ବିହାର ନିର୍ବାଚନ ସଫଳତା ପଛରେ ଧର୍ମେନ୍ଦ୍ରଙ୍କ ଭୂମିକା ନେଇ ରାଷ୍ଟ୍ରୀୟ ରାଜନୈତିକ ମଞ୍ଚରେ ଚର୍ଚ୍ଚା ବଢ଼଼ିଛି। ହରିଆଣା ବିଧାନସଭା ନିର୍ବାଚନ-୨୦୨୪ରେ ଦଳର ସଫଳତା ପରେ କ୍ରମାଗତ ଦ୍ୱିତୀୟ ଥର ବିଜେପିର ନିର୍ବାଚନ ପ୍ରଭାରୀ ଭାବେ ତାଙ୍କ ନେତୃତ୍ୱରେ ବିହାର ଭଳି ଦ୍ବିତୀୟ ବଡ଼ ରାଜ୍ୟରେ ଏନଡିଏର ଅଭୂତପୂର୍ବ ବିଜୟ ଘଟିଛି। ୨୦୧୭ରେ ଉତ୍ତରପ୍ରଦେଶର ପ୍ରଭାରୀ ଭାବେ ବିଜେପିକୁ ସଫଳତା ଦେଇସାରିଛନ୍ତି ଶ୍ରୀ ପ୍ରଧାନ। ୨୦୧୦ରେ ବିଜେପି ରାଷ୍ଟ୍ରୀୟ ସଭାପତି ନୀତିନ ଗଡ଼କରୀଙ୍କ ସମୟରେ ବିହାର ରାଜ୍ୟର ସଂଗଠନ ପ୍ରଭାରୀ ଭାବେ ସେ ନିଯୁକ୍ତି ପାଇଥିଲେ। ୨୦୧୪ ସାଧାରଣ ନିର୍ବାଚନରେ ତାଙ୍କର ପ୍ରମୁଖ ଭୂମିକା ରହିଥିଲା। ସେତେବେଳେ ବିହାରରୁ ଏନଡିଏର ୩୧ ଜଣ ସାଂସଦ ଜିତିଥିଲେ। ସେହିପରି ୨୦୧୫ରେ ରାଷ୍ଟ୍ରୀୟ ସଭାପତି ଅମିତ ଶାହାଙ୍କ ସମୟରେ ବିହାର ନିର୍ବାଚନ ପ୍ରଭାରୀ ଦାୟିତ୍ୱ ତୁଲାଇଥିଲେ। ୨୦୧୨-୧୮ ମଧ୍ୟରେ ବିହାରରୁ ରାଜ୍ୟସଭାକୁ ଶ୍ରୀ ପ୍ରଧାନ ପ୍ରତିନିଧିତ୍ୱ କରିଥିଲେ। ଏହି ସମୟ କାଳରେ ପ୍ରଥମ ଥର ପାଇଁ ତାଙ୍କୁ କେନ୍ଦ୍ର ମନ୍ତ୍ରିମଣ୍ଡଳରେ ସ୍ଥାନ ମିଳିଥିଲା। ପରବର୍ତ୍ତୀ ସମୟରେ ସେ ମଧ୍ୟପ୍ରଦେଶରୁ ରାଜ୍ୟସଭାକୁ ପ୍ରତିନିଧିତ୍ବ କରିଥିଲେ। ୨୦୨୧ ପଶ୍ଚିମବଙ୍ଗ ନିର୍ବାଚନରେ ସେ ବିରୋଧୀ ଦଳ ନେତା ଶୁଭେନ୍ଦୁ ଅଧିକାରୀଙ୍କ ପାଇଁ ରଣନୀତି କରି ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ନନ୍ଦିଗ୍ରାମ ଆସନରୁ ହରାଇବାର ମୁଖ୍ୟ ସୂତ୍ରଧର ଥିଲେ। କେବଳ ସେତିକି ନୁହେଁ; ବିଜେପି ପଶ୍ଚିମବଙ୍ଗରେ ୭୭ ଆସନରେ ବିଜୟୀ ହୋଇଥିଲା। ମୋଦୀ ଓ ଶାହାଙ୍କ ରଣନୀତିକୁ ତୃଣମୂଳ ସ୍ତରରେ ଉତ୍ତମ ଭାବେ କାର୍ଯ୍ୟକାରୀ କରିବାରେ ଧର୍ମେନ୍ଦ୍ରଙ୍କ ଭୂମିକା ତାଙ୍କ ରାଜନୀତିକ ପତିଆରା ବଢାଇଛି। ଆଗକୁ ପୁଣି ଆସୁଛି ପଶ୍ଚିମବଙ୍ଗ ନିର୍ବାଚନ। ହୁଏତ ଧର୍ମେନ୍ଦ୍ରଙ୍କୁ ଏଠାରେ ପୁଣି ବଡ଼ ଦାୟିତ୍ବ ମିଳିପାରେ।
ସମ୍ପ୍ରତି ଭାରତୀୟ ଜନତା ପାର୍ଟିର ପରବର୍ତ୍ତୀ ରାଷ୍ଟ୍ରୀୟ ସଭାପତି ପଦ ଦୌଡ଼ରେ ଶ୍ରୀ ପ୍ରଧାନଙ୍କ ନାଁକୁ ନେଇ ଚର୍ଚ୍ଚା ବଢିଛି। ବିହାର ନିର୍ବାଚନ ସଫଳତା ରାଷ୍ଟ୍ରୀୟ ରାଜନୀତିରେ ତାଙ୍କ ଗୁରୁତ୍ବ ଓ ପ୍ରଭାବକୁ ଅଧିକ ସଶକ୍ତ କରିଛି। ବିହାର ବିଜୟ ପୂର୍ବରୁ ସେ ଓଡ଼ିଶାରେ ବିଜେପିକୁ ପ୍ରଥମ ଥର ପାଇଁ ସରକାର ଗଠନରେ ସଫଳତା ଦେଇଥିବା ନେଇ ଆଲୋଚନା ହୁଏ। ୨୦୧୭ରେ ପଞ୍ଚାୟତ ନିର୍ବାଚନରେ ବିଜେପିକୁ ଉଲ୍ଲେଖନୀୟ ସଫଳତା ଦେବା ପଛରେ ଧର୍ମେନ୍ଦ୍ରଙ୍କ ରଣନୀତି ଥିଲା। ଏହି କ୍ରମାଗତ ନିର୍ବାଚନ ସଫଳତା ତାଙ୍କୁ ଦଳର ଶୀର୍ଷ ନେତୃତ୍ୱ ନିକଟରେ ଜଣେ ଅତ୍ୟନ୍ତ ବିଶ୍ୱସ୍ତ ତଥା ଦକ୍ଷ ନିର୍ବାଚନ ପରିଚାଳକର ପରିଚିତି ଦେଇଛି। ବିହାରରେ ଭୋଟ୍ ବ୍ୟାଙ୍କ ସହ ଯୋଡ଼ି ହେବା ଏବଂ ଗଠବନ୍ଧନ ସମୀକରଣକୁ ସୂକ୍ଷ୍ମ ଭାବେ ପରିଚାଳନା କରିବାର କ୍ଷମତା ପାଇଁ ସେ ପ୍ରଶଂସା ସାଉଁଟିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଗୃହମନ୍ତ୍ରୀ ଅମିତ ଶାହାଙ୍କ ସହ ତାଙ୍କର ଉତ୍ତମ ସମ୍ପର୍କ। ତାଙ୍କୁ ଜାତୀୟ ସ୍ତରରେ ବିଜେପିର ବଡ଼ ରଣନୀତିଗୁଡ଼ିକୁ କାର୍ଯ୍ୟକାରୀ କରିବାରେ ଏକ କେନ୍ଦ୍ରୀୟ ଚରିତ୍ର ଭାବରେ ଗୁରୁତ୍ୱ ଦେଇଛି। ନିଜେ ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ, ବିହାରର ଫଳ ଆଗାମୀ ପଶ୍ଚିମବଙ୍ଗ ନିର୍ବାଚନ ଉପରେ ବଡ଼ ପ୍ରଭାବ ପକାଇବ। ଏହା ତାଙ୍କର ପ୍ରାସଙ୍ଗିକତାକୁ ଆହୁରି ବଢ଼ାଇଛି। କାରଣ ସେ ବର୍ତ୍ତମାନ ଦଳର ରାଷ୍ଟ୍ରୀୟ ବିସ୍ତାର ଯୋଜନା ପାଇଁ ଜଣେ ଶ୍ରେଷ୍ଠ ରଣନୀତିକାର ଭାବେ ପରିଗଣିତ ହେଉଛନ୍ତି।
ବିଜୟ ପରେ ପ୍ରତିକ୍ରିୟା ଦେଇ ଶ୍ରୀ ପ୍ରଧାନ କହିଛନ୍ତି ଯେ, ଏନଡିଏକୁ ମିଳିଥିବା ଏହି ପ୍ରଚଣ୍ଡ ଜନାଦେଶ ହେଉଛି ପ୍ରଧାନମନ୍ତ୍ରୀ ମୋଦୀ ଏବଂ ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ନେତୃତ୍ୱରେ ଡବଲ ଇଞ୍ଜିନ ସରକାରର ଜନକଲ୍ୟାଣକାରୀ ନୀତିଗୁଡ଼ିକ ଉପରେ ସାଧାରଣ ଜନତାର ବଡ଼ ମୋହର। ବିହାରର ଜନତା ଜାତିବାଦ, ଜଙ୍ଗଲରାଜ, ପରିବାରବାଦ ଓ ନକାରାତ୍ମକ ରାଜନୀତିକୁ ସ୍ପଷ୍ଟ ପ୍ରତ୍ୟାଖାନ କରି ନିରନ୍ତର ପ୍ରଗତି ଏବଂ ବିକଶିତ ବିହାର ମାର୍ଗକୁ ବାଛିଛନ୍ତି ବୋଲି ଏହି ବିଜୟ ଦର୍ଶାଉଛି।
