ସମ୍ବଲପୁର : ସମ୍ବଲପୁର ତଥା ପଶ୍ଚିମ ଓଡିଶାର ଜଣାଶୁଣା ଶିଳ୍ପପତି ଜଶବୀର ସିଂହ ହୁରାଙ୍କୁ ଟାଇମ୍ସ ବିଜନେସ ଆୱାର୍ଡ ରାଜଧାନୀ ଭୁବନେଶ୍ୱର ଠାରେ ପ୍ରଦାନ କରାଯାଇଛି । ରାଜଧାନୀ ଭୁବନେଶ୍ୱର ଠାରେ ଆୟୋଜିତ ଟାଇମ୍ସ ବିଜନେସ ଆୱାର୍ଡ ର ଏକ ସମାରୋହରେ ଏହି ‘ଲାଇଫ ଆଚିଭମେନ୍ଟ ଆୱାର୍ଡ’ ଶ୍ରୀ ହୁରାଙ୍କୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ପ୍ରଦାନ କରିଛନ୍ତି । ସମ୍ବଲପୁର ତଥା ପଶ୍ଚିମ ଓଡିଶାରେ ଦୀର୍ଘ ଦଶନ୍ଧି ଧରି ବ୍ୟବସାୟ ଓ ସାମାଜିକ କ୍ଷେତ୍ରରେ ସାଧନା ପାଇଁ ଏହି ପୁରସ୍କାର ଶ୍ରୀ ହୁରାଙ୍କୁ ପ୍ରଦାନ କରାଯାଇଛି । ହୋଟେଲ, ଅଟୋ ମୋବାଇଲ, ଟାଉନସିପ ନିର୍ମାଣ ଆଦି ବିଭିନ୍ନ କ୍ଷେତ୍ରରେ ଶ୍ରୀ ହୁରା ଦୀର୍ଘ ଦଶନ୍ଧି ଧରି ସକ୍ରିୟ ରହିଛନ୍ତି । ସେ ସମ୍ବଲପୁରକୁ ପ୍ରଥମ ପଞ୍ଚ ତାରକା ହୋଟେଲ ଆଣିବା ପାଇଁ ଜାରି ପ୍ରୟାସର ନେତୃତ୍ୱ ନେଉଥିବା ବେଳେ ଏହା ଦ୍ୱାରା ଅଞ୍ଚଳର ଅର୍ଥନୈତିକ ଓ ପର୍ଯ୍ୟଟନ ସମ୍ଭାବନାକୁ ଆହୁରୀ ସଦୃଢ଼ କରିବ । ଶ୍ରୀ ହୁରା, ସମ୍ବଲପୁର ଚାମ୍ବର ଅଫ କମର୍ସର ଅଧ୍ୟକ୍ଷ, କୋଶଳ ବ୍ୟବସାୟୀ ସଂଘର ପ୍ରତିଷ୍ଠାତା ଅଧ୍ୟକ୍ଷ, ଓଡିଶା ଶିଖ ପ୍ରତିନିଧି ବୋର୍ଡର ପୁର୍ବତନ ସଭାପତି, ଗୁରୁ ନାନକ ପବ୍ଲିକ୍ ସ୍କୁଲ୍ ଅଧ୍ୟକ୍ଷ, ରେଳ ବୋର୍ଡ ର ଜେଡଆରୟୁସିସିର ସଦସ୍ୟ, ଲାୟନ୍ସ କ୍ଲବ୍ ର ପୂର୍ବତନ ଜିଲା ଗଭର୍ଣ୍ଣର ଏବଂ କ୍ରେଡାଇ, ସମ୍ୱଲପୁର ଏବଂ ପଶ୍ଚିମ ଓଡ଼ିଶା ହୋଟେଲ ଆସୋସିଏସନର ଚାର୍ଟର ସଭାପତି ଭାବରେ କାର୍ଯ୍ୟ କରିଛନ୍ତି ।
ପ୍ରତ୍ୟେକ ଭୂମିକାରେ,ସେ ନିରନ୍ତର ଭାବରେ ସମ୍ୱଲପୁର ଏବଂ ପଶ୍ଚିମ ଓଡ଼ିଶାକୁ ପ୍ରଥମ ସ୍ଥାନରେ ରଖିଛନ୍ତି ଏବଂ ତାଙ୍କର ଦୃଷ୍ଟିକୋଣ, ଅଖଣ୍ଡତା ଏବଂ ଅନ୍ତର୍ଭୁକ୍ତ ଆଞ୍ଚଳିକ ଅଭିବୃଦ୍ଧିର ଏକ ଐତିହ୍ୟ ସ୍ଥାପନ କରିଛନ୍ତି, ଯାହାକୁ ଯୁବ ପିଢ଼ି ପାଇଁ ପ୍ରେରଣାର ଉତ୍ସ ବୋଲି ଏହି ଆୱାର୍ଡ ତାଙ୍କୁ ଦିଆଯାଇଛି ବୋଲି ସମାରୋହରେ ସୁଚନା ଦିଆଯାଇଛି ।
