ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଦିଆଗଲା ସାଇପ୍ରସର ସର୍ବୋଚ୍ଚ ନାଗରିକ ସମ୍ମାନ। ‘ଗ୍ରାଣ୍ଡ କ୍ରସ୍ ଅଫ୍ ଦି ଅର୍ଡର ଅଫ୍ ମାକାରିଓସ୍ ୩’ରେ ସମ୍ମାନିତ ହେଲେ ପିଏମ୍ ମୋଦି । ସାଇପ୍ରସର ରାଷ୍ଟ୍ରପତି ନିକୋସ୍ କ୍ରିଷ୍ଟୋଡୋଲିଡ୍ସ ପ୍ରଧାନମନ୍ତ୍ରୀ ମୋଦିଙ୍କୁ ସମ୍ମାନିତ କରିଛନ୍ତି । ଏହି ପୁରସ୍କାର ସାଇପ୍ରସର ପ୍ରଥମ ରାଷ୍ଟ୍ରପତି ଆର୍ଚବିଶପ୍ ମାକାରିଓସ୍ ୩ଙ୍କ ନାମରେ ନାମିତ ହୋଇଛି । ପ୍ରଧାନମନ୍ତ୍ରୀ ମୋଦି ଏହି ସମ୍ମାନକୁ ୧୪୦ କୋଟି ଭାରତୀୟଙ୍କୁ ଉତ୍ସର୍ଗ କରିଛନ୍ତି ।
ସମ୍ମାନିତ ହେବା ପରେ ମୋଦି କହିଛନ୍ତି ଯେ, ଏହା ଭାରତ-ସାଇପ୍ରସର ବିଶ୍ୱସ୍ତ ବନ୍ଧୁତା ପାଇଁ ଏକ ସମ୍ମାନ । ଭାରତ ଖୁବଶୀଘ୍ର ବିଶ୍ୱର ତୃତୀୟ ଅର୍ଥବ୍ୟବସ୍ଥା ହେବା ଦିଗରେ ଗତି କରୁଛି ।ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ୨୦୧୪ରୁ ଏପର୍ଯ୍ୟନ୍ତ ୨୩ ଦେଶରେ ସର୍ବୋଚ୍ଚ ଅନ୍ତର୍ଜାତୀୟ ସମ୍ମାନ ମିଳିସାରିଛି । ଏହି ସମ୍ମାନ ତାଙ୍କର କୁଶଳ ନେତୃତ୍ୱ ବିଶ୍ୱ କୂଟନୀତି ଏବଂ ଅନ୍ତର୍ଜାତୀୟ ସହଯୋଗରେ ଯୋଗଦାନକୁ ଦର୍ଶାଇଥାଏ । ଏହି ସମ୍ମାନ ଭାରତର ବିଶ୍ୱ ପ୍ରତିଷ୍ଠା ଏବଂ ପ୍ରଧାନମନ୍ତ୍ରୀ ମୋଦିଙ୍କ ପ୍ରଭାବଶାଳୀ ବୈଦେଶିକ ନୀତିର ପ୍ରମାଣ ମଧ୍ୟ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କର ତିନି ରାଷ୍ଟ୍ର ଗସ୍ତର ପ୍ରଥମ ପର୍ଯ୍ୟାୟରେ ସାଇପ୍ରସରେ ଅଛନ୍ତି । ସେ ସାଇପ୍ରସରୁ କାନାଡା ଯିବେ ଏବଂ G7 ଶିଖର ସମ୍ମିଳନୀରେ ଯୋଗଦେବେ । ଏହା ପରେ ସେ କ୍ରୋଏସିଆ ଗସ୍ତ କରିବେ । କାନାଡା ପରେ ପ୍ରଧାନମନ୍ତ୍ରୀ ଜୁନ ୧୮ ରେ କ୍ରୋଏସିଆ ଗସ୍ତ କରିବେ । ପ୍ରଧାନମନ୍ତ୍ରୀ ଭାବେ କ୍ରୋଏସିଆ ଗସ୍ତରେ ଯାଉଥିବା ପ୍ରଥମ ଭାରତୀୟ ପ୍ରଧାନମନ୍ତ୍ରୀ ମୋଦି ହେବେ ।
