ନ୍ୟୁୟର୍କ : ଆମେରିକା ନ୍ୟୁୟର୍କ ସହରରୁ ଏକ ହୃଦୟବିଦାରକ ଘଟଣା ସାମ୍ନାକୁ ଆସିଛି। ବ୍ରୁକଲିନର କ୍ରାଉନ୍ ହାଇଟ୍ସ ଅଞ୍ଚଳରେ ଏକ ରେଷ୍ଟୁରାଣ୍ଟ ଭିତରେ ଗୁଳିକାଣ୍ଡ ହୋଇଛି । ଏହି ଗୁଳିକାଣ୍ଡରେ ୩ ଜଣଙ୍କର ମୃତ୍ୟୁ ହୋଇଥିବା ବେଳେ ୮ ଜଣ ଗୁରୁତର ଆହତ ହୋଇଛନ୍ତି । ଘଟଣା ପରେ ସମଗ୍ର ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି ।
ସୂଚନା ଅନୁସାରେ ଆଜି ସକାଳେ “ଟେଷ୍ଟ ଅଫ୍ ଦି ସିଟି ଲାଉଞ୍ଜ” ବନ୍ଦ ହେବାକୁ ଯାଉଥିବା ସମୟରେ ଏହି ଘଟଣା ଘଟିଥିଲା । ପୋଲିସର ସୂଚନା ଅନୁଯାୟୀ, ଅନେକ ଆକ୍ରମଣକାରୀ ଭିତରକୁ ପ୍ରବେଶ କରି ଗୁଳି ଚଳାଇଥିଲେ। ହଠାତ୍ ଗୁଳିଚାଳନା ଯୋଗୁଁ ସମଗ୍ର ଅଞ୍ଚଳରେ ଆତଙ୍କ ଖେଳାଇ ଦେଇଥିଲା ।
ନ୍ୟୁୟର୍କ ପୋଲିସ କମିଶନର ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ପୋଲିସ ସକାଳ ପ୍ରାୟ ସାଢ଼େ ୩ଟା ସମୟରେ ଗୁଳିଚାଳନା ସମ୍ପର୍କରେ ଏକ ଫୋନ୍ ପାଇଥିଲା। ଯେତେବେଳେ ଅଧିକାରୀମାନେ ଘଟଣାସ୍ଥଳରେ ପହଞ୍ଚିଲେ, ଲୋକମାନେ ରକ୍ତଭିଜା ମହଲା ଏବଂ ଭଙ୍ଗା କାଚ ମଧ୍ୟରେ ଆହତ ଅବସ୍ଥାରେ ପଡ଼ିଥିଲେ। ମୃତ ସମସ୍ତ ତିନି ଜଣ ପୁରୁଷ ଥିଲେ, ସେମାନଙ୍କ ମଧ୍ୟରୁ ଜଣେ ୨୭ ବର୍ଷ ଏବଂ ଅନ୍ୟ ଜଣେ ୩୫ ବର୍ଷ ବୟସର ବୋଲି କୁହାଯାଉଛି, ଯେତେବେଳେ ତୃତୀୟ ଜଣଙ୍କ ବୟସ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ ।
ଗୁଳିକାଣ୍ଡରେ ଆହତ ୮ ଜଣଙ୍କୁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି। ବର୍ତ୍ତମାନ ସେମାନଙ୍କ ଅବସ୍ଥା ବିଷୟରେ କୌଣସି ସରକାରୀ ସୂଚନା ପ୍ରକାଶ କରାଯାଇ ନାହିଁ। ପୋଲିସ କହିଛି ଯେ ଗୁଳି ଚଳାଇଥିବା ସନ୍ଦିଗ୍ଧ ବ୍ୟକ୍ତିମାନେ ଘଟଣାସ୍ଥଳରୁ ପଳାଇଯାଇଛନ୍ତି ଏବଂ ସେମାନଙ୍କୁ ଖୋଜିବା ପାଇଁ ଏକ ବଡ଼ ଧରଣର ତଲାସୀ ଅଭିଯାନ ଚାଲିଛି । ପୋଲିସ କର୍ମଚାରୀମାନେ ରକ୍ତ ଦାଗ ଏବଂ ଭଙ୍ଗା କାଚ ମଧ୍ୟରେ ରେଷ୍ଟୁରାଣ୍ଟ ଭିତରେ ଠିଆ ହୋଇଥିବାର ଦେଖାଯାଇଛି । ଏହି ଦୃଶ୍ୟ ଘଟଣାର ଭୟାବହତାକୁ ଦର୍ଶାଉଛି ।
