ନୂଆଦିଲ୍ଲୀ: ଆଜି ଲୋକସଭାରେ ସମ୍ବିଧାନ ଉପରେ ଆଲୋଚନାର ଦ୍ୱିତୀୟ ଦିନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସମ୍ବିଧାନର ୭୫ ବର୍ଷ ଅବସରରେ ଏକ ସମ୍ବୋଧନ ଦେଇଛନ୍ତି। ଏହି ସମୟରେ ସେ କଂଗ୍ରେସକୁ ତୀବ୍ର ଟାର୍ଗେଟ କରି ଜରୁରୀକାଳୀନ ପରିସ୍ଥିତି ବିଷୟରେ କହି କଂଗ୍ରେସ ଦଳ ବିରୋଧରେ ଅନେକ ଅଭିଯୋଗ କରିଥିଲେ। ସେପଟେ ପ୍ରଧାନମନ୍ତ୍ରୀ ମୋଦୀ ଲୋକସଭାରେ ଏପରି କଥା କହିଛନ୍ତି ଯେ ଗୃହରେ ବସିଥିବା ସମାଜବାଦୀ ପାର୍ଟି ମୁଖ୍ୟ ତଥା ସାଂସଦ ଅଖିଳେଶ ଯାଦବ ଏବଂ ଏସପି ସାଂସଦ ଡିମ୍ପଲ ଯାଦବ ହସିବା ଆରମ୍ଭ କରିଥିଲେ। ଉଭୟଙ୍କ ହସ ମଧ୍ୟ କ୍ୟାମେରାରେ କଏଦ ହୋଇଥିଲା।
ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ଇନ୍ଦିରା ଗାନ୍ଧୀଙ୍କ ବିରୋଧରେ ରାୟ ଦେଇଥିବା ଜଷ୍ଟିସ ଏଚଆର ଖାନ୍ନାଙ୍କ ଉପରେ ସେ ଏତେ ରାଗିଗଲେ ଯେ ସେ ତାଙ୍କୁ ସୁପ୍ରିମକୋର୍ଟର ପ୍ରଧାନ ବିଚାରପତି ହେବାକୁ ଦେଲେ ନାହିଁ। ଏହା ସହିତ, କାହାର ନାମ ନ ନେଇ ସେ କହିଛନ୍ତି, “ଏଠାରେ ମଧ୍ୟ ଅନେକ ଦଳ ବସିଛନ୍ତି, ଯାହାର ନେତାମାନେ ଜେଲରେ ଥିଲେ। ଅବଶ୍ୟ ଏବେ ବାଧ୍ୟ ବାଧକତାରେ ସେମାନେ ଆଜି ସେଠାରେ ବସିଛନ୍ତି। ସେମାନଙ୍କୁ ମଧ୍ୟ ଜେଲରେ ପୁରା ଯାଇଥିଲା।” ଗୃହରେ ବସିଥିବା ଏସପି ମୁଖ୍ୟ ଅଖିଳେଶ ଯାଦବ ଏବଂ ଏସପି ସାଂସଦ ଡିମ୍ପଲ ଯାଦବ ପ୍ରଧାନମନ୍ତ୍ରୀ ମୋଦୀଙ୍କ ଏହି ବିବୃତ୍ତିରେ ହସିବା ଆରମ୍ଭ କରିଥିଲେ।
ଏଥିରୁ ସ୍ପଷ୍ଟ ଯେ ପ୍ରଧାନମନ୍ତ୍ରୀ ମୋଦୀ ଏସପି ପ୍ରତିଷ୍ଠାତା ମୁଲାୟମ ସିଂ ଯାଦବଙ୍କ ଆଡକୁ ଅଙ୍ଗୁଳି ନିର୍ଦ୍ଦେଶ କରିଥିଲେ। କାରଣ ମୁଲାୟମ ସିଂ ଯାଦବ ମଧ୍ୟ ୧୯୭୫ ମସିହାରେ ଜରୁରୀକାଳୀନ ପରିସ୍ଥିତିରେ ଜେଲରେ ଥିଲେ ଏବଂ ଏହା ପରେ ସେ ସମାଜବାଦୀ ପାର୍ଟି ଗଠନ କରିଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଲୋକସଭାରେ ଦେଇଥିବା ଅଭିଭାଷଣକୁ ନେଇ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ କହିଛନ୍ତି, “ଏହା ବହୁତ ଲମ୍ବା ଭାଷଣ ଥିଲା। ଯେଉଁମାନେ ପରିବାର ବିଷୟରେ କହୁଛନ୍ତି, ସେମାନଙ୍କ ନିଜ ଦଳରେ ଏହା ଭରି ରହିଛି।
