ତେଲେଙ୍ଗାନା : ତେଲେଙ୍ଗାନାର ୟଦାଦ୍ରି ଭୁବନଗିରି ଜିଲ୍ଲାର ଡୋଟିଗୁଡେମରେ ଏକ କମ୍ପାନୀର ଏକ ରିଆକ୍ଟରରେ ଏକ ଭୟଙ୍କର ଅଗ୍ନିକାଣ୍ଡ ଘଟିଛି । ସୂଚନା ପାଇବା ମାତ୍ରେ ନିଆଁକୁ ଆୟତ୍ତ କରିବାକୁ ୧୦ଟି ଦମକଳ ଗାଡ଼ି ଘଟଣାସ୍ଥଳରେ ପହଞ୍ଚିଥିଲେ । ଏହାରି ମଧ୍ୟରେ ଅଧିକାରୀମାନେ କହିଛନ୍ତି ଯେ, କୌଣସି କ୍ଷୟକ୍ଷତିର ସୂଚନା ମିଳିନାହିଁ ଏବଂ ବିସ୍ଫୋରଣର ସଠିକ୍ କାରଣ ଏପର୍ଯ୍ୟନ୍ତ ସୁଦ୍ଧା ଜଣାପଡିନାହିଁ।
ସୂଚନାନୁଯାୟୀ, ୟଦାଦ୍ରି ଭୁବନଗିରି ଜିଲ୍ଲାର ଚୌତୁପ୍ପାଲ ପୋଲିସ ଷ୍ଟେସନ ସୀମା ଅନ୍ତର୍ଗତ ଡୋଟିଗୁଡେମରେ ଏକ କାରଖାନାରେ ରେଡିଏଟର ବିସ୍ଫୋରଣ ପରେ ଏକ ବଡ଼ ବିସ୍ଫୋରଣ ଘଟିଥିଲା । ଦୁଇଟି ରିଆକ୍ଟର ଭୟଙ୍କର ଶବ୍ଦ ସହିତ ବିସ୍ଫୋରଣ ହୋଇଥିଲା । ଯାହା ଫଳରେ ଆଖପାଖ ଅଞ୍ଚଳରେ ଆତଙ୍କ ଖେଳିଯାଇଥିଲା । ଦୁର୍ଘଟଣା ସମୟରେ କମ୍ପାନୀରେ ମୋଟ ୧୧ ଜଣ କର୍ମଚାରୀ ଉପସ୍ଥିତ ଥିଲେ ବୋଲି ପୋଲିସ ସୂତ୍ରରୁ ପ୍ରକାଶ ପାଇଛି । ବିସ୍ଫୋରଣ ପରେ ତୁରନ୍ତ କର୍ମଚାରୀ ଏବଂ ନିକଟରେ ଥିବା ବାସିନ୍ଦାମାନଙ୍କୁ ସ୍ଥାନାନ୍ତର କରାଯାଇଥିଲା । ଏହି ଘଟଣା ସମ୍ପର୍କରେ ସୂଚନା ପାଇବା ପରେ ଚୌତୁପଲ ଡିଏସ୍ପି ମଧୁସୁଧନ ରେଡ୍ଡୀ, ଅଗ୍ନିଶମ ବିଭାଗର କର୍ମଚାରୀଙ୍କ ସହିତ ଉଦ୍ଧାର କାର୍ଯ୍ୟ ପାଇଁ ଘଟଣାସ୍ଥଳରେ ପହଞ୍ଚିଥିଲେ । ଘଟଣାସ୍ଥଳକୁ ଦଶଟି ଦମକଳ ବାହିନୀ ଗାଡ଼ି ପଠାଇ ନିୟନ୍ତ୍ରଣ କରାଯାଇଥିଲା । କିନ୍ତୁ ଏପର୍ଯ୍ୟନ୍ତ କ୍ଷୟକ୍ଷତିର ସୂଚନା ମିଳିନାହିଁ । ଏଥିସହିତ ବିସ୍ଫୋରଣର କାରଣ ମଧ୍ୟ ଜଣାପଡିନାହିଁ ।
