ବିଶାଖାପାଟଣା : ଭାରତୀୟ ନୌସେନାରେ ସାମିଲ ହେଲା ଆଧୁନିକ ଜାହାଜ ତାରାଗିରି । ବିଶାଖାପାଟଣାରେ ଭବ୍ୟ କାର୍ଯ୍ୟକ୍ରମରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ମୁଖ୍ୟ ଅତିଥି ଭାବେ ଯୋଗ ଦେଇ ଆନୁଷ୍ଠାନିକ ଭାବେ ନୌସେନାରେ ତାରାଗିରିକୁ ସାମିଲ କରିଛନ୍ତି । ସଂପୂର୍ଣ୍ଣ ସ୍ବଦେଶୀ ଜ୍ଞାନକୌଶଳରେ ଏହାକୁ ନିର୍ମାଣ କରାଯାଇଛି ।
ଆଇଏନଏସ ତାରାଗିରି ଏକ ସ୍ବଦେଶୀ ଯୁଦ୍ଧପୋତ । ପ୍ରୋଜେକ୍ଟ ୧୭-ଏ ଅଧୀନରେ ନିର୍ମିତ ଏହି ୬ହଜାର ୬୭୦ ଟନର ବିଶାଳ ଯୁଦ୍ଧଜାହାଜଟି ସମ୍ପୂର୍ଣ୍ଣ ଭାବେ ମେକ୍ ଇନ୍ ଇଣ୍ଡିଆ ଅଭିଯାନର ଏକ ଉଦାହରଣ । ମୁମ୍ବାଇର ମାଝଗାଓଁ ଡକ୍ ଶିପ୍ ବିଲ୍ଡର୍ସ ଦ୍ୱାରା ନିର୍ମିତ ଏହି ଜାହାଜର ପ୍ରାୟ ୭୫ ପ୍ରତିଶତ ଅଂଶ ଓ ଯନ୍ତ୍ରପାତି ଭାରତରେ ନିର୍ମାଣ ହୋଇଛି । ତାରାଗିରି ଏଭଳି ଭାବେ ଡିଜାଇନ୍ ହୋଇଛି ଯେ, ଶତ୍ରୁ ପକ୍ଷର ରାଡାର୍ ଏହାକୁ ସହଜରେ ଧରିପାରିବେ ନାହିଁ ।
ଏଥିରେ ଶବ୍ଦଠାରୁ ଦ୍ରୁତ ଗତିରେ ଯାଉଥିବା ମିସାଇଲ୍, ଆକାଶ ମାର୍ଗକୁ ଲକ୍ଷ୍ୟ ଭେଦ କରୁଥିବା ମିସାଇଲ୍ ଏବଂ ବୁଡ଼ାଜାହାଜକୁ ଧ୍ୱଂସ କରିବା ଭଳି ଅତ୍ୟାଧୁନିକ ଅସ୍ତ୍ର ରହିଛି । ଏହା କେବଳ ଯୁଦ୍ଧ ପାଇଁ ନୁହେଁ, ବରଂ ସମୁଦ୍ରରେ ବିପତ୍ତି ସମୟରେ ମାନବୀୟ ସହାୟତା ଓ ଉଦ୍ଧାର କାର୍ଯ୍ୟରେ ମଧ୍ୟ ବ୍ୟବହାର କରାଯାଇପାରିବ । ସ୍ବଦେଶୀ ନିର୍ମିତ ଏବଂ ଭାରତୀୟଙ୍କ ଦ୍ୱାରା ପରିଚାଳିତ ତାରାଗିରି ଜାହାଜ ଆଗାମୀ ଦିନରେ ସାମୁଦ୍ରିକ ସୀମାକୁ ସୁରକ୍ଷିତ ରଖିବାରେ ଏକ ବଡ଼ ଭୂମିକା ଗ୍ରହଣ କରିବ ।
