ଆଜିଠୁ ଆରମ୍ଭ ହେଲା କଂଗ୍ରେସର ‘ଦେଶ ପାଇଁ ଦାନ’ ଅଭିଯାନ । ୨୦୨୪ ନିର୍ବାଚନ ଲଢିବା ପାଇଁ ପାଣ୍ଠି ସଂଗ୍ରହ କରିବାକୁ ଏଭଳି ପ୍ରୟାସ

ପାଣ୍ଠି ସଂଗ୍ରହ ପାଇଁ କଂଗ୍ରେସର ଅଭିଯାନ ଆରମ୍ଭ । ‘ଦେଶ ପାଇଁ ଦାନ’ ଜରିଆରେ ସଂଗ୍ରହ ହେବ ପାଣ୍ଠି । ପ୍ରଥମେ ଅନଲାଇନ ପରେ ଘରକୁ ଘର ଯିବ ଦଳ । କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ, ଆରମ୍ଭ କରୁଥିବା ଏହି ଅଭିଯାନର ନାଁ ହେଉଛି, ଦେଶ ପାଇଁ ଦାନ । ପାଣ୍ଠି ସଂଗ୍ରହ ପାଇଁ ଦେଶର ସର୍ବପୁରାତନ ଦଳ ବିଧିବଦ୍ଧଭାବେ ଏହି ଅଭିଯାନ ଆରମ୍ଭ କରିଛି । ପ୍ରଥମେ ଅନଲାଇନ ଏବଂ ପରେ ଘରକୁ ଘର ଯାଇ ଦାନ ସଂଗ୍ରହ କରିବେ କଂଗ୍ରେସ କର୍ମୀ । ଦଳକୁ ୧୩୮ ବର୍ଷ ପୁରଣ କରିବାକୁ ଯାଉଥିବା ବେଳେ ପାଣ୍ଠି ଗ୍ରହଣର ଏକ ରୋଚକ ସଂଖ୍ୟା ରଖାଯାଇଛି । କଂଗ୍ରେସର ୱେବସାଇଟ୍କୁ ଯାଇ ଲୋକମାନେ ୧୩୮, ୧୩୮୦ କିମ୍ବା ୧୩, ୮୦୦ ଟଙ୍କା ଦାନ କରିପାରିବେ ।
ଡିସେମ୍ବର ୨୮ ତାରିଖ କଂଗ୍ରେସର ପ୍ରତିଷ୍ଠା ଦିବସ । ତେଣୁ ୨୮ ତାରିଖ ଯାଏଁ ଅନଲାଇନ୍ ଅଭିଯାନ ଚାଲିବ । ଏହା ପରେ କଂଗ୍ରେସ କର୍ମୀମାନେ ଘର ଘର ବୁଲି ୧୩୮ ଟଙ୍କା ଲେଖାଏଁ ସଂଗ୍ରହ କରିବ । ଉତମ ଭାରତ ଗଠନ ପାଇଁ ଲୋକଙ୍କୁ ଦାନ କରିବାକୁ ଅନୁରୋଧ କରିଛନ୍ତି ରାହୁଲ ଗାନ୍ଧୀ । ସର୍ବପୁରାତନ ଦଳକୁ ପାଣ୍ଠି ଚିନ୍ତା କାହିଁକି ଘାରିଛି, ନିର୍ବାଚନ କମିଶନଙ୍କ ରିପୋର୍ଟରୁ ସ୍ପଷ୍ଟ ହୋଇଯାଉଛି । ଚଳିତବର୍ଷ ଭାରତୀୟ ଜନତା ପାର୍ଟିକୁ ୭୧୯ କୋଟି ଟଙ୍କା ଦାନ ଆକାରରେ ମିଳିଥିବା ବେଳେ କଂଗ୍ରେସ ଦଳକୁ ମିଳିଛି ମାତ୍ର ୭୯ କୋଟି । ବଡ଼ କଥା ବିଜେପି କ୍ଷେତ୍ରରେ ଦାନର ପରିମାଣ ବଢ଼ୁଥିବା ବେଳେ କଂଗ୍ରେସ କ୍ଷେତ୍ରରେ କମୁଛି । ବିଗତ ଆର୍ଥିକବର୍ଷରେ ବିଜେପିକୁ ୬୧୪ କୋଟିର ପାଣ୍ଠି ମିଳିଥିବା ବେଳେ କଂଗ୍ରେସକୁ ମିଳିଥିଲା ମାତ୍ର ୯୫.୪ କୋଟି ।
ତେବେ କଂଗ୍ରେସର ଏହି ପାଣ୍ଠି ସଂଗ୍ରହ ଅଭିଯାନକୁ ନେଇ ବେଶ ଆଶାବାଦୀ ଓଡ଼ିଶା କଂଗ୍ରେସ । ରାଜ୍ୟରେ କଂଗ୍ରେସ କର୍ମୀମାନେ ଉତ୍ସାହର ସହ ଏହି ଅଭିଯାନରେ ସାମିଲ ହେବେ ବୋଲି ପିସିସି ସଭାପତି କହିଛନ୍ତି । ଅନ୍ୟପଟେ କଂଗ୍ରେସ ମୁହାଁଲୁଚାଇବା ପାଇଁ ଉଦ୍ୟମ କରୁଛି ବୋଲି ସମାଲୋଚନା କରିଛି ବିଜେପି ।