ଇସଲାମାବାଦ : ପାକିସ୍ତାନରେ ଡବଲ ବ୍ଲାଷ୍ଟ । ଦକ୍ଷିଣ-ପଶ୍ଚିମ ଅଞ୍ଚଳରେ କିଛି ଘଣ୍ଟା ମଧ୍ୟରେ ଦୁଇଟି କାର୍ ବ୍ଲାଷ୍ଟରେ ଅତି କମରେ ଆଠ ଜଣ ପ୍ରାଣ ହରାଇଛନ୍ତି ଏବଂ ପ୍ରାୟ ଦୁଇ ଡଜନ ଆହତ ହୋଇଛନ୍ତି। ଅଧିକାରୀମାନେ ବିସ୍ଫୋରଣ ବିଷୟରେ ସୂଚନା ଦେଇଛନ୍ତି। ପୋଲିସ ଅଧିକାରୀ ଏଲାହି ବଖସ୍ କହିଛନ୍ତି ଯେ ପ୍ରଥମ ବିସ୍ଫୋରଣ ବେଲୁଚିସ୍ତାନ ପ୍ରଦେଶର ତୁର୍ବତ ଜିଲ୍ଲାରେ ହୋଇଥିଲା । ଏହି ଆକ୍ରମଣରେ ଦୁଇ ଜଣ ସୁରକ୍ଷା କର୍ମୀଙ୍କ ମୃତ୍ୟୁ ହୋଇଥିବା ବେଳେ ଏବଂ ୨୩ ଜଣ ଆହତ ହୋଇଛନ୍ତି। ଆଫଗାନ ସୀମା ନିକଟରେ ବିସ୍ଫୋରଣ କିଛି ଘଣ୍ଟା ପରେ, ଆଫଗାନ ସୀମା ନିକଟବର୍ତ୍ତୀ ଦକ୍ଷିଣ-ପଶ୍ଚିମ ସହର ଚମନରେ ଆଉ ଏକ କାର୍ ବୋମା ବିସ୍ଫୋରଣ ହୋଇଥିଲା, ଯେଉଁଥିରେ ଛଅ ଜଣଙ୍କର ମୃତ୍ୟୁ ହୋଇଥିଲା । ଏନେଇ ସରକାରୀ ପ୍ରଶାସକ ଇମତିଆଜ ଅଲି କହିଛନ୍ତି। ବିସ୍ଫୋରଣ ପାଇଁ କୌଣସି ଗୋଷ୍ଠୀ ଦାୟୀତ୍ୱ ନେଇ ନଥିଲେ ମଧ୍ୟ ସନ୍ଦେହ ପାକିସ୍ତାନୀ ତାଲିବାନ ଏବଂ ବାଲୁଚ୍ ବିଚ୍ଛିନ୍ନତାବାଦୀଙ୍କ ଉପରେ କରାଯାଉଛି । ଯେଉଁମାନେ ପ୍ରାୟତଃ ଅଞ୍ଚଳର ସୁରକ୍ଷା ବାହିନୀ ଏବଂ ସାଧାରଣ ଲୋକଙ୍କୁ ଟାର୍ଗେଟ କରନ୍ତି।
ଆଫଗାନିସ୍ତାନ ସୀମାରେଖା ଥିବା ପାକିସ୍ତାନର ଖାଇବର ପଖତୁନଖ୍ୱା ଏବଂ ବେଲୁଚିସ୍ତାନରେ ଆତଙ୍କବାଦୀ ଆକ୍ରମଣ ବୃଦ୍ଧି ପାଇଛି। ରିପୋର୍ଟ ଅନୁଯାୟୀ, ଜୁନ୍ ମାସରେ ପାକିସ୍ତାନରେ 78 ଟି ଆତଙ୍କବାଦୀ ଆକ୍ରମଣ ହୋଇଥିଲା। ବେଲୁଚିସ୍ତାନ ପ୍ରାୟ ଦୁଇ ଦଶନ୍ଧି ଧରି ଅଶାନ୍ତିର ସମ୍ମୁଖୀନ ହେଉଛି। ସ୍ଥାନୀୟ ଜାତିଗତ ବାଲୁଚିସ୍ତାନ ଗୋଷ୍ଠୀ ଏବଂ ଅନ୍ୟାନ୍ୟ ସହଯୋଗୀ ଦଳଗୁଡ଼ିକ ଅଭିଯୋଗ କରିଛନ୍ତି ଯେ ପାକିସ୍ତାନ ସରକାର ପ୍ରଦେଶର ଖଣିଜ ସମ୍ପଦର ଶୋଷଣ କରୁଛି। ଏନେଇ ବାଲୁଚିସ୍ତାନ ବିଦ୍ରୋହୀମାନେ ସମ୍ପ୍ରତି ପାକିସ୍ତାନୀ ସୁରକ୍ଷା ବାହିନୀକୁ ଟାର୍ଗେଟ କରି ଅନେକ ଘାତକ ଆକ୍ରମଣ କରିଛନ୍ତି।
ପାକିସ୍ତାନର ଖାଇବର ପଖତୁନଖ୍ୱାରେ 45 ଜଣ ଆତଙ୍କବାଦୀ ନିହତ ହୋଇଛନ୍ତି। ଏହି ଅପରେସନ୍ ସମୟରେ ପ୍ରାୟ 19 ଜଣ ସୈନିକ ମଧ୍ୟ ନିହତ ହୋଇଛନ୍ତି। ନିହତ ଆତଙ୍କବାଦୀମାନେ ତେହେରିକ-ଏ-ତାଲିବାନ୍ ପାକିସ୍ତାନ (TTP)ର ଥିଲେ। ଏହି ଅପରେସନ୍ ସମ୍ପର୍କରେ ପ୍ରଧାନମନ୍ତ୍ରୀ ଶାହବାଜ ସରିଫ କହିଛନ୍ତି ଯେ, ପାକିସ୍ତାନ ସମସ୍ତ ଶକ୍ତି ସହିତ ଆତଙ୍କବାଦ ବିରୋଧରେ ଲଢ଼ିବ।
