ଆପଣ ମାନେ ଆଇରନ୍ କରୁଥିବା ସମୟରେ ଅନେକ ଥର ପୋଷାକ ନଷ୍ଟ ହୁଏ କିମ୍ବା କିଛି ସ୍ଥାନରେ ସଙ୍କୁଚିତ ହୁଏ, ପୋଷାକ ଉପରେ ଚିହ୍ନ ପଡ଼ିଯାଏ , କିମ୍ବା ଚମକ ଛାଡ଼ିଯାଏ। ପ୍ରକୃତରେ ସବୁ କପଡ଼ା ଭିନ୍ନ ଏବଂ ସେଗୁଡ଼ିକୁ ସମାନ ତାପମାତ୍ରାରେ ଆଇରନ୍ କରାଯାଇପାରିବ ନାହିଁ । ରେଶମ ବା ସିଲ୍କ , ନାଇଲନ୍ ଓ ପଶମ ବା ଉଲେନ୍ କପଡ଼ା ସାମାନ୍ୟ ଉତ୍ତାପରେ ମଧ୍ୟ ପୋଡ଼ିପାରେ । ଏମିତିବି କିଛି କପଡ଼ା ଅଛି ଯାହାକୁ ଆଇରନ୍ ଆବଶ୍ୟକ ହୁଏ ନାହିଁ ସେଗୁଡ଼ିକ ଏକ ହାଲୁକା ଷ୍ଟିମ୍ରେ ବହୁତ ଭଲ ଦେଖାଯାଏ । ତେବେ ଜାଣନ୍ତୁ ପୋଷାକ ଦୀର୍ଘ ସମୟ ପର୍ଯ୍ୟନ୍ତ ନୂଆ ଭଳି ଦେଖାଯିବା ପାଇଁ ଆପଣଙ୍କୁ ସେଗୁଡ଼ିକୁ କିପରି ଆଇରନ୍ କିମ୍ବା ଷ୍ଟିମ୍ କରିବାକୁ ପଡିବ। ପ୍ରତ୍ୟେକ କପଡ଼ା ଆଇରନ୍ ପାଇଁ ସୁରକ୍ଷିତ ନୁହେଁ । କିଛି କପଡ଼ା ଆଇରନ୍ର ଉଚ୍ଚ ତାପ ଦ୍ୱାରା କ୍ଷତିଗ୍ରସ୍ତ ହୋଇଥାଏ। ଏପରି ପୋଷାକକୁ ଆଇରନ୍ କରିବା ଉଚିତ୍ ନୁହେଁ । ଏଗୁଡ଼ିକୁ ଅତ୍ୟନ୍ତ ସତର୍କତାର ସହିତ ଆଇରନ୍ କରିବା ଉଚିତ୍ । କିଛି କପଡ଼ା ମଧ୍ୟ ଆଇରନ୍ କରିବା ଦ୍ଵାରା ନଷ୍ଟ ହୁଏ ସେଗୁଡ଼ିକ ହେଲା ସିଲ୍କ , ସିଫନ୍ , ଜର୍ଜେଟ୍ , ନାଇଲନ୍ , ପଲିଷ୍ଟର , ଉଲେନ୍ , ଲେଦର ଓ ରେକ୍ସିନ୍ । ଏଗୁଡ଼ିକୁ ସାମାନ୍ୟ ତାପମାତ୍ରାରେ ମଧ୍ୟ ଆଇରନ୍ କରିବା ଦ୍ଵାରା ଏହା ନଷ୍ଟ ହୋଇଯାଏ ।
ଏହିସବୁ ପୋଷାକରୁ କୁଞ୍ଚ ବା ଭାଙ୍ଗ ହଟାଇବା ପାଇଁ ଆପଣ ଷ୍ଟିମର ବ୍ୟବହାର କରି ପାରିବେ । ତେବେ ଜାଣନ୍ତୁ ଉଭୟ ଆଇରନ୍ ଓ ଷ୍ଟିମର ମଧ୍ୟରେ କ’ଣ ରହିଛି ପାର୍ଥକ୍ୟ ଏବଂ ଷ୍ଟିମରକୁ କିପରି ବ୍ୟବହାର କରିବେ । ଆଇରନ୍ ଏବଂ ଷ୍ଟିମର ଉଭୟକୁ ପୋଷାକରୁ ଭାଙ୍ଗ ଓ କୁଞ୍ଚ ଠିକ୍ କରିବା ପାଇଁ ବ୍ୟବହାର କରାଯାଏ । କିନ୍ତୁ ସେମାନଙ୍କର କାର୍ଯ୍ୟ ପଦ୍ଧତି ଭିନ୍ନ। ଆଇରନ୍ ଏକ ପାରମ୍ପରିକ ଯନ୍ତ୍ର ଯାହା ଏକ ଗରମ ପ୍ଲେଟ୍ ସହିତ ପୋଷାକ ଉପରେ ଚାପ ପ୍ରୟୋଗ କରି କୁଞ୍ଚ ହଟାଏ । କଟନ୍ ଏବଂ ଲିନେନ୍ ପରି ମୋଟା କପଡାରୁ ଭାଙ୍ଗ ହଟାଇବା ଏବଂ ଫର୍ମାଲ ଲୁକ୍ ପାଇଁ ଆଇରନ୍ ସର୍ବୋତ୍ତମ ଉପାୟ । ଆଇରନ୍ ମଧ୍ୟ ବିଭିନ୍ନ ପ୍ରକାରର , ଯଥା ; ଡ୍ରାଏ ଆଇରନ୍, ଷ୍ଟିମ୍ ଆଇରନ୍ ଏବଂ ଟ୍ରାଭେଲ୍ ଆଇରନ୍ ଇତ୍ୟାଦି ।ସେହିପରିକୁ ଷ୍ଟିମରକୁ ପୋଷାକରେ ନଲଗାଇ କ୍ରୀଙ୍କଲ୍ସ ବା ଭାଙ୍ଗ ହଟାଇବା ପାଇଁ ବ୍ୟବହାର କରାଯାଏ । ଷ୍ଟିମର ଦେଖିବାକୁ ହେୟାର ଡ୍ରାୟର ଭଳି । ଏହା ବିଶେଷକରି ସିଲ୍କ, ନାଇଲନ୍ ଏବଂ ଜର୍ଜେଟ୍ ପରି ସୂକ୍ଷ୍ମ କପଡା ପାଇଁ ଉପଯୁକ୍ତ । ବଜାରରେ ହ୍ୟାଣ୍ଡହେଲ୍ଡ, ଷ୍ଟାଣ୍ଡିଂ ଏବଂ ବୃତ୍ତିଗତ ଷ୍ଟିମର ଉପଲବ୍ଧ । ଏହାକୁ ବ୍ୟବହାର କରିବା ପାଇଁ ବୋର୍ଡ, ଖଟ କିମ୍ବା ଟେବୁଲ୍ର ଆବଶ୍ୟକ ହୁଏ ନାହିଁ । ପୋଷାକକୁ ଆପଣ କୌଣସି ମଧ୍ୟ ସ୍ଥାନରେ ପରଦା ଭଳି ଟାଙ୍ଗି ବ୍ୟବହାର କରାଯାଇପାରିବ । ଷ୍ଟିମର ଆଇରନ୍ ତୁଳନାରେ ଜଲ୍ଦି କାମ କରେ । ଏହାକୁ ବ୍ୟବହାର କରିବା ଦ୍ଵାରା କପଡ଼ା ନଷ୍ଟ ମଧ୍ୟ ହୁଏ ନାହିଁ । ଏହାକୁ ବ୍ୟବହାର କରିବା ଦ୍ଵାରା କପଡ଼ାରୁ ଦୁର୍ଗନ୍ଧ ମଧ୍ୟ ଦୂର ହୁଏ । ଏହାକୁ ଆପଣ ସୋଫା ପାଇଁ ମଧ୍ୟ ବ୍ୟବହାର କରି ପାରିବେ । ଟ୍ରାଭେଲ ସମୟରେ ଅତି ସହଜରେ ନେଇ ପାରିବେ । ଯଦି ଆପଣଙ୍କୁ ଶୀଘ୍ର କାମ କିମ୍ବା ବୈଠକ ପାଇଁ ଯିବାକୁ ପଡ଼େ ତେବେ କେବଳ ହାଲୁକା କୁଞ୍ଚନ ଦୂର କରିବାକୁ ଷ୍ଟିମର ସର୍ବୋତ୍ତମ । ହ୍ୟାଣ୍ଡହେଲ୍ଡ ମଡେଲ୍ ଷ୍ଟିମରଗୁଡ଼ିକ ଛୋଟ ଏବଂ କମ୍ ସ୍ଥାନ ନେଇଥାଏ ତେଣୁ ଏହାକୁ ରଖିବା ପାଇଁ ଅଧିକ ଜାଗାର ଆବଶ୍ୟକ ନାହିଁ ଏବଂ ଟ୍ରାଭେଲ୍ ପାଇଁ ଏହା ସବୁଠୁ ଭଲ । ଷ୍ଟିମର ଶୀଘ୍ର ଗରମ ହୋଇଯାଏ ତେଣୁ ଆଇରନ୍ ଅପେକ୍ଷା ଏହା ଦୀର୍ଘ ସମୟ ମଧ୍ୟରେ କମ୍ ବିଦ୍ୟୁତ୍ ଶକ୍ତି ବ୍ୟବହାର କରେ । ଷ୍ଟିମରରେ ପୋଷାକ ପୋଡ଼ିଯିବା କିମ୍ବା କ୍ଷତି ହେବାର ଆଶଙ୍କା ନଥାଏ । ତଥାପି, ଷ୍ଟିମ କରିବା ପୂର୍ବରୁ ପୋଷାକ ଲେବଲରେ ଥିବା ନିର୍ଦ୍ଦେଶାବଳୀ ନିଶ୍ଚିତ ପଢନ୍ତୁ । ଆଇରନ୍ ପ୍ରାୟ ₹୩୦୦ ରୁ ଆରମ୍ଭ ହୁଏ କିନ୍ତୁ ଷ୍ଟିମରଗୁଡ଼ିକ ₹୧୦୦୦ ରୁ ₹୫୦୦୦ ପର୍ଯ୍ୟନ୍ତ ହୋଇଥାଏ । ଷ୍ଟିମରଗୁଡ଼ିକ ସାଧାରଣତଃ ଆଇରନ୍ ଅପେକ୍ଷା ଟିକିଏ ମହଙ୍ଗା ହୋଇଥାଏ ।
