ବର୍ଷା ଦିନରେ ପରିବେଶ ଥଣ୍ଡା ଓ ଆର୍ଦ୍ର ରହିଥାଏ । ଏହି ସମୟରେ ସଂକ୍ରମଣ ଓ ପେଟ ସମସ୍ୟାର ଆଶଙ୍କା ମଧ୍ୟ ବଢ଼ିଯାଏ । ସେଥିପାଇଁ ଏହି ଋତୁରେ ସଠିକ୍ ଖାଦ୍ୟ ଖାଇବା ବହୁତ ଜରୁରୀ । ବିଶେଷ କରି ତାଜା ଓ ସଫା ଫଳ ଖାଇଲେ ଶରୀରକୁ ଆବଶ୍ୟକ ଭିଟାମିନ୍ ଓ ଖଣିଜ ପଦାର୍ଥ ମିଳିଥାଏ । ଏହା ରୋଗ ପ୍ରତିରୋଧକ ଶକ୍ତିକୁ ମଧ୍ୟ ବଢ଼ାଇଥାଏ । ତେବେ ଆସନ୍ତୁ ଜାଣିବା କେଉଁ ଫଳ ବର୍ଷା ଦିନେ ଖାଇବା ଭଲ ।
ଡାଳିମ୍ବ: ଡାଳିମ୍ବରେ ଆଇରନ୍ ଓ ଆଣ୍ଟିଅକ୍ସିଡାଣ୍ଟ ଭରପୂର ରହିଥାଏ । ଏହା ରକ୍ତ ବଢ଼ାଇବା ସହ ଶରୀରକୁ ସୁସ୍ଥ ରଖିବାରେ ସାହାଯ୍ୟ କରେ।
ସେଓ: ପ୍ରତିଦିନ ଗୋଟିଏ ସେଓ ଖାଇଲେ ଶରୀରକୁ ଫାଇବର୍ ଓ ଭିଟାମିନ୍ ମିଳିଥାଏ । ଏହା ପାଚନ ଶକ୍ତିକୁ ଭଲ ରଖିବାରେ ସାହାଯ୍ୟ କରେ।
କଦଳୀ: କଦଳୀରେ ପୋଟାସିୟମ୍ ଓ ଶକ୍ତି ଭରପୂର ରହିଥାଏ । ଏହା ଶରୀରକୁ ଶକ୍ତି ଦେବା ସହ ଦୁର୍ବଳତା ଦୂର କରିଥାଏ ।
ପିଜୁଳି: ପିଜୁଳିରେ ଭିଟାମିନ୍–ସି ଅଧିକ ପରିମାଣରେ ରହିଥାଏ। ଏହା ରୋଗ ପ୍ରତିରୋଧକ ଶକ୍ତି ବଢ଼ାଇବା ସହ ସର୍ଦ୍ଦି–କାଶରୁ ସୁରକ୍ଷା ଦେଇଥାଏ ।
ଅମୃତଭଣ୍ଡା: ଅମୃତଭଣ୍ଡା ପାଚନ ପାଇଁ ବହୁତ ଉପକାରୀ । ଏହା ପେଟକୁ ସୁସ୍ଥ ରଖିବା ସହ କୋଷ୍ଠକାଠିନ୍ୟ ସମସ୍ୟା କମାଇଥାଏ ।
ବର୍ଷା ଦିନରେ ଫଳ ଖାଇବା ପୂର୍ବରୁ ସେଗୁଡ଼ିକୁ ଭଲ ଭାବେ ଧୋଇ ଖାଆନ୍ତୁ । କଟା ଫଳକୁ ଦୀର୍ଘ ସମୟ ବାହାରେ ରଖନ୍ତୁ ନାହିଁ । ସବୁବେଳେ ତାଜା ଓ ସଫା ଫଳ ଖାଇବାକୁ ଚେଷ୍ଟା କରନ୍ତୁ । ସଠିକ୍ ଖାଦ୍ୟ ଓ ସୁସ୍ଥ ଜୀବନଶୈଳୀ ଆପଣାଇଲେ ବର୍ଷା ଦିନରେ ମଧ୍ୟ ଆପଣ ସୁସ୍ଥ ଓ ସତେଜ ରହିପାରିବେ।
