ପୁଲିସ ବିରୋଧରେ ଥାନାରେ ଅଭିଯୋଗ କଲେ ମହିଳା

ଆଳି : ମହିଳାଙ୍କୁ ପୁଲିସର ଆକ୍ରମଣ ଓ ଦୁର୍ବ୍ୟବହାର ଅଭିଯୋଗ । କେନ୍ଦ୍ରାପଡା ଜିଲ୍ଲା ଆଳି ଥାନା ଅନ୍ତର୍ଗତ ଜୁଆଣିଆ ଗାଁରେ ଘରବାଡି ବିବାଦ ଓ ସଂଘର୍ଷ ଘଟଣାରେ ଜଣେ ଅଭିଯୁକ୍ତକୁ ଗିରଫ କରିବା ପାଇଁ ପୋଲିସ ଯାଇଥିବା ବେଳେ ଜଣେ ମହିଳାଙ୍କୁ ଦୁର୍ବ୍ୟବହାର ଓ ଆକ୍ରମଣ କରିଥିବାର ଅଭିଯୋଗ ହୋଇଛି । ଗତ ଡିସେମ୍ବର ୨୧ ତାରିଖରେ ଜୁଆଣିଆ ଗ୍ରାମର ମେଘନାଦ ପାତ୍ର ଓ ତାଙ୍କ ପଡୋଶୀଙ୍କ ମଧ୍ୟରେ ଘରବାଡି ବିବାଦକୁ ନେଇ ସଂଘର୍ଷ ଘଟିଥିଲା । ସଂଘର୍ଷ ପରେ ଏହି ଘଟଣାରେ ଆଳି ଥାନା ଏ.ଏସ.ଆଇ ଆଲୋକ ରଥ ଅଭିଯୁକ୍ତକୁ ଗିରଫ କରିବାକୁ ଯାଇଥିବାବେଳେ ଜଣେ ମହିଳାଙ୍କୁ ଆକ୍ରମଣ କରିବା ସହ ଦୁର୍ବ୍ୟବହାର କରିଥିବା ନେଇ ଏକ ସାମ୍ବାଦିକ ସମ୍ମିଳନୀରେ ଜୁଆଣିଆ ସରପଞ୍ଚ ଓ କେତେକ ଗ୍ରାମବାସୀ ଅଭିଯୋଗ କରିଛନ୍ତି । ଏନେଇ ଏ.ଏସ ଆଇ ଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବିକରି ମହିଳାମାନେ ସଂଘବଦ୍ଧ ଭାବେ ଆଳି ଥାନାରେ ପହଞ୍ଚି ଲିଖିତ ଅଭିଯୋଗ କରିଛନ୍ତି । ଏହି ଘଟଣାରେ ପୋଲିସ ପ୍ରତିକ୍ରିୟା ଦେବାକୁ ମନା କରିଦେଇଛି ।