ଭୁବନେଶ୍ୱର : ବଦଳିଲା ପଞ୍ଚାୟତ ନିର୍ବାଚନ ସମୟ । ଏଥର ସାମାନ୍ୟ ବିଳମ୍ବ ହେବ ନିର୍ବାଚନ । ଏସଆଇଆର କାମ ମାର୍ଚ୍ଚ ପ୍ରଥମ ସପ୍ତାହ ଯାଏଁ ହେବ । ୨୦୨୭ ଏପ୍ରିଲ୍-ମେ’ ମାସରେ ହୋଇପାରେ ଭୋଟ୍। ସ୍ପଷ୍ଟ କଲେ ରାଜ୍ୟ ନିର୍ବାଚନ କମିଶନଙ୍କ ସଚିବ ସନ୍ତୋଷ କୁମାର ଦାସ । ଓଡ଼ିଶା ପଞ୍ଚାୟତ ନିର୍ବାଚନକୁ ନେଇ ଆଜି ଏକ ଗୁରୁତ୍ୱପୂର୍ଣ୍ଣ ଅପଡେଟ୍ ସାମ୍ନାକୁ ଆସିଛି । ଆଗାମୀ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ୨୦୨୭ ମସିହା ଏପ୍ରିଲ୍ କିମ୍ବା ମେ’ ମାସରେ ଅନୁଷ୍ଠିତ ହୋଇପାରେ । ଆଜି ରାଜ୍ୟ ନିର୍ବାଚନ କମିଶନଙ୍କ ସଚିବ ଏହି ବିଷୟରେ ସ୍ପଷ୍ଟ ସୂଚନା ଦେଇଛନ୍ତି । ଗତ ୨୦୨୨ ଫେବୃଆରୀରେ ପଞ୍ଚାୟତ ଭୋଟ୍ ହୋଇଥିବାରୁ, ଏଥର ୨୦୨୭ ଫେବୃଆରୀରେ କରାଯିବା ନେଇ ଆଲୋଚନା ହେଉଥିଲା।
ମାତ୍ର ବର୍ତ୍ତମାନର ସାଙ୍ଗଠନିକ ପ୍ରସ୍ତୁତି ଓ ନିୟମିତ ପ୍ରକ୍ରିୟାକୁ ଦୃଷ୍ଟିରେ ରଖି ଏହି ସମୟସୀମାକୁ ସାମାନ୍ୟ ଆଗକୁ ବଢ଼ାଯାଇ ଏପ୍ରିଲ୍-ମେ’ ମାସରେ ଭୋଟ୍ ଗ୍ରହଣ କରାଯିବା ନେଇ ସଙ୍କେତ ମିଳିଛି। ଭାରତୀୟ ସମ୍ବିଧାନର ୭୩ତମ ସଂଶୋଧନ ଅନୁସାରେ ସ୍ଥାନୀୟ ସ୍ୱାୟତ୍ତ ଶାସନ ସଂସ୍ଥାଗୁଡ଼ିକର ନିର୍ବାଚନ ପରିଚାଳନା ପାଇଁ କିଛି ନିର୍ଦ୍ଦିଷ୍ଟ ନିୟମ ରହିଛି। ଧାରା ୨୪୩E ଅନୁଯାୟୀ ପ୍ରତ୍ୟେକ ପଞ୍ଚାୟତର କାର୍ଯ୍ୟକାଳ ପ୍ରଥମ ବୈଠକ ଦିନଠାରୁ ୫ ବର୍ଷ ପର୍ଯ୍ୟନ୍ତ ରହେ। ସାଧାରଣତଃ ଏହି ଅବଧି ଶେଷ ହେବା ପୂର୍ବରୁ ହିଁ ନୂତନ ନିର୍ବାଚନ ପ୍ରକ୍ରିୟା ଶେଷ କରିବାକୁ ପଡ଼ିଥାଏ।
ତେବେ କେତେକ ବିଶେଷ ପରିସ୍ଥିତି, ପ୍ରାକୃତିକ ବିପର୍ଯ୍ୟୟ, ଜନଗଣନା କିମ୍ବା ଭୋଟର ତାଲିକା ସଂଶୋଧନ ଭଳି ବଡ଼ ଧରଣର ପ୍ରଶାସନିକ ପ୍ରସ୍ତୁତି ପାଇଁ ଅଦାଲତ ଓ ସମ୍ବିଧାନ ସାମାନ୍ୟ କୋହଳ ସମୟ ସୀମା ପ୍ରଦାନ କରିଥାନ୍ତି। ସମ୍ବିଧାନର ଧାରା ୨୪୩K ଅନୁଯାୟୀ, ସ୍ୱାଧୀନ ଭାବେ ଭୋଟର ତାଲିକା ପ୍ରସ୍ତୁତ କରିବା ଏବଂ ସ୍ୱଚ୍ଛତାର ସହ ନିର୍ବାଚନ କରାଇବାର ସମ୍ପୂର୍ଣ୍ଣ ଅଧିକାର କମିଶନଙ୍କ ପାଖରେ ରହିଛି। ରାଜ୍ୟରେ ଏବେ ଚାଲିଥିବା ଭୋଟର ତାଲିକାର ବିଶେଷ ସଂଶୋଧନ ପ୍ରକ୍ରିୟା ମାଧ୍ୟମରେ ଲକ୍ଷ ଲକ୍ଷ ଅଯୋଗ୍ୟ ଭୋଟରଙ୍କ ନାମ କଟାଯିବା ସହ ନୂଆ ନାମ ଯୋଡ଼ା ଯାଉଛି।
ପଞ୍ଚାୟତ ନିର୍ବାଚନ ପାଇଁ ଘରକୁ ଘର ବୁଲି ସର୍ଭେ କାର୍ଯ୍ୟ ଏବଂ ଚୂଡ଼ାନ୍ତ ଭୋଟର ତାଲିକା ପ୍ରସ୍ତୁତିର ଲକ୍ଷ୍ୟଧାର୍ଯ୍ୟ ସମୟ ଓ ଜନଗଣନା ସମ୍ପର୍କିତ କାର୍ଯ୍ୟକୁ ଦୃଷ୍ଟିରେ ରଖି ନିର୍ବାଚନକୁ ୨୦୨୭ ଏପ୍ରିଲ୍ କିମ୍ବା ମେ’ ମାସରେ କରିବା ପାଇଁ ଯୋଜନା ପ୍ରସ୍ତୁତ କରାଯାଉଛି। ଏହି ନୂତନ ନିଷ୍ପତ୍ତି ଫଳରେ ରାଜ୍ୟ ପ୍ରଶାସନ ଏବଂ ନିର୍ବାଚନ କମିଶନଙ୍କୁ ଭୋଟର ତାଲିକାକୁ ଅଧିକ ସ୍ୱଚ୍ଛ ଓ ସଠିକ୍ କରିବାକୁ ପର୍ଯ୍ୟାପ୍ତ ସମୟ ମିଳିବ।
