ଭୁବନେଶ୍ୱର : ଖୋଲିଲା ପତ୍ନୀହନ୍ତା କନେଷ୍ଟବଳ ଦୀପକ ରାଉତର ପୁରୁଣା ଫାଇଲ । ବଢ଼ିଲା ଅଡୁଆ । ପ୍ରଥମ ପତ୍ନୀ ଅପର୍ଣ୍ଣା ପ୍ରିୟଦର୍ଶିନୀଙ୍କ ମୃତ୍ୟୁ ମାମଲାର ଫାଇଲ ରିଓପନ କଲା ଖୁଣ୍ଟୁଣୀ ଥାନା ପୋଲିସ । ହତ୍ୟା ମାମଲା ରୁଜୁ । ଦ୍ବିତୀୟ ପତ୍ନୀ- ଲେଡି ଟ୍ରାଫିକ କନେଷ୍ଟବଳ ଶୁଭମିତ୍ରାଙ୍କୁ ହତ୍ୟା କରିଥିବା ଜଣା ପଡ଼ିବା ପରେ ଅପର୍ଣ୍ଣାଙ୍କ ପରିବାରର ଅଭିଯୁକ୍ତ ଦୀପକ ଉପରେ ସଂଦେହ ହୋଇଥିଲା । ଅପର୍ଣ୍ଣାଙ୍କୁ ଦୀପକ ହତ୍ୟା କରି ଦୁର୍ଘଟଣାର ରୂପ ଦେଇଥିବା ସଂଦେହ କରିଥିଲେ । ଏନେଇ ଖୁଣ୍ଟୁଣୀ ଥାନାରେ ଏତଲା ଦେଇଥିଲେ ଅପର୍ଣ୍ଣାଙ୍କ ସାନ ଭଉଣୀ । ବଡ଼ ଭଉଣୀ ଅପର୍ଣ୍ଣାଙ୍କର ମୃତ୍ୟୁ କେମିତି ହୋଇଥିଲା ତାର ସାନି ତଦନ୍ତ କରିବାକୁ ଦାବି କରିଥିଲେ ।
୨୦୨୨ ମାର୍ଚ୍ଚ ୧୭ ତାରିଖରେ ଅପର୍ଣ୍ଣାଙ୍କର ଦୁର୍ଘଟଣାରେ ମୃତ୍ୟୁ ହୋଇଥିବା ଦର୍ଶାଇଥିଲା ଦୀପକ । ଢେଙ୍କାନାଳରୁ ଭୁବନେଶ୍ବର ଆସୁଥିବା ବେଳେ ରାଧାଦାମୋଦରପୁର ନିକଟରେ ତାଙ୍କ ସ୍ତ୍ରୀ ଅପର୍ଣ୍ଣାଙ୍କୁ ଏକ ଟ୍ରକ ଧକ୍କା ଦେଇଥିବା ପୋଲିସରେ ଅଭିଯୋଗ କରିଥିଲା । ଏହି ମାମଲା ସେତେବେଳେ ଅଧିକ ଖୋଳତାଡ଼ ନହୋଇ ବନ୍ଦ ହୋଇ ଯାଇଥିଲା । ପୁଣି ଖୋଲିଛି ଫାଇଲ ।
