ଭୁବନେଶ୍ୱର : ପଶ୍ଚିମାଝଡ଼ ପ୍ରଭାବରେ ବର୍ଷା । ରାଜ୍ୟର ବିଭିନ୍ନ ସ୍ଥାନରେ ସ୍ବଳ୍ପରୁ ମଧ୍ୟମ ଧରଣର ବର୍ଷା ହେଉଛି। ବିଶେଷକରି ଉପକୂଳ ଓଡ଼ିଶାରେ ବଦଳିଛି ପାଗ । ଏଥର ଶୀତ ମଧ୍ୟ ପୂର୍ବ ବର୍ଷ ଅପେକ୍ଷା କମ ରହିବ ବୋଲି ସୂଚନା ଦେଇଛନ୍ତି ଆଇଏମଡି ଡିଜି ମୃତ୍ୟୁଞ୍ଜୟ ମହାପାତ୍ର । ଆଗକୁ ପାଗ ଶୁଖିଲା ରହିବ ଏବଂ ହାଲୁକା ଶୀତ ଅନୁଭୂତ ହେବ । ବର୍ଷାର ମାତ୍ରା ସଂପୂର୍ଣ୍ଣ କମିଯିବ ବୋଲି ସୂଚନା ଦେଇଛନ୍ତି IMD ଡିଜି । ନଭେମ୍ବର ଯାଇ ଡିସେମ୍ବର ପ୍ରଥମ ସପ୍ତାହ ସରିଗଲାଣି । ହେଲେ ରାଜ୍ୟରେ ଶୀତର ଦେଖା ନାହିଁ । ପ୍ରତିବର୍ଷ ଏହି ସମୟରେ ହାଡ଼ଭଙ୍ଗା ଶୀତ ଅନୁଭୂତ ହେଉଥିବାବେଳେ ଚଳିତବର୍ଷ ଉଭାନ ହୋଇଯାଇଛି ।
ଅନ୍ୟପଟେ ଆଜି ସକାଳେ କଟକ ଓ ଭୁବନେଶ୍ବରରେ ମଧ୍ୟମ ଧରଣର ବର୍ଷା ହୋଇଛି । ଏହାଛଡ଼ା ରାଜ୍ୟର ଆଉ କେତକ ଜିଲ୍ଲାରେ ବି ବର୍ଷା ହୋଇଥିବାର ସୂଚନା ରହିଛି। ପୁରୀ, ଖୋର୍ଦ୍ଧା, କଟକ, ଜଗତସିଂହପୁର, କେନ୍ଦ୍ରାପଡା, ଯାଜପୁର, ନୟାଗଡ଼, ଅନୁଗୁଳ, ଢେଙ୍କାନାଳ, ବାଲେଶ୍ବର ଏବଂ ଭଦ୍ରକରେ କୋହଲା ପାଗ ରହିଥିଲା ।
