ଗଡିଲା ନନ୍ଦିଘୋଷ ରଥ

ପୁରୀ : ଆଜି ସକାଳ ୯ଟା ୩୦ମିନିଟରେ ପୁଣି ଆରମ୍ଭ ହେଲା ରଥଟଣା । ଗତକାଲି ଗୁଣ୍ଡିଚା ଯାତ୍ରାରେ ମାତ୍ର ୧୦୦ମିଟର ଗଡିଥିଲା ମହାପ୍ରଭୁ ଶ୍ରୀଜଗନ୍ନାଥଙ୍କ ରଥଟଣା । ରାତି ୭ଟା ୪୬ମିନିଟରେ ନନ୍ଦିଘୋଷ ପାହୁଣ୍ଡେ ଗଡି ଅଟକି ରହିଥିଲା । ପରେ ରଥଟଣାକୁ ବନ୍ଦ କରାଯାଇଥିଲା । ତିନି ରଥ ତିନୋଟି ସ୍ଥାନରେ ଅଟକି ରହିଥିଲେ । ଗୁଣ୍ଡିଚା ଯାତ୍ରାରେ ମହାପ୍ରଭୁଙ୍କ ରଥ ଅଟକି ଯାଇଥିଲା । ମାନ ଅଭିମାନ ଭୁଲି ମନୁଆ ଠାକୁର ଶେଷରେ ମାନିଛନ୍ତି ଏବଂ ଅନୁମତି ଦେଇଛନ୍ତି ରଥକୁ ଆଗକୁ ନେବା ପାଇଁ । ଘଣ୍ଟ ଘଣ୍ଟା, ଶଙ୍ଖ ନାଦରେ କମ୍ପି ଉଠିଛି ବଡଦାଣ୍ଡ । ଏହାପରେ ଗଡିଛି ମହାପ୍ରଭୁଙ୍କ ନନ୍ଦିଘୋଷ ରଥ । ଆଜି ନିର୍ଦ୍ଧାରିତ ସମୟରେ ରଥଟଣା ଆରମ୍ଭ ହୋଇଛି । ବଡ ଠାକୁରଙ୍କ ରଥ ବଳଗଣ୍ଡି ଓ ଦେବୀ ସୁଭଦ୍ରାଙ୍କ ରଥ ମରୀଚିକୋଟ ଛକରୁ ଆଗେଇ ଚାଲିଥିବା ବେଳେ ପଛରେ ଆସୁଛନ୍ତି କାଳିଆ ସାଆନ୍ତ ।