କାଲିମେଳା : ଖାଦ୍ୟ ଖୋଜିବାକୁ ଆସି କୂଅରେ ପଡିଯାଇଥିଲା ଗୋଟିଏ ଭାଲୁ । ଏଭଳି ଦୃଶ୍ୟ ଦେଖିବାକୁ ମିଳିଛି କାଲିମେଳା ବ୍ଲକ ଅଧୀନ ଗୋମ୍ପାକୋଣ୍ଡା ଗ୍ରାମ ପଞ୍ଚାୟତର ଏମ୍ପିଭି–୨୬ ଗ୍ରାମରେ । ଗ୍ରାମର ବିରେନ ବିଶ୍ୱାସଙ୍କ ବାଡ଼ିରେ ଥିବା ପୁରୁଣା କୂଅ ଭିତରେ ଭାଲୁଟି ପଡିଯାଇଥିଲା ।
ସକାଳେ ହଠାତ ଭାଲୁର କାନ୍ଦିବା ଶବ୍ଦ ଶୁଣି ପଡ଼ୋଶୀ ଘର ଲୋକେ ଘଟଣାସ୍ଥଳକୁ ଯାଇ ଦେଖିଥିଲେ ଏବଂ ବନ ବିଭାଗକୁ ଖବର ଦେଇଥିଲେ । ଖବର ପାଇ କାଲିମେଳା ବନ ବିଭାଗ ସହ ଜିଲ୍ଲାର ରେପିଡ୍ ରେସପୋନ୍ସ ଟିମ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ ।
ସକାଳ ୭ଟାରୁ ଲଗାତାର ଚାଲିଥିବା ଉଦ୍ଧାର କାର୍ଯ୍ୟରେ ପ୍ରାୟ ୧୫ରୁ ୨୦ ଜଣ ବନ କର୍ମଚାରୀ ନିୟୋଜିତ ଥିଲେ । ଦୌଡ଼ି, କେଜ ଓ ବିଶେଷ କୌଶଳ ବ୍ୟବହାର କରି ଦୀର୍ଘ ସମୟ ପରେ ଆଜି ଅପରାହ୍ନ ୩ଟାରେ ଭାଲୁଟିକୁ ସୁରକ୍ଷିତ ଭାବେ କୂଅ ଭିତରୁ ଉଦ୍ଧାର କରିଥିଲେ ।
ଉଦ୍ଧାର ପରେ ଭାଲୁଟିର ପ୍ରଥମେ ସ୍ୱାସ୍ଥ୍ୟ ପରୀକ୍ଷା କରାଯାଇଥିଲା । ସବୁକିଛି ସାଧାରଣ ଥିବାରୁ ଡିଏଫଓଙ୍କ ନିର୍ଦ୍ଦେଶ ଅନୁଯାୟୀ ଭାଲୁଟିକୁ ସୁରକ୍ଷିତ ଜଙ୍ଗଲରେ ଛାଡ଼ିବା ପାଇଁ ବନ ବିଭାଗ ପକ୍ଷରୁ ବ୍ୟବସ୍ଥା କରାଯାଇଛି । ବନ ବିଭାଗର ଏହି ସମୟୋଚିତ ପଦକ୍ଷେପରେ ଗୋଟିଏ ବନ୍ୟପ୍ରାଣୀର ଜୀବନ ରକ୍ଷା ପାଇଛି।
