ନୂଆଦିଲ୍ଲୀ : ଦିଲ୍ଲୀରେ ଘନ କୁହୁଡ଼ି ଦେଖିବାକୁ ମିଳିଛି । ଫଳରେ ଜନଜୀବନ ଅସ୍ତବ୍ୟସ୍ତ ହୋଇପଡିଛି । ଘନ କୁହୁଡ଼ି ଯୋଗୁଁ ଦୃଶ୍ୟମାନତା ହ୍ରାସ ପାଇବାରୁ ଯାତାୟତ ସେବା ପ୍ରଭାବିତ ହୋଇଥିବାବେଳେ ଇନ୍ଦିରା ଗାନ୍ଧୀ ଆନ୍ତରାଷ୍ଟ୍ରୀୟ ବିମାନବନ୍ଦର ଏହାର କିଛି ବିମାନର ଉଡ଼ାଣକୁ ବାତିଲ କରିଛି । ଯାତ୍ରୀଙ୍କ ସୁରକ୍ଷାକୁ ଦୃଷ୍ଟିରେ ରଖି ୧୪୮ ଟି ବିମାନକୁ ବାତିଲ କରାଯାଇଛି । ଏହା ଛଡ଼ା ଦୁଇଟି ବିମାନର ଗତିପଥ ବଦଳାଯାଇଛି ।
ସୂଚନାନୁଯାୟୀ, କମ୍ ଭିଜିବିଲିଟି ପାଇଁ ଯାତ୍ରୀମାନେ ବହୁ ସମସ୍ୟାର ସମ୍ମୁଖୀନ ହେଉଛନ୍ତି। ଫଳରେ ଦିଲ୍ଲୀରୁ ଯାତ୍ରା କରୁଥିବା ୭୦ଟି ଏବଂ ଦିଲ୍ଲୀରେ ପହଞ୍ଚିଥିବା ୭୮ଟି ଉଡ଼ାଣକୁ ବାତିଲ କରାଯାଇଛି । ଏଥିସହ ଟ୍ରେନ୍ ସେବା ମଧ୍ୟ ଗୁରୁତର ଭାବେ ପ୍ରଭାବିତ ହୋଇଛି । ଆଗାମୀ ୬ ଦିନ ପାଇଁ ବାୟୁର ଗୁଣବତ୍ତା ଖରାପ ସ୍ଥିତିରେ ରହିବ ବୋଲି ଅନୁମାନ କରାଯାଉଛି । ତେଣୁ IMD ୟେଲୋ ୱାର୍ଣ୍ଣିଂ ଜାରି କରିଛି ।
ଅନ୍ୟପଟେ, ଏଭଳି ପରିସ୍ଥିତି ଜାରି ରହିଲେ ଆଗାମୀ ଦିନରେ ବିମାନ ଚଳାଚଳ ଅଧିକ ପ୍ରଭାବିତ ହୋଇପାରେ ବୋଲି ବିମାନ କମ୍ପାନୀ ପକ୍ଷରୁ କୁହାଯାଇଛି । ତେଣୁ ବିମାନବନ୍ଦରକୁ ଯିବା ପୂର୍ବରୁ ପରିସ୍ଥିତି ସମ୍ପର୍କରେ ଯାଞ୍ଚ କରିବାକୁ ଏୟାରଲାଇନ୍ସ ଯାତ୍ରୀମାନଙ୍କ ପାଇଁ ପରାମର୍ଶ ଜାରି କରିଛି ।
