ଓ୍ଵାକଫ୍ ବିଲକୁ ବିରୋଧ କରିବୁ : ମୁସଲିମ ପର୍ସନାଲ ଲ’ ବୋର୍ଡ

ନୂଆଦିଲ୍ଲୀ : ଓ୍ଵାକଫ୍ ସଂଶୋଧନ ବିଲ୍ ଉପରେ ଗଠିତ ଜେପିସି ଗୁରୁବାର ସଂସଦରେ ନିଜର ରିପୋର୍ଟ ଉପସ୍ଥାପନ କରିଛି। ଅଲ୍ ଇଣ୍ଡିଆ ମୁସଲିମ୍ ପର୍ସନାଲ ଲ’ ବୋର୍ଡ ଏହି ରିପୋର୍ଟ ଉପରେ ଆପତ୍ତି ଉଠାଇଛି। ବୋର୍ଡ କହିଛି ଯେ ଓ୍ବାକଫ ବିଲକୁ ବିରୋଧ କରାଯିବ ।ମୁସଲିମ ପର୍ସନାଲ ଲ’ ବୋର୍ଡ ଏକ ସାମ୍ବାଦିକ ସମ୍ମିଳନୀରେ କହିଛି ଯେ ଭାରତରେ ଶିଖ ଓ ହିନ୍ଦୁମାନଙ୍କର ଯେପରି ସେମାନଙ୍କ ସମ୍ପତ୍ତି ଉପରେ ଅଧିକାର ରହିଛି, ମୁସଲମାନଙ୍କର ମଧ୍ୟ ସମାନ ଅଧିକାର ରହିଛି।ଅଲ୍ ଇଣ୍ଡିଆ ମୁସଲିମ୍ ପର୍ସନାଲ ଲ’ ବୋର୍ଡର ସଭାପତି ଖାଲିଦ ସୈଫୁଲ୍ଲା ରହମାନୀ କହିଛନ୍ତି ଯେ ଓ୍ଵାକଫ୍ ଉପରେ ପ୍ରଚଳିତ ଆଇନ ଭାରତୀୟ ସମ୍ବିଧାନ ଅଧୀନରେ ରହିଛି। ଏହା ଧର୍ମୀୟ ସ୍ୱାଧୀନତା ଆଇନ ଅଧୀନରେ ଆସୁଛି। ବ୍ୟକ୍ତିଗତ ଆଇନ ବୋର୍ଡ ନୂଆ ବିଲ୍ କୁ ନେଇ ପ୍ରଶ୍ନ ଉଠାଇ କହିଛି ଯେ ଶିଖମାନେ ଏହି ଆଇନ ଅଧୀନରେ ସେମାନଙ୍କ ସମ୍ପତ୍ତି ପରିଚାଳନା କରନ୍ତି। ସେହିଭଳି ହିନ୍ଦୁମାନେ ମଧ୍ୟ ମୁକ୍ତ। ଏଥିରେ ଆମର କୌଣସି ଆପତ୍ତି ନାହିଁ। କିନ୍ତୁ ମୁସଲମାନଙ୍କ ଅଧିକାର ହିନ୍ଦୁ ଓ ଶିଖଙ୍କ ଅଧିକାର ସହ ସମାନ। ତେବେ ନୂଆ ଆଇନ ଅନୁଯାୟୀ ଦୁଇ ଜଣ ଅଣମୁସଲମାନଙ୍କୁ ୱାକଫ ବୋର୍ଡରେ ଅନ୍ତର୍ଭୁକ୍ତ କରାଯିବ ଏବଂ ସରକାରଙ୍କ ଅଧିକାରୀ ମୁସଲମାନ ହେବା ଜରୁରୀ ନୁହେଁ ।