ଇସଲାମାବାଦ: ଜେଲରେ ଥିବା ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ୍ ଖାଁ ଶାହବାଜ ସରିଫଙ୍କ ସରକାର ସହ ଆଲୋଚନା କରିବାକୁ ମନା କରିଦେଇଛନ୍ତି। ଏହା ଦ୍ୱାରା ସରକାର ଏବଂ ଇମ୍ରାନଙ୍କ ଦଳ ପାକିସ୍ତାନ ତେହରିକ-ଏ-ଇନସାଫ (ପିଟିଆଇ) ମଧ୍ୟରେ ବୁଝାମଣା ହେବାର ସମ୍ଭାବନା ଶେଷ ହୋଇଯାଇଛି। ପିଟିଆଇ ନେତା ଉମର ଆୟୁବ ଖାନ୍ ଦଳ ଏବଂ ସରକାରଙ୍କ ମଧ୍ୟରେ ଆଲୋଚନା ଆରମ୍ଭ ହେବାର ସମ୍ଭାବନାକୁ ଅସ୍ୱୀକାର କରିଛନ୍ତି। ରବିବାର ଗଣମାଧ୍ୟମରେ ଏହି ସୂଚନା ଦିଆଯାଇଛି।ପିଟିଆଇ ନେତା ଆୟୁବ ଶନିବାର ଏକ ଚ୍ୟାନେଲରେ କହିଛନ୍ତି, ଆଲୋଚନାର ଅଧ୍ୟାୟ ଏବେ ବନ୍ଦ ହୋଇଯାଇଛି। ଆୟୁବ କହିଛନ୍ତି ଯେ ରାଜନୈତିକ ଆଲୋଚନା କେବଳ ଇଚ୍ଛା ଉପରେ ଆଧାରିତ ନୁହେଁ ବରଂ ଏକ ଦୃଢ଼ ପ୍ରତିବଦ୍ଧତା ଆବଶ୍ୟକ ଏବଂ ସରକାର ଏହା ପ୍ରଦର୍ଶନ କରିବାରେ ବିଫଳ ହୋଇଛନ୍ତି।
ଆଲୋଚନା ପାଇଁ ମେଣ୍ଟ ସରକାରଙ୍କ ଆଭିମୁଖ୍ୟକୁ ନିନ୍ଦା କରି ପିଟିଆଇର ଜଣେ ବରିଷ୍ଠ ନେତା କହିଛନ୍ତି ଯେ ତାଙ୍କ ଦଳର କମିଟି ସଦଭାବନାରେ ଆଲୋଚନା ଆରମ୍ଭ କରିଛି। ତେବେ ଅନ୍ୟ ପକ୍ଷ ସଦଭାବନା କିମ୍ବା ଇଚ୍ଛା ପ୍ରକାଶ କରିନଥିବାରୁ ଅଚଳାବସ୍ଥା ସୃଷ୍ଟି ହୋଇଛି ବୋଲି ସେ କହିଛନ୍ତି।
ପାକିସ୍ତାନ ସରକାରଙ୍କ ସହ ଆଲୋଚନା କରିବାକୁ ମନାକଲେ ଇମ୍ରାନ ଖାଁ
