ସାନ୍ଦୁଲନଦୀରେ ବୁଡ଼ି ବିଲାଟଗାଁର ୨ ବାଳିକା ମୃତ

ଭବାନୀପାଟଣା: କଳାହାଣ୍ଡି ଜିଲ୍ଲା ନର୍ଲା ବ୍ଲକ୍ ଅଧିନସ୍ଥ ରୁପ୍ରାରୋଡ ପଞ୍ଚାୟତର ବିଲାଟ ଗ୍ରାମରେ ମଙ୍ଗଳବାର ପୂର୍ବାହ୍ନରେ ଏକ ଅଭାବନୀୟ ଘଟଣା ଘଟିଛି । ସୂଚନା ମୁତାବକ ବିଲାଟ ଗ୍ରାମର ସନ୍ତୋଷ ହରିଜନଙ୍କ ଝିଅ ରିଙ୍କି ହରିଜନ (୧୬) ଓ ସୋନୁ ଦୁର୍ଗାଙ୍କ ନାବାଳିକା ଝିଅ ନୈନା ଦୁର୍ଗା (୧୭) ନିକଟସ୍ଥ ସାନ୍ଦୁଲ ନଦୀକୁ ଗାଧୋଇବାକୁ ଯାଇଥିଲେ । ଗାଧେଇବା ବେଳେ ସେମାନେ ଗଭୀର ପାଣିକୁ ଖସିଯାଇ ବୁଡ଼ି ଯାଇଥିଲେ । ଗାଁ ଲୋକେ ଖବର ପାଇ ନର୍ଲା ଦମକଳ କେନ୍ଦ୍ରକୁ ଜଣାଇ ଥିଲେ । ଦମକଳବାହିନୀ ପାଣି ଭିତରୁ ଦୁଇଜଣଙ୍କ ମୃତଦେହ ଉଦ୍ଧାର କରିଥିଲେ । ନର୍ଲା ପୁଲିସ ଦୁଇ ମୃତଦେହ ଜବତ କରି ନର୍ଲା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ନେଇଥିଲେ । ମୃତ ଦୁଇ ଝିଅଙ୍କ ଶବକୁ ମ. ରାମପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ବ୍ୟବଚ୍ଛେଦ ପାଇଁ ପଠାଇ ଥିବା ଜଣାପଡିଛି ।