ଜୀବନରେ ଅନେକ ସମୟରେ କଠିନ ପରିଶ୍ରମ କରିବା ସତ୍ତ୍ୱେ ଧନର ଅଭାବ ଲାଗି ରହେ। କାମରେ ବାରମ୍ବାର ବାଧା ଆସେ, ଏପରିକି ଆର୍ଥିକ ସଙ୍କଟର ମଧ୍ୟ ସାମ୍ନା କରିବାକୁ ପଡ଼େ । ତେବେ ବାସ୍ତୁ ଶାସ୍ତ୍ରରେ ଧନକୁ ଆକର୍ଷିତ କରିବା ଏବଂ ଦାରିଦ୍ର୍ୟ ଦୂର କରିବା ପାଇଁ ଅନେକ ସରଳ ଉପାୟ ବିଷୟରେ କୁହାଯାଇଛି । ସେହି ଉପାୟଗୁଡ଼ିକ ମଧ୍ୟରୁ ଫିଟିକିରି ବା Alum ଏକ ସହଜ ଏବଂ ଶସ୍ତା ଉପାୟ ବୋଲି ବିଶ୍ୱାସ କରାଯାଏ । ବାସ୍ତୁ ମତ ଅନୁସାରେ, ଫିଟକିରି ନକାରାତ୍ମକ ଶକ୍ତିକୁ ଦୂର କରିବା ସହ ଘରେ ସକାରାତ୍ମକ ପରିବେଶ ଏବଂ ସମୃଦ୍ଧି ଆଣିବାରେ ସହାୟକ ହୋଇଥାଏ ।
ବ୍ୟବସାୟ ଓ ଦୋକାନରେ ଲାଭ ପାଇଁ:
ଯଦି ଆପଣ ବ୍ୟବସାୟୀ ଏବଂ ଆପଣଙ୍କ ଦୋକାନକୁ ଗ୍ରାହକଙ୍କ ଆଗମନ କମିଯାଇଛି କିମ୍ବା ବ୍ୟବସାୟରେ ମାନ୍ଦାବସ୍ଥା ଦେଖାଦେଇଛି, ତେବେ ଫିଟିକିରିର ଏହି ଉପାୟ କରିପାରିବେ । ଏଥିପାଇଁ ଏକ କଳା ରଙ୍ଗର ସୂତା କପଡ଼ାରେ ଫିଟିକିରିର ଏକ ଖଣ୍ଡ ବାନ୍ଧି ଏହାକୁ ଦୋକାନ କିମ୍ବା ଅଫିସର ମୁଖ୍ୟ ଦ୍ୱାରରେ ଟାଙ୍ଗି ଦିଅନ୍ତୁ । ବାସ୍ତୁ ଅନୁସାରେ, ଏହା ନକାରାତ୍ମକ ଶକ୍ତିକୁ ଦୂରେଇ ରଖିବା ସହ ଗ୍ରାହକଙ୍କୁ ଆକର୍ଷିତ କରିଥାଏ ବୋଲି ବିଶ୍ୱାସ ରହିଛି । ଏହାଦ୍ୱାରା ବ୍ୟବସାୟରେ ଲାଭ ବଢ଼ିପାରେ ବୋଲି ମଧ୍ୟ ମାନ୍ୟତା ରହିଛି ।
ଘରର ଆର୍ଥିକ ଉନ୍ନତି ପାଇଁ:
ଘରର ଆଲମାରୀରେ ଟଙ୍କା ନ ରହିବା ଏକ ସାଧାରଣ ସମସ୍ୟା । ଏଥିରୁ ମୁକ୍ତି ପାଇଁ ଏକ ଛୋଟ ଲାଲ କପଡ଼ାରେ ଫିଟିକିରିର ଏକ ଛୋଟ ଖଣ୍ଡ ବାନ୍ଧି ତାହାକୁ ତିଜୋରୀ କିମ୍ବା ଧନ ରଖୁଥିବା ସ୍ଥାନରେ ରଖିପାରିବେ । ବାସ୍ତୁ ମାନ୍ୟତା ଅନୁସାରେ, ଏପରି କରିବା ଦ୍ୱାରା ଅନାବଶ୍ୟକ ଖର୍ଚ୍ଚ କମିଥାଏ ଏବଂ ଘରେ ଧନର ବରକତ ବଜାୟ ରହିଥାଏ ବୋଲି ବିଶ୍ୱାସ କରାଯାଏ ।
ପୋଛା ପାଣିରେ ଫିଟକିରି ମିଶାଇ ଦୂର କରନ୍ତୁ ନକାରାତ୍ମକତା:
ଘରେ ବାରମ୍ବାର ଝଗଡ଼ା ଏବଂ ଆର୍ଥିକ ବାଧାର ଏକ ବଡ଼ କାରଣ ହେଉଛି ନକାରାତ୍ମକ ପରିବେଶ ବୋଲି ବାସ୍ତୁରେ ମାନ୍ୟତା ରହିଛି । ଘରେ ନିୟମିତ ପୋଛା ଲଗାଇବା ସମୟରେ ପାଣିରେ ଏକ ଚାମଚ ଫିଟିକିରି ପାଉଡର୍ ଏବଂ ଅଳ୍ପ ସମୁଦ୍ର ଲୁଣ ମିଶାଇ ପାରିବେ । ବାସ୍ତୁ ଅନୁସାରେ, ଏହି ମିଶ୍ରଣ ଘରର ନକାରାତ୍ମକତା ଦୂର କରି ସକାରାତ୍ମକ ଶକ୍ତିର ସଞ୍ଚାର କରିବାରେ ସହାୟକ ହୁଏ ବୋଲି ବିଶ୍ୱାସ କରାଯାଏ। ଘରର ପରିବେଶ ସକାରାତ୍ମକ ହେଲେ ଆର୍ଥିକ ଉନ୍ନତିର ନୂଆ ସୁଯୋଗ ମିଳିଥାଏ ବୋଲି ବାସ୍ତୁ ମାନ୍ୟତା ରହିଛି।
କରଜ ଓ ଆର୍ଥିକ ସଙ୍କଟ ଦୂର ପାଇଁ:
ଯଦି ଆପଣ ଦୀର୍ଘ ସମୟ ଧରି କରଜରେ ପୀଡ଼ିତ କିମ୍ବା ଘରର ଆର୍ଥିକ ସ୍ଥିତି ଭଲ ନାହିଁ, ତେବେ ଫିଟିକିରିର ଆଉ ଏକ ଉପାୟ କରିପାରିବେ । ଏଥିପାଇଁ ଏକ କାଚ ପାତ୍ରରେ ଫିଟିକିରିର କିଛି ବଡ଼ ଖଣ୍ଡ ରଖି ଏହାକୁ ଘରର ଉତ୍ତର-ପୂର୍ବ କୋଣରେ ଏକ ସୁରକ୍ଷିତ ସ୍ଥାନରେ ରଖନ୍ତୁ । ପ୍ରତି ୧୫ ଦିନରେ ଥରେ ଫିଟିକିରିକୁ ବଦଳାଇ ଦିଅନ୍ତୁ । ବାସ୍ତୁ ମାନ୍ୟତା ଅନୁସାରେ, ଏହା ଘରର ଦାରିଦ୍ର୍ୟ ଏବଂ ନକାରାତ୍ମକତାକୁ ଶୋଷି ନେବା ସହ ଧନର ନୂଆ ଉତ୍ସ ସୃଷ୍ଟିରେ ସହାୟକ ହୁଏ ବୋଲି ବିଶ୍ୱାସ କରାଯାଏ ।
