ନୂଆଦିଲ୍ଲୀ : ଦିଲ୍ଲୀର ଦ୍ବାରକା ସ୍ଥିତ ଜାଫରପୁର କଲନ ଅଞ୍ଚଳରେ ଚାଞ୍ଚଲ୍ୟକର ଘଟଣା । ଦିଲ୍ଲୀ ପୋଲିସର ସ୍ପେଶାଲ ସେଲରେ ଥିବା ହେଡ୍ କନଷ୍ଟେବଳ ନୀରଜ ଗୁଳିମାଡ଼ କରିଛନ୍ତି । ଫଳରେ ଜଣଙ୍କର ଜୀବନ ଚାଲିଯାଇଥିବା ବେଳେ ଅନ୍ୟ ଜଣେ ଗୁରୁତର ଆହତ ହୋଇଛନ୍ତି । ଘଟଣା ବିଷୟରେ ସୂଚନା ପାଇ ପୋଲିସ ପହଞ୍ଚି ଯାଞ୍ଚ ଆରମ୍ଭ କରୁଛି । ଗୁଳିମାଡ଼ର କାରଣ ଏଯାଏଁ ଜଣାପଡିନାହିଁ ।
ଖବର ମୁତାବକ, ଘଟଣା ସମୟରେ ଅଭିଯୁକ୍ତ ଜଣକ ଏକ ପାର୍ଟିରେ ସାମିଲ ଥିଲା, ଆଉ ପାର୍ଟିରେ ହଠାତ୍ ବିବାଦ ହେବାରୁ ନିଜର ପୋଲିସ ବନ୍ଧୁକ ବାହାର କରି ଗୁଳିମାଡ଼ କରିଥିଲା । ଅଭିଯୁକ୍ତ ଜଣକ ୨ଟି ଗୁଳି ଚଳାଇଥିଲା । ଅଭିଯୁକ୍ତ ପୋଲିସକର୍ମୀ ଘଟଣା ଘଟାଇବା ପରେ ଫେରାର ହୋଇଯାଇଥିଲେ । ପୋଲିସ ହତ୍ୟା ମାମଲା ରୁଜୁ କରି ଯାଞ୍ଚ ଆରମ୍ଭ କରିଥିଲା । ଏହାପରେ ଦିଲ୍ଲୀ ପୋଲିସର ସ୍ପେଶାଲ ସେଲର ହେଡ୍ କନଷ୍ଟେବଳ ନୀରଜଙ୍କୁ ଗିରଫ କରାଯାଇଛି । ଗୁଳିମାଡ଼ ଯୋଗୁଁ ପାଣ୍ଡବ ନାମକ ଜଣେ ବ୍ୟକ୍ତିଙ୍କ ଜୀବନ ଚାଲିଯାଇଥିଲା ଏବଂ ଘଟଣା ଆଉ ଜଣେ ବ୍ୟକ୍ତି ଗୁରରୁତର ଆହତ ରହିଛନ୍ତି ବୋଲି ଜଣାପଡିଛି ।
ଆହତଙ୍କୁ ତୁରନ୍ତ ହସପିଟାଲରେ ଭର୍ତ୍ତି କରାଯାଇଛି । ପୋଲିସ ଆଖପାଖ ଲୋକଙ୍କୁ ପଚରାଉଚରା କରୁଛି । ଘଟଣା ସମୟରେ ଉପସ୍ଥିତ ଥିବା ଲୋକଙ୍କ ବୟାନ ନିଆଯାଉଛି । ପୋଲିସ ଘଟଣା ସ୍ଥଳରେ ପହଞ୍ଚି ଯାଞ୍ଚ ଆରମ୍ଭ କରିଛି । ତେବେ ପ୍ରାଥମିକ ତଦନ୍ତରୁ ଜଣାପଡିଛି କି, ଘଟଣା ସମୟରେ ଅଭିଯୁକ୍ତ ହେଡ୍ କନଷ୍ଟେବଳ ନିଶାରେ ଥିଲେ ଏବଂ କୌଣସି କଥାକୁ ନେଇ ଗୁଳି ଚଳାଇ ଫେରାର ହୋଇଯାଇଥିଲେ ।
