ବ୍ରିଟିସ୍‌ ଦ୍ୱୀପକୁ ଧକ୍କା ଦେବ ବିଶ୍ୱର ବୃହତ୍ତମ ହିମଶୈଳ

ଲଣ୍ଡନ: ବିଶ୍ୱର ସର୍ବବୃହତ୍ ହିମଶୈଳ ଆଣ୍ଟାର୍କଟିକାରୁ ବିଚ୍ଛିନ୍ନ ହେବା ପରେ ଆଟଲାଣ୍ଟିକ ମହାସାଗରରେ ପ୍ରବାହିତ ହୋଇ ବ୍ରିଟିସ ଅଞ୍ଚଳ ଦକ୍ଷିଣ ଜର୍ଜିଆ ଦ୍ବୀପ ସହ ଧକ୍କା ହେବା ଅବସ୍ଥାରେ ରହିଛି। ବର୍ତମାନ ୨୮୦ କିଲୋମିଟର ଦୂରରେ ଥିବା ହିମଶୈଳ ଏ୨୩ଏ ପ୍ରବଳ ପବନ ଓ ସମୁଦ୍ର ସ୍ରୋତ ଦ୍ୱାରା ପରିଚାଳିତ ହେଉଛି। ଏହାର ଗତିଶୀଳତା ଦୀର୍ଘ ଦିନ ଧରି ବୈଜ୍ଞାନିକ ସମୁଦାୟର ଦୃଷ୍ଟି ଆକର୍ଷଣ କରିଛି। ପାଖାପାଖି ୪,୦୦୦ ବର୍ଗ କିଲୋମିଟର ପରିବ୍ୟାପ୍ତ ଏହି ବିଶାଳ ଭାସମାନ ବରଫ ପାହାଡ଼ ମୁମ୍ବାଇଠାରୁ ଛଅଗୁଣ ବଡ଼ ହେବ। ଏହା ପଶ୍ଚିମ ଆଣ୍ଟାର୍କଟିକାର ଫିଲ୍ଚନର-ରୋନେ ଆଇସ୍ ସେଲ୍ଫରୁ ଖସିବା ପରେ ୩୭ ବର୍ଷରୁ ଅଧିକ ସମୟ ଧରି ସ୍ଥିର ରହିଥିଲା।ମେଗାବର୍ଗ କୁହାଯାଉଥିବା ଏହି ଟ୍ରିଲିଅନ ଟନ୍‌ର ବରଫ ପାହାଡ଼ ଦୁଇ ବର୍ଷ ଧରି ଭାସୁଥିଲା। ଏବେ ଏହା ଦକ୍ଷିଣ ଜର୍ଜିଆ ଦ୍ୱୀପରେ ଅଟକି ଯାଇପାରେ କିମ୍ବା ସ୍ରୋତ ଦ୍ୱାରା ଏହାର ଚାରିପଟେ ଘୂରିପାରେ। ଯଦି ଏହା ଅଟକି ଯାଏ, ତେବେ ପେଙ୍ଗୁଇନ୍ ପିତାମାତାଙ୍କ ପାଇଁ ସେମାନଙ୍କ ପିଲାମାନଙ୍କୁ ଖାଇବାକୁ ଦେବା କଷ୍ଟକର ହୋଇପାରେ। ତେବେ ମୋଟାମୋଟି ଭାବେ ଗବେଷକମାନେ ହିମଖଣ୍ଡରୁ ବଡ଼ ଧରଣର କ୍ଷତିକୁ ନେଇ ଚିନ୍ତିତ ନୁହନ୍ତି। ବୈଜ୍ଞାନିକମାନେ କହିଛନ୍ତି ଯେ, ପ୍ରତି ୩ରୁ ୭ ସେକେଣ୍ଡରେ ଏକ ମିଟର ବେଗରେ ଏହି ହିମଖଣ୍ଡ ଗତି କରୁଛି, ଯାହା କି ଘଣ୍ଟାପ୍ରତି ଏକ ମାଇଲରୁ କମ୍। ଯଦି ଏହା ଦକ୍ଷିଣ ଜର୍ଜିଆ ଦ୍ବୀପରେ ଅଟକିଯାଏ, ତେବେ ପରିବେଶ ଉପରେ ଏହାର ପ୍ରତିକୂଳ ପ୍ରଭାବ ପଡ଼ିବ। ଏହି ଦ୍ୱୀପ ଲକ୍ଷ ଲକ୍ଷ ସିଲ୍, ପେଙ୍ଗୁଇନ୍ ଓ ସାମୁଦ୍ରିକ ପକ୍ଷୀଙ୍କ ପାଇଁ ଏକ ଗୁରୁତ୍ୱପୂର୍ଣ୍ଣ ଆବାସସ୍ଥଳୀ। ଏ୨୩ଏ ହିମଶୈଳର ଉପସ୍ଥିତି ସେମାନଙ୍କର ଖାଦ୍ୟସଂଗ୍ରହ ପଥରେ ବାଧା ସୃଷ୍ଟି କରିପାରେ। ବ୍ରିଟିସ ଆଣ୍ଟାର୍କଟିକା ସର୍ଭେର ବୈଜ୍ଞାନିକମାନେ ସାଟେଲାଇଟ୍ ଫଟୋ ବ୍ୟବହାର କରି ବିଶାଳ ବରଫଖଣ୍ଡର ଦୈନିକ ଗତିବିଧି ଉପରେ ନଜର ରଖିଛନ୍ତି।