କଟକ: ମହିଳା ଆଇଆଇସି ବିୟୁଟି ମହାନ୍ତିଙ୍କ ମୃତ୍ୟୁକୁ ନେଇ ବଢ଼ୁଛି ସସପେନ୍ସ । ରହସ୍ୟ ଖୋଲିବ ପୋଷ୍ଟମୋର୍ଟମ ରିପୋର୍ଟ । ଶ୍ବାସରୁଦ୍ଧ ହୋଇ ତାଙ୍କର ଜୀବନ ଯାଇଛି ବୋଲି ସ୍ପଷ୍ଟ ହୋଇଛି । ଶରୀରରେ ଅନ୍ୟ କୌଣସି ବାହ୍ୟ ଆଘାତ ନାହିଁ । ଫାଉଲ ପ୍ଲେ ସମ୍ପର୍କରେ କୌଣସି ପ୍ରମାଣ ନାହିଁ । ତଥାପି ବିଶେଷଜ୍ଞଙ୍କ ମତ ନିଆଯିବ ବୋଲି କହିଛନ୍ତି ଡିସିପି । ଭିସେରା ରିପୋର୍ଟକୁ ଅପେକ୍ଷା କରାଯାଇଛି । ପରିବାର, ଥାନାରେ ଥିବା କର୍ମଚାରୀ ଓ ପରିଚିତ ଲୋକଙ୍କୁ ପଚରାଉଚୁରା କରାଯାଉଛି । କଟକ ଚଉଳିଆଗଞ୍ଜ ଥାନା ଆଇଆଇସି ବ୍ୟୁଟି ମହାନ୍ତିଙ୍କ ରହସ୍ୟଜନକ ମୃତ୍ୟୁ ଓଡ଼ିଶା ପୋଲିସ ବିଭାଗ ସମେତ ସାରା ରାଜ୍ୟରେ ଚାଞ୍ଚଲ୍ୟ ସୃଷ୍ଟି କରିଛି।
ଗତ ଜୁଲାଇ ୪ ତାରିଖରେ ଥାନା ପରିସରରେ ଥିବା ସରକାରୀ ବାସଭବନର ଶୌଚାଳୟରୁ ତାଙ୍କ ଝୁଲନ୍ତା ମୃତଦେହ ଉଦ୍ଧାର କରାଯାଇଥିଲା । ଏହି ସମ୍ବେଦନଶୀଳ ମାମଲାରେ ମୃତ୍ୟୁର ପ୍ରକୃତ କାରଣ ଖୋଜିବା ପାଇଁ ଏବେ ପୋଷ୍ଟମର୍ଟମ ରିପୋର୍ଟ ଉପରେ ସମସ୍ତଙ୍କ ନଜର ରହିଛି । ପୋଲିସ ପ୍ରାଥମିକ ସ୍ତରରେ ଏହାକୁ ମାନସିକ ଚାପ କିମ୍ବା ବ୍ୟକ୍ତିଗତ କାରଣରୁ ଜୀବନ ହାରିଥିବା ସନ୍ଦେହ କରୁଥିବା ବେଳେ, ବ୍ୟୁଟିଙ୍କ ପରିବାର ଲୋକେ ଏହାକୁ ଏକ ସୁଚିନ୍ତିତ ହତ୍ୟାକାଣ୍ଡ ବୋଲି ଅଭିଯୋଗ କରିଛନ୍ତି । ଶରୀରରେ ଥିବା କ୍ଷତ ଚିହ୍ନ ଏବଂ ମୃତ୍ୟୁର ପୂର୍ବ ଦିନ ଜଣେ ବ୍ୟକ୍ତିଙ୍କ ସହ ହୋଇଥିବା ପାଟିତୁଣ୍ଡକୁ ଆଧାର କରି ପରିବାର ପକ୍ଷରୁ ପୁନଃ-ପୋଷ୍ଟମର୍ଟମ ପାଇଁ ଦାବି ହୋଇଛି।
ଅପରପକ୍ଷରେ, ବିଜେଡି ପକ୍ଷରୁ କୋର୍ଟଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଏକ ନିରପେକ୍ଷ ସଂସ୍ଥା ଦ୍ୱାରା ଏହାର ତଦନ୍ତ ପାଇଁ ଦାବି କରାଯାଇଛି । କଟକ ଡିସିପିଙ୍କ ନେତୃତ୍ୱରେ ଏକ ସ୍ୱତନ୍ତ୍ର ଟିମ୍ ସାଇଣ୍ଟିଫିକ୍ ଦଳ, ସିସିଟିଭି ଫୁଟେଜ୍, ମୋବାଇଲ୍ ଚାଟ୍ SFSL କୁ ପଠାଯାଇଛି । ଆର୍ଥିକ ଦିଗକୁ ନେଇ ମଧ୍ୟ ତଦନ୍ତ ଚାଲିଛି । ବ୍ୟାଙ୍କ୍ ଗୁଡିକୁ ଏଥିପାଇଁ ତଥ୍ୟ ମଗାଯାଇଛି । ଘଟଣାସ୍ଥଳରୁ କୌଣସି ସୁଇସାଇଡ୍ ନୋଟ୍ ମିଳିନାହିଁ । ଯେକୌଣସି ଅସ୍ୱାଭାବିକ କିମ୍ବା ସନ୍ଦେହଜନକ ମୃତ୍ୟୁ କ୍ଷେତ୍ରରେ ମୃତଦେହ ବ୍ୟବଚ୍ଛେଦ ବାଧ୍ୟତାମୂଳକ । ବେକରେ ଥିବା ଦାଗରୁ ଜଣାପଡ଼ିବ ଯେ ଏହା ଏହି ମୃତ୍ୟୁ ଶ୍ୱାସରୁଦ୍ଧ ନା କେହି ଗଳା ଚିପି ହତ୍ୟା କରିବା ପରେ ମୃତଦେହକୁ ଝୁଲାଇ ଦେଇଛି ।
ଜୀବନ ହାରିଲେ ବେକର ଦାଗ ସାଧାରଣତଃ ଉପରମୁଖା ହୋଇଥାଏ, କିନ୍ତୁ ହତ୍ୟା କ୍ଷେତ୍ରରେ ଏହା ସମାନ୍ତରାଳ ବା ପଛପଟକୁ ହୋଇଥାଏ । ବେକର ହାଡ଼ ଭାଙ୍ଗିଛି କି ନାହିଁ, ଶରୀରରେ ଥିବା କଳା ଦାଗଗୁଡ଼ିକ ଆଘାତ ଜନିତ କିମ୍ବା ମୃତ୍ୟୁ ଆତ୍ମରକ୍ଷା ପାଇଁ ଲଢ଼େଇ କରିବା ବେଳର କି ନାହିଁ ତାହା ମେଡିକାଲ୍ ରିପୋର୍ଟରୁ ସ୍ପଷ୍ଟ ହେବ । ଶବ ବ୍ୟବଚ୍ଛେଦ ଦ୍ୱାରା ମୃତ୍ୟୁର ଆନୁମାନିକ ସମୟ ଜଣାପଡ଼ିବ, ଯାହାକୁ ପୋଲିସ ସିସିଟିଭି ଏବଂ ଫୋନ୍ କଲ୍ ଟାଇମଲାଇନ୍ ସହ ମିଳାଇ ଦେଖିପାରିବ ।
ପୋଷ୍ଟମର୍ଟମ ରିପୋର୍ଟ କେବଳ ଡାକ୍ତରୀ ଏବଂ ବୈଜ୍ଞାନିକ ପ୍ରମାଣ ଦେଇଥାଏ ଏହା ନିଜେ ସମ୍ପୂର୍ଣ୍ଣ ଆଦେଶ ନୁହେଁ । ମାମଲାର ପୂରା ସତ୍ୟ ପଦାକୁ ଆଣିବା ପାଇଁ ଏହି ରିପୋର୍ଟ ସହିତ ଡିଜିଟାଲ୍ ଫୋରେନସିକ୍, ପାରିପାର୍ଶ୍ୱିକ ସ୍ଥିତି ଏବଂ ସାକ୍ଷୀମାନଙ୍କ ବୟାନର ସମନ୍ୱୟ ଆବଶ୍ୟକ । ରିପୋର୍ଟ ଆସିବା ପରେ ତଦନ୍ତକୁ ଏକ ନୂଆ ଦିଗ ଦେବ। ବ୍ୟୁଟି ମହାନ୍ତି ଜଣେ କର୍ତ୍ତବ୍ୟନିଷ୍ଠ, ହସମୁଖ ଏବଂ ଲୋକଙ୍କ ସମସ୍ୟା ସମାଧାନ କରୁଥିବା ଦକ୍ଷ ପୋଲିସ ଅଧିକାରୀ ଥିଲେ ।.
