରମ୍ଭ ହୁଏ । ହାଡ଼ ଶକ୍ତି ବଜାୟ ରଖିବା ପାଇଁ, ପର୍ଯ୍ୟାପ୍ତ ପରିମାଣରେ କ୍ୟାଲସିୟମ ସେବନ କରିବା ଏବଂ ବ୍ୟାୟାମ କରିବା ଗୁରୁତ୍ୱପୂର୍ଣ୍ଣ । ସୂର୍ଯ୍ୟ କିରଣ ସହିତ, କ୍ଷୀର, ଦହି କିମ୍ବା ପନିର ଭଳି କ୍ଷୀର ଉତ୍ପାଦକୁ କ୍ୟାଲସିୟମର ସର୍ବୋତ୍ତମ ଉତ୍ସ ଭାବରେ ବିବେଚନା କରାଯାଏ । ଏଥିପାଇଁ ଆପଣ ସୋୟା କ୍ଷୀର ମଧ୍ୟ ବାଛିପାରିବେ ।
PCOD : PCOD ଏକ ରୋଗ ନୁହେଁ, ବରଂ ଏକ ଜୀବନଶୈଳୀ ଡିଜିଜ । ଏହା ସାଧାରଣତଃ ହରମୋନ ଇମବାଲାନ୍ସ ହେତୁ ହୋଇଥାଏ, ଯାହା ସିଧାସଳଖ ପିରିୟଡ୍ସକୁ ପ୍ରଭାବିତ କରିଥାଏ । ଏଥିପାଇଁ ଅତ୍ୟଧିକ କେଶ ଝଡ଼ିବା ଏବଂ ମେଦବହୁଳତା ବୃଦ୍ଧି କରେ । ମୋଟାପଣ PCOD ର ସବୁଠାରୁ ସାଧାରଣ କାରଣ । PCOD ପୀଡିତ ମହିଳାମାନେ ଶୀଘ୍ର ଗର୍ଭଧାରଣ କରିପାରନ୍ତି ନାହିଁ । ଏପରି ପରିସ୍ଥିତିରେ, ଆପଣ ଜୀବନଶୈଳୀରେ ପରିବର୍ତ୍ତନ ଆଣି ଏହାକୁ ନିୟନ୍ତ୍ରଣ କରିପାରିବେ ।
