ମହିଳା ସଂରକ୍ଷଣ ବିଲ କୋଟା ଲାଗୁ କରିବାକୁ ଦୃଷ୍ଟିରେ ରଖି କେନ୍ଦ୍ର ସରକାର ଏପ୍ରିଲ ୧୬ ରୁ ୧୮ ମଧ୍ୟରେ ସଂସଦର ଏକ ସ୍ୱତନ୍ତ୍ର ଅଧିବେଶନ ଡାକିପାରନ୍ତି । ଲୋକସଭା ଆସନ ସଂଖ୍ୟା ୮୧୬ କୁ ବୃଦ୍ଧି କରିବା ପାଇଁ ଏକ ବିଲ୍ ଆଣିପାରନ୍ତି ଯାହା ଦ୍ୱାରା ଲୋକସଭାରେ ୨୭୩ଟି ଆସନ ମହିଳାଙ୍କ ପାଇଁ ସଂରକ୍ଷିତ କରାଯାଇପାରିବ ବୋଲି ସୂତ୍ରରୁ ଜଣାପଡିଛି ।ଗୁରୁବାର ବଜେଟ୍ ଅଧିବେଶନ ଶେଷ ହେବାକୁ ଥିବାବେଳେ, ସରକାର ଏହି ଅଧିବେଶନକୁ ସ୍ଥଗିତ ରଖିପାରନ୍ତି । ୨୩ ଏପ୍ରିଲରେ ତାମିଲନାଡୁ ଏବଂ ଏପ୍ରିଲ ୨୩ ଏବଂ ୨୯ରେ ପଶ୍ଚିମବଙ୍ଗରେ ନିର୍ବାଚନ ପୂର୍ବରୁ ଏକ ବିଶେଷ ଅଧିବେଶନ ଡାକିପାରନ୍ତି। ଗୃହକୁ ଅନିର୍ଦ୍ଦିଷ୍ଟ କାଳ ପାଇଁ ମୁଲତବୀ କରା ନଯାଇ ବରଂ ଏକ ନିର୍ଦ୍ଦିଷ୍ଟ ତାରିଖରେ ପୁନର୍ବାର ବୈଠକ ହେବ ବୋଲି ଘୋଷଣା ସହିତ ଏହାକୁ ମୁଲତବୀ କରାଯିବ । ମହିଳା ସଂରକ୍ଷଣ ଆଇନର ଶୀଘ୍ର କାର୍ଯ୍ୟାନ୍ୱୟନ ପାଇଁ ସରକାର ସମ୍ପ୍ରତି ଯଥାଶୀଘ୍ର ସୀମା ନିର୍ଦ୍ଧାରଣ ପ୍ରକ୍ରିୟା ପ୍ରସ୍ତାବ ଦେଇଛନ୍ତି । ପ୍ରସ୍ତାବିତ ପରିବର୍ତ୍ତନଗୁଡ଼ିକରେ ୨୦୧୧ ଜନଗଣନା ଆଧାରରେ ଆଇନର କାର୍ଯ୍ୟାନ୍ୱୟନକୁ ସଂଯୋଗ କରି ଶୀଘ୍ର କାର୍ଯ୍ୟକାରୀ କରିବା ଏବଂ ସମାନୁପାତିକ ଆଧାରରେ ଲୋକସଭା ଏବଂ ବିଧାନସଭା ଆସନ ସଂଖ୍ୟା ୫୦% ବୃଦ୍ଧି କରିବାର ସମ୍ଭାବନା ରହିଛି। କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଗତ ସପ୍ତାହରେ ଏନ୍ଡିଏର କେତେକ ସହଯୋଗୀ ଦଳ ଓ ଅଣ କଂଗ୍ରେସ ବିରୋଧୀ ଦଳଙ୍କ ସହିତ ଆଲୋଚନା କରିଛନ୍ତି ।
ତେବେ କଂଗ୍ରେସ ଓ ଟିଏମ୍ସି ସହିତ ଆଲୋଚନା ବାକି ରହିଛି। ବିରୋଧୀ ଏହାଉପରେ ରୋଡମ୍ୟାପ୍ ପ୍ରସ୍ତୁତ ପାଇଁ ସର୍ବଦଳୀୟ ବୈଠକ ଡାକିବାକୁ ଦାବି କରିଛନ୍ତି। କଂଗ୍ରେସ ମଧ୍ୟ ଲୋକସଭାର ଆକାର ୫୦% ବୃଦ୍ଧି କରିବା ପ୍ରସ୍ତାବକୁ ବିରୋଧ କରି କହିଛି ଯେ, ଏପରି ପଦକ୍ଷେପ ଦକ୍ଷିଣ, ଉତ୍ତର-ପୂର୍ବ ଏବଂ ପଶ୍ଚିମ ଭାରତର ଛୋଟ ରାଜ୍ୟଗୁଡ଼ିକୁ ପାଇଁ ଅସୁବିଧାଜନକ ହେବ। ଲୋକସଭା ଓ ବିଧାନସଭାରେ ମହିଳାଙ୍କୁ ୩୩% ସଂରକ୍ଷଣ ଦେବାକୁ ୨୦୨୩ରେ ସମ୍ବିଧାନରେ ସଂଶୋଧନ କରାଯାଇଥିଲା। କିନ୍ତୁ ସୀମା ନିର୍ଦ୍ଧାରଣ ପରେ ଏହାକୁ ଲାଗୁ କରାଯିବ। ବର୍ତ୍ତମାନ ଲୋକସଭାରେ ୫୪୩ ଆସନ ଥିବାବେଳେ ଏହାକୁ ୮୧୬ ବୃଦ୍ଧି କରିବାକୁ ଯୋଜନା ରହିଛି ଓ ମହିଳାଙ୍କ ପାଇଁ ଏଥିରେ ୨୭୩ ଆସନ ସଂରକ୍ଷିତ ରଖାଯିବ ।
