ଭୁବନେଶ୍ୱର : ବାତ୍ୟା ପାଇଁ ଦରଦାମ ବୃଦ୍ଧିରେ ଲାଗୁନି ବ୍ରେକ୍ । ଲୋକେ ବୋହି ନେଉଛନ୍ତି ଅତ୍ୟାବଶ୍ୟକ ସାମଗ୍ରୀ । ପରିବା ବଜାରରେ ନିଆଁ । ହଠାତ ବଢ଼ି ଯାଇଛି ଆଳୁ ପିଆଜ ଓ ପନିପରିବା ଦରଦାମ । ଆଳୁ ଦର ହଠାତ ୧୦ ଟଙ୍କାରୁ ଅଧିକ ବଢ଼ି ଯାଇଛି । କେଉଁଠି ୪୦ ତ କେଉଁଠି ୫୦ରେ ବିକ୍ରି ହେଉଛି । ପିଆଜ ମଧ୍ୟ ୬୦ ରୁ ବଢ଼ି ୭୦ ଟଙ୍କାରେ ପହଞ୍ଚି ଯାଇଛି । କେବଳ ଆଳୁ ପିଆଜ ନୁହେଁ, କଞ୍ଚା ପରିବା ଦର ମଧ୍ୟ ଆକାଶ ଛୁଆଁ । ତଥାପି ବାତ୍ୟା ଭୟରେ ଲୋକମାନେ ପରିବା କିଣିବାକୁ ବଜାରରେ ଭିଡ଼ ଜମାଉଛନ୍ତି ।
ପରିବା ଦର ବୃଦ୍ଧିକୁ ନେଇ ଖାଉଟି ଯେତିକି ଚିନ୍ତା ପ୍ରକଟ କରି ନାହାଁନ୍ତି, ଆଳୁ ପିଆଜ ଅହେତୁକ ଦର ବୃଦ୍ଧିକୁ ନେଇ ଖାଉଟିଙ୍କ ମୁଣ୍ଡରେ ଚଡକ ପଡି ଯାଇଛି । କାରଣ ଜଣେ ସାଧାରଣ ଲୋକଟିଏ କିଛି ନହେଲେ ବି ଆଳୁ ପିଆଜରେ ପରିବାର ଚଳାଇ ଦେବ । ୩ ଦିନ ପୂର୍ବରୁ ଆଳୁ ଦର ସ୍ବଭାବିକ ଥିଲା । ଆଳୁ କିଲୋପ୍ରତି ୨୮ରୁ ୩୦ ଟଙ୍କା ଦରରେ ବିକ୍ରୟ ହେଉଥିଲା । ମାତ୍ର ଆଜି ତାହା କେଉଁଠି ୪୦ ଟଙ୍କା ତ ଆଉ କେଉଁଠି ୫୦ ଟଙ୍କା ଦରରେ ବିକ୍ରୟ ହେଉଛି । ଯଦିଓ ସବୁ ଵ୍ୟଵସାୟୀମାନେ ଏହି ଦର ବୃଦ୍ଧି କରି ନାହାନ୍ତି । ମାତ୍ର କିଛି କିଛି ଵ୍ୟଵସାୟୀ ଏପରି ଅସାଧୁ ଉପାୟରେ ଖାଉଟିଙ୍କୁ ଲୁଟୁଛନ୍ତି । ଵ୍ୟଵସାୟୀଙ୍କ କହିବା ଅନୁସାରେ ବଜାରରେ ଆଳୁ ପିଆଜ ଅଭାବ ଥିବାରୁ ଏପରି ଦର ବୃଦ୍ଧି ପାଇଛି ।
ସେପଟେ ଖାଉଟି ବଜାରରେ ଲୋକଙ୍କ ଭିଡ କଳାବଜାରୀ ପାଇଁ ପୁଷମାସ ହୋଇଛି । ବାତ୍ୟା ଖବର ଆସିବା ପରେ ସାଧାରଣ ଲୋକଙ୍କ ଆତୁରତାର ଫାଇଦା ଉଠାଇବାରେ ଲାଗିଛନ୍ତି କିଛି ଅସାଧୁ ବ୍ୟବସାୟୀ । ତାଗିଦ ସତ୍ତ୍ବେ ଚଢ଼ା ଭାଉରେ ବିକୁଛନ୍ତି ବେପାରୀ । କଳାବଜାରୀ ରୋକିବାକୁ ବିଭିନ୍ନ ସ୍ଥାନରେ ଚଢ଼ଉ କରୁଛି ଯୋଗାଣ ବିଭାଗ। କଳାବଜାରୀ କଲେ କାର୍ଯ୍ୟାନୁଷ୍ଠାନର ଚେତାବନୀ ଦେଇଛନ୍ତି ମନ୍ତ୍ରୀ ।
