Wednesday, November 18, 2026
19.9 C
Odisha

    ଆପଣଙ୍କ ଛୁଆ ମିଛ କହୁଛି କି? ତାକୁ କେମିତି ସୁଧାରିବେ ଜାଣନ୍ତୁ

    ଆଗକୁ ପଢନ୍ତୁ

    ପିଲାମାନେ କାହିଁକି ମିଛ କହନ୍ତି ଏବଂ ଏଥିପାଇଁ କ’ଣ କରିବା ଉଚିତ? ପିଲାମାନେ ପ୍ରଥମ ଥର ମିଛ କହିଲେ ଅନେକ ସମୟରେ ବାପା-ମା’ ବୁଝିପାରନ୍ତି ନାହିଁ ଯେ ତାଙ୍କ ସହ କିପରି କଥା ହେବେ। ଅନେକ ପିତାମାତା ତୁରନ୍ତ ରାଗିଯାଆନ୍ତି, ଗାଳିଗୁଲଜ କରନ୍ତି ଏବଂ ମିଛ କହିବା ଖରାପ ଅଭ୍ୟାସ ବୋଲି ବୁଝାନ୍ତି। କିନ୍ତୁ ଏହା ସତ୍ତ୍ୱେ ପିଲାମାନେ ମିଛ କହିବା ବନ୍ଦ କରନ୍ତି ନାହିଁ।

    ତେବେ ବିଶେଷଜ୍ଞଙ୍କ ଅନୁଯାୟୀ, ପ୍ରତ୍ୟେକ ମିଛ ପଛରେ ପିଲାର ଦୁଷ୍ଟାମି କିମ୍ବା ଭୁଲ୍ ଥାଏ ବୋଲି କୌଣସି ମାନେ ନାହିଁ। ପିଲାମାନେ କେବଳ ଭୟ ଯୋଗୁଁ ମିଛ କହନ୍ତି ଯେ ସେମାନଙ୍କ ବାପା-ମା’ ସେମାନଙ୍କ କଥା ବୁଝିବେ ନାହିଁ କିମ୍ବା ସିଧାସଳଖ ‘ନା’ କହିଦେବେ।

    ପିଲାମାନେ ମିଛ କହିବାର ୩ଟି ମୁଖ୍ୟ କାରଣ ଯଥା : –
    ୧. ପିଲାଙ୍କୁ ଲାଗେ ଯେ ଆପଣ ତାଙ୍କ ଭାବନାକୁ ବୁଝୁନାହାନ୍ତି
    କୈଶୋର ବୟସରେ ପିଲାମାନଙ୍କ ପାଇଁ ସାଙ୍ଗସାଥୀ ଏବଂ ସ୍କୁଲ ବହୁତ ଗୁରୁତ୍ୱପୂର୍ଣ୍ଣ ହୋଇଥାଏ। ସାଙ୍ଗମାନଙ୍କ ସହ ଝଗଡ଼ା ହେବା କିମ୍ବା ବୁଲିବାକୁ ନ ଡାକିବା ବାପା-ମା’ଙ୍କ ପାଇଁ ସାଧାରଣ କଥା ହୋଇପାରେ, କିନ୍ତୁ ପିଲାଟି ପାଇଁ ଏହା ବହୁତ ବଡ଼ କଥା।

    କ’ଣ କରିବେ: ପିଲାଟି ଆପଣଙ୍କ ପାଖକୁ ନିଜର ଅସୁବିଧା ନେଇ ଆସିଲେ, “ଏତିକି ସାନ କଥାରେ କାହିଁକି ଚିନ୍ତିତ ହେଉଛ?” ବୋଲି କହି ତାହାକୁ ଏଡ଼ାଇ ଦିଅନ୍ତୁ ନାହିଁ। ଧୈର୍ଯ୍ୟର ସହ ତାଙ୍କ କଥା ଶୁଣନ୍ତୁ ଏବଂ ତାଙ୍କ ମନର ଭାବନାକୁ ବୁଝିବାକୁ ଚେଷ୍ଟା କରନ୍ତୁ।

    ୨. ଭୁଲ୍ କିମ୍ବା ଖରାପ ରେଜଲ୍ଟର ଭୟ
    ଅନେକ ପିଲା ଭାବନ୍ତି ଯେ ଯଦି ସେମାନେ ନିଜର କୌଣସି ଭୁଲ୍ କିମ୍ବା ସ୍କୁଲ୍ ପରୀକ୍ଷାର ଖରାପ ରେଜଲ୍ଟ ବିଷୟରେ ସତ କହିବେ, ତେବେ ବାପା-ମା’ ଅତ୍ୟଧିକ ରାଗିଯିବେ। ଏହି ଭୟ ଯୋଗୁଁ ସେମାନେ କଥା ଲୁଚାଇବାକୁ କିମ୍ବା ମିଛ କହିବାକୁ ଚେଷ୍ଟା କରନ୍ତି।

    କ’ଣ କରିବେ: ଏପରି ପରିସ୍ଥିତିରେ ଗାଳି ନ କରି ଶାନ୍ତ ହୋଇ କଥା ହୁଅନ୍ତୁ। କେଉଁଠି ଭୁଲ୍ ହେଲା ଏବଂ ଆଗକୁ ଏହାକୁ କିପରି ସୁଧାରି ହେବ, ସେ ବିଷୟରେ ଆଲୋଚନା କରନ୍ତୁ। କମ୍ ମାର୍କ ଆସିବା କିମ୍ବା ଭୁଲ୍ ହେବା ଦ୍ୱାରା କେହି ଖରାପ ପିଲା ହୋଇଯାଏ ନାହିଁ, ଏହା ପିଲାକୁ ବୁଝାଇବା ଜରୁରୀ।

    ୩. ସବୁ କଥାରେ ‘ନା’ ଶୁଣିବାର ଅଭ୍ୟାସ
    କୈଶୋର ଅବସ୍ଥାରେ ପିଲାମାନେ ନୂଆ ନୂଆ ଜିନିଷ ଜାଣିବାକୁ ଏବଂ ନିଜେ କିଛି ନିଷ୍ପତ୍ତି ନେବାକୁ ଚାହାନ୍ତି। ଯଦି ବାପା-ମା’ ସେମାନଙ୍କ କଥା ନ ଶୁଣି ସବୁ କଥାରେ ସିଧାସଳଖ ‘ନା’ କହିଦିଅନ୍ତି, ତେବେ ପିଲାଙ୍କୁ ଲାଗେ ଯେ ସତ କହିବା ଦ୍ୱାରା କୌଣସି ଲାଭ ନାହିଁ।

    କ’ଣ କରିବେ: ସବୁ କଥାରେ ତୁରନ୍ତ ବାରଣ ନ କରି ପ୍ରଥମେ ପିଲାର କଥା ଶୁଣନ୍ତୁ। ଯଦି କୌଣସି କାମରେ ବିପଦ ଥାଏ, ତେବେ ତାହାକୁ କିପରି ସୁରକ୍ଷିତ ଭାବେ କରାଯାଇପାରିବ, ସେ ବିଷୟରେ ବୁଝାନ୍ତୁ।

    ନିୟନ୍ତ୍ରଣ ନୁହେଁ, ବିଶ୍ୱାସ ଦରକାର
    ଏକ୍ସପର୍ଟଙ୍କ ମତରେ, ପିଲାର ମିଛ କହିବା ଅଭ୍ୟାସ ଦୂର କରିବା ପାଇଁ ଅତ୍ୟଧିକ କଠୋର ହେବା ସଠିକ୍ ଉପାୟ ନୁହେଁ। ଏହାଠାରୁ ଅଧିକ ଜରୁରୀ ହେଉଛି ବିଶ୍ୱାସ। ପିଲାଟି ଯେପରି ଅନୁଭବ କରେ ଯେ ସେ ନିଜର ସମସ୍ୟା, ଭୁଲ୍ ଏବଂ ଭୟ ବିଷୟରେ ଘରେ ଖୋଲାଖୋଲି କଥା ହୋଇପାରିବ।

    ଆଗାମୀ ଥର ପିଲା ମିଛ କହିଲେ କେବଳ “କାହିଁକି ମିଛ କହିଲା?” ନ ଭାବି, “ଏହାକୁ ସତ କହିବାରେ କେଉଁ କଥାର ଭୟ ଥିଲା?” ସେ ବିଷୟରେ ଚିନ୍ତା କରନ୍ତୁ। ଘରେ ସ୍ନେହ ଏବଂ ବିଶ୍ୱାସର ପରିବେଶ ରହିଲେ ପିଲା ପାଇଁ ସତ କହିବା ସହଜ ହୋଇଥାଏ।

    ଅନ୍ୟାନ୍ୟ ଖବର

    ପାଣିପାଗ

    Odisha
    overcast clouds
    19.9 ° C
    19.9 °
    19.9 °
    60 %
    1.1kmh
    100 %
    Wed
    20 °
    Thu
    18 °
    Fri
    20 °
    Sat
    27 °
    Sun
    28 °

    ସମ୍ବନ୍ଧିତ