ମୂଷା ଖାଇଦେଲେ ୨ଶହ କେଜିର ମାରିଜୁଆନା । ଏକ ହାଇପ୍ରୋଫାଇଲ ନିଶାଦ୍ରବ୍ୟ ଚୋରା ଚାଲାଣ ମାମଲାରେ ରାଞ୍ଚିର ପୋଲିସ ଯୁକ୍ତିରେ କୋର୍ଟ ତାଜୁବ ହୋଇଛନ୍ତି । ପୋଲିସ ଜବତ କରି ରଖିଥିବା ୨ଶହ କେଜି ଓଜନର ମାରିଜୁଆନା ବା ଗଞ୍ଜେଇକୁ ମୂଷା ନଷ୍ଟ କରିଦେଇଥିବା ପୋଲିସ ପକ୍ଷରୁ କୋର୍ଟରେ ତଥ୍ୟ ରଖାଯାଇଛି । ଏହି ଜବତ ମାରିଜୁଆନାର ମୂଲ୍ୟ ପ୍ରାୟ କୋଟିଏ ଟଙ୍କା ହେବ ।
୨୦୨୨ ଜାନୁଆରୀରେ ଏହାକୁ ପୋଲିସ ଜବତ କରିଥିଲା । ଏହି ମାମଲାରେ ରାଞ୍ଚିର ଏକ କୋର୍ଟ ସାକ୍ଷ୍ୟ ପ୍ରମାଣ ଅଭାବରୁ ମୁଖ୍ୟ ଅଭିଯୁକ୍ତକୁ କୋର୍ଟ ଦୋଷମୁକ୍ତ କରିଛନ୍ତି । ରାଞ୍ଚିରୁ ରାମଗଡ଼କୁ ଏକ ବୋଲେରରେ ମାରିଜୁଆନା ଚାଲାଣ ହେଉଥିବା ବେଳେ ପୋଲିସ ଏହାକୁ ଜବତ କରିବା ସହ ଇନ୍ଦ୍ରଜିତ ରାୟ ଓରଫ ଅନୁରଜିକୁ ପୋଲିସ ଗିରଫ କରିଥିଲା । ଗାଡ଼ିରେ ଥିବା ଆଉ ଦୁଇଜଣ ଫେରାର ହୋଇଯାଇଥିଲେ । ପରେ ଏନଡିପିଏସ ଆଇନରେ ମାମଲା ରୁଜୁ ସହ କୋର୍ଟରେ ଅଭିଯୋଗଫର୍ଦ୍ଦ ଦାଖଲ କରିଥିଲା ପୋଲିସ । କିନ୍ତୁ ଅଭିଯୁକ୍ତ ବିରୋଧରେ କୌଣସି ପ୍ରମାଣ ଉପସ୍ଥାପନ କରିପାରିନଥିଲା ପୋଲିସ ।
