ଗଞ୍ଜାମ : ଇସ୍ତଫା ଦେଇଛନ୍ତି ଭୁବନେଶ୍ବର ଡିସିପି ଜଗମୋହନ ମୀନା । ଇସ୍ତଫା ପରେ ଜଗମୋହନ ମୀନାଙ୍କୁ ଝୁରୁଛନ୍ତି ଗଞ୍ଜାମବାସୀ । ୨୦୧୩ ବ୍ୟାଚର ଆଇପିଏସ ଅଫିସର ଜଗମୋହନ ମୀନା ନିଜ କାର୍ଯ୍ୟରୁ ଇସ୍ତଫା ଦେବା ପରେ ଏବେ ଚର୍ଚ୍ଚାର ବିଷୟ ପାଲଟିଛି । ସେ ଗଞ୍ଜାମରେ ଏସପି ଭାବେ ୨୦୨୩ ମସିହା ଜାନୁଆରୀ ମାସ ୮ରୁ ୨୦୨୪ ମସିହା ସେପ୍ଟେମ୍ବର ୩୦ ତାରିଖ ପର୍ଯ୍ୟନ୍ତ କାର୍ଯ୍ୟ କରିଥିଲେ l ତାଙ୍କ କାର୍ଯ୍ୟ ଦକ୍ଷତା, ଉତ୍ତମ ବ୍ୟବହାର, ଅପରାଧ ନିୟନ୍ତ୍ରଣର ଦକ୍ଷତାକୁ ଗଞ୍ଜାମ ପୋଲିସ ଜିଲ୍ଲାର ସମସ୍ତ ବର୍ଗର ଲୋକେ ମନେ ପକାଉଛନ୍ତି l ଚାକିରିରୁ ଇସ୍ତଫାକୁ ସହଜରେ ଗ୍ରହଣ କରିପାରୁନାହାନ୍ତି ଗଞ୍ଜାମବାସୀ ।
ଗଞ୍ଜାମ ପୋଲିସ ଜିଲ୍ଲାରେ ଏସପି ଭାବେ କାର୍ଯ୍ୟରେ ଯୋଗ ଦେବା ପର ଠାରୁ ପୋଲିସ ଉପରେ ସାଧାରଣ ଲୋକଙ୍କ ବିଶ୍ୱାସ ବଢ଼ି ଯାଇଥିଲା । ଲୋକଙ୍କ ସହ ସୁସମ୍ପର୍କ ରଖିବା ସହ ଅପରାଧ ନିୟନ୍ତ୍ରଣ ଦିଗରେ ତାଙ୍କ କାର୍ଯ୍ୟ ଦକ୍ଷତା ଗଞ୍ଜାମ ପୋଲିସ ଜିଲ୍ଲା ପାଇଁ ଏକ ସୁନାମ ଆଣି ଦେଇଥିଲା । ଚୋରି, ଡକାୟତି ଭଳି ବିଭିନ୍ନ ଅପରାଧ ଘଟିଲେ ସମ୍ପୃକ୍ତ ଅଭିଯୁକ୍ତଙ୍କୁ ଶୀଘ୍ର ଗିରଫ କରିବାରେ ସେ ସଫଳ ହୋଇପାରୁଥିଲେ । ଅଭିଯୋଗ ପାଇଁ ଆସୁଥିବା ପ୍ରତ୍ୟେକ ଲୋକଙ୍କ ସହ କଥା ହୋଇ ସେମାନଙ୍କ ଅଭିଯୋଗକୁ ଶୁଣିବା ସହ ସେମାନଙ୍କୁ ନ୍ୟାୟ ପ୍ରଦାନ କରିବାର ଆଗ୍ରହ ଦେଖି ଲୋକେ ପୋଲିସ ଉପରେ ବିଶ୍ୱାସ କରିପାରୁଥିଲେ । ଆମ ପୋଲିସ ସମିତି ଦ୍ୱାରା ବିଭିନ୍ନ ସାମାଜିକ କାର୍ଯ୍ୟ କରି ସେ ଗଞ୍ଜାମ ପୋଲିସ ଜିଲ୍ଲା ପାଇଁ ଗର୍ବ ଆଣିଥିଲେ । ନିଜର ଶାନ୍ତ, ସ୍ଵଭାଵ ବ୍ୟବହାର ଲାଗି ସେ ଜନ ସାଧାରଣଙ୍କ ଅତି ପ୍ରିୟ ଭାଜନ ହୋଇପାରିଥଲେ । ସେ ଗଞ୍ଜାମ ଜିଲ୍ଲାରୁ କଟକ ଡିସିପି ଭାବେ ବଦଳି ହୋଇ ଯିବା ବେଳେ ବହୁ ପୋଲିସ ଅଧିକାରୀଙ୍କ ଠାରୁ ଆରମ୍ଭ କରି ବହୁ ନେତା, ଜନତା ମାନେ ଭାବ ବିହ୍ଵଳ ହୋଇ ପଡ଼ିଥିଲେ।
