କଥାରେ ଅଛି ପୁଅ ଏବଂ ଝିଅ ମଧ୍ୟରେ କୌଣସି ପାର୍ଥକ୍ୟ ନାହିଁ । ଯଦି ଝିଅ ପାଠପଢ଼ି ସକ୍ଷମ ହୁଏ, ତେବେ ସେ ପୁରୁଣା ସମୟର ଶିକୁଳିରୁ ମୁକ୍ତ ହେବ । ମୁକ୍ତ ଜୀବନ ବଞ୍ଚିପାରିବ । ଆଜି ମଧ୍ୟ ସମାଜରେ ଏପରି ଘଟଣା ଘଟୁଛି ଯାହା ହୃଦୟକୁ ବିଚଳିତ କରିଦିଏ । ଏଭଳି ଏକ ଘଟଣା ଘଟିଛି ଦକ୍ଷିଣ ବେଙ୍ଗାଲୁରୁରେ । ମଙ୍ଗଳବାର ରାତିରେ ଜଣେ ୨୭ ବର୍ଷୀୟ ସଫ୍ଟୱେର୍ ଇଞ୍ଜିନିୟରଙ୍କ ମୃତଦେହ ତାଙ୍କ ଘରେ ମିଳିଛି । ତାଙ୍କ ବାପାମାଆ ପୋଲିସରେ ଅଭିଯୋଗ କରିଛନ୍ତି ଯେ ଯୌତୁକ ପାଇଁ ନିରନ୍ତର ନିର୍ଯାତନା ଯୋଗୁଁ ତାଙ୍କ ଝିଅ ଜୀବନ ହାରି ଦେଇଛି ।
ସୂଚନାନୁସାରେ ଶିଳ୍ପା ପ୍ରାୟ ଅଢ଼େଇ ବର୍ଷ ପୂର୍ବରୁ ପ୍ରବୀଣଙ୍କୁ ବିବାହ କରିଥିଲେ । ସେ ପୂର୍ବରୁ ଜଣେ ସଫ୍ଟୱେର୍ ଇଞ୍ଜିନିୟର ଥିଲେ ଏବଂ ସେମାନଙ୍କର ଏକ ବର୍ଷ ଛଅ ମାସର ଏକ ସନ୍ତାନ ମଧ୍ୟ ଅଛି । ଶିଳ୍ପା ଇଞ୍ଜିନିୟରିଂରେ ତାଙ୍କର ସ୍ନାତକ ସମାପ୍ତ କରିଥିଲେ ଏବଂ ବିବାହ ପୂର୍ବରୁ ଘରୋଇ ସଂସ୍ଥାରେ ସଫ୍ଟୱେର୍ ଇଞ୍ଜିନିୟର ଭାବରେ କାମ କରିଥିଲେ । ପ୍ରବୀଣ ମଧ୍ୟ ଜଣେ ସଫ୍ଟୱେର୍ ଇଞ୍ଜିନିୟର ଥିଲେ ଏବଂ ଓରାକେଲ୍ରେ କାମ କରୁଥିଲେ, କିନ୍ତୁ ବିବାହର ଗୋଟିଏ ବର୍ଷ ପରେ ସେ ଚାକିରି ଛାଡି ଏକ ଖାଦ୍ୟ ବ୍ୟବସାୟ ଆରମ୍ଭ କରିଥିଲେ ।
ଶିଳ୍ପାଙ୍କ ବାପା ଓ ମାଙ୍କ ଦ୍ୱାରା ଦାଖଲ ଅଭିଯୋଗ ଅନୁଯାୟୀ, ବିବାହ ସମୟରେ ପ୍ରବୀଣଙ୍କ ପରିବାର ୧୫ ଲକ୍ଷ ଟଙ୍କା ନଗଦ, ୧୫୦ ଗ୍ରାମ ସୁନା ଅଳଙ୍କାର ଏବଂ ଘରକରଣା ସାମଗ୍ରୀ ଦାବି କରିଥିଲେ । ଏହି ଦାବି ପୂରଣ କରିବା ସତ୍ତ୍ୱେ, ବିବାହ ପରେ ଶିଳ୍ପାଙ୍କ ଶ୍ୱଶୁର ଘର ଲୋକେ ସେମାନଙ୍କଠାରୁ ଅତିରିକ୍ତ ଟଙ୍କା ଏବଂ ମୂଲ୍ୟବାନ ଜିନିଷପତ୍ର ଦାବି କରିଥିଲେ । ପରିବାର ଦାବି କରିଛନ୍ତି ଯେ ଯୌତୁକ ପାଇଁ ବାରମ୍ବାର ତାଗିଦ ଏବଂ ମାନସିକ ନିର୍ଯାତନା ଯୋଗୁଁ ଶିଳ୍ପା ଜୀବନ ହାରିଦେଇଛନ୍ତି ।
ଶିଳ୍ପାଙ୍କ ପରିବାର ମଧ୍ୟ ଅଭିଯୋଗ କରିଛନ୍ତି ଯେ ତାଙ୍କ ଶରୀର ରଙ୍ଗ ପାଇଁ ତାଙ୍କୁ ଉପହାସ କରାଯାଇଥିଲା । ପୋଲିସ ଅଭିଯୋଗ ଅନୁଯାୟୀ, ଶାଶୁ କହିଥିଲେ, ତୁମେ କଳା ଏବଂ ମୋ ପୁଅ ପାଇଁ ଭଲ ମେଳ ଖାଉନାହଁ। ତାକୁ ଛାଡିଦିଅ, ଆମେ ତା ପାଇଁ ଜଣେ ଭଲ ଝିଅ ଖୋଜିବୁ ।
ଛଅ ମାସ ପୂର୍ବରୁ ପ୍ରବୀଣଙ୍କ ପରିବାର ବ୍ୟବସାୟରେ ସାହାଯ୍ୟ କରିବା ପାଇଁ ୫ ଲକ୍ଷ ଟଙ୍କା ଦାବି କରିଥିଲେ, ଯାହା ଶିଳ୍ପାଙ୍କ ପରିବାର ଶେଷରେ ଦେଇଥିଲେ । ପୋଲିସ ଯୌତୁକ ନିର୍ଯାତନା ଏବଂ ଅପ୍ରାକୃତିକ ମୃତ୍ୟୁ ମାମଲା ରୁଜୁ କରିଛି ଏବଂ ପ୍ରବୀଣଙ୍କୁ ପଚରାଉଚରା ପାଇଁ ଅଟକ ରଖାଯାଇଛି ।
ଜଣେ ସହାୟକ ପୋଲିସ କମିଶନର ସ୍ତରୀୟ ଅଧିକାରୀ ତଦନ୍ତର ନେତୃତ୍ୱ ନେଉଛନ୍ତି ଏବଂ ପୋଷ୍ଟମର୍ଟମ ପରେ ଶିଳ୍ପାଙ୍କ ମୃତଦେହକୁ ତାଙ୍କ ପିତାମାତାଙ୍କୁ ହସ୍ତାନ୍ତର କରାଯାଇଛି । ପିଡିତାଙ୍କ ପରିବାର ସମସ୍ତ ଅଭିଯୋଗ ଆଣିଛନ୍ତି । ସ୍ୱାମୀଙ୍କୁ ପଚରାଉଚରା କରାଯାଉଛି ଏବଂ ଅଭିଯୋଗର ସତ୍ୟତା ଜାଣିବାକୁ ଚେଷ୍ଟା କରୁଛୁ ବୋଲି କହିଛନ୍ତି ଜଣେ ପୋଲିସ ଅଧିକାରୀ ।
