ଗ୍ରୀନ୍ ଟି’ରେ ଶକ୍ତିଶାଳୀ ଆଣ୍ଟିଅକ୍ସିଡାଣ୍ଟ ଭରପୂର ଥାଏ । ତେଣୁ ଏହା ଓଜନ ହ୍ରାସ କରିବାରେ ବହୁତ ସହାୟକ ହୋଇଥାଏ । ଏହା ବ୍ୟତୀତ ଚା ଏବଂ କଫି ବଦଳରେ ପ୍ରତିଦିନ ଗ୍ରୀନ୍ ଟି ପିଇବା ଭଲ ବୋଲି କୁହାଯାଏ । ଏହାକୁ ସେବନ କରିବା ଦ୍ୱାରା ଶରୀରକୁ ଅନେକ ଲାଭ ମିଳିଥାଏ, କିନ୍ତୁ ଆପଣ ଜାଣିଛନ୍ତି କି ଗ୍ରୀନ୍ ଟି ତ୍ୱଚାକୁ ଉଜ୍ଜ୍ୱଳ କରିବା ପାଇଁ ମଧ୍ୟ ବ୍ୟବହାର କରାଯାଇଥାଏ । ଆପଣ ଗ୍ରୀନ୍ ଟି ର ଫେସ୍ ପ୍ୟାକ୍ ତିଆରି କରି ଆପଣଙ୍କ ମୁହଁରେ ଲଗାଇ ପାରିବେ ଏବଂ ଏହି ଫେସ୍ ପ୍ୟାକ୍ ତ୍ୱଚା ପାଇଁ ବହୁତ ଲାଭଦାୟକ । ଗ୍ରୀନ୍ ଟି ଫେସ୍ ପ୍ୟାକ୍ ମୁହଁରେ ଥିବା ବ୍ରଣରୁ ମୁକ୍ତି ଦେଇଥାଏ । ଏହା ବ୍ୟତୀତ ଏହି ପ୍ୟାକ୍ ତ୍ୱଚାକୁ ସଫା କରେ ଯାହା ଦ୍ୱାରା ବାରମ୍ବାର ବ୍ରଣ ହେବାର ସମ୍ଭାବନା କମିଯାଏ । ଏହା ଦାଗ ଓ ଚିହ୍ନକୁ ଦୂର କରେ ।
ଶୁଖିଲା ତ୍ୱଚା ପାଇଁ ଗ୍ରୀନ୍ ଟି ଫେସ୍ ପ୍ୟାକ୍ :
ଗ୍ରୀନ୍ ଟିକୁ ଫୁଟାନ୍ତୁ ଏବଂ ପରେ ଏହାକୁ ଗ୍ରାଇଣ୍ଡ୍ କରନ୍ତୁ ଯାହା ଦ୍ୱାରା ପେଷ୍ଟ ପ୍ରସ୍ତୁତ ହେବ । ଏଥିରେ ଏକ ଚାମଚ ମହୁ ଏବଂ ଦହି ମିଶାଇ ମୁହଁରେ ଲଗାନ୍ତୁ । ଏହି ଫେସ୍ ପ୍ୟାକ୍ ତ୍ୱଚାର ପ୍ରାକୃତିକ ଚମକ ଫେରାଇ ଆଣିବ ।
ତେଲିଆ ତ୍ୱଚା ପାଇଁ ଗ୍ରୀନ୍ ଟି ଫେସ୍ ପ୍ୟାକ୍ :
ଏକ ବଡ଼ ଚାମଚ ଗ୍ରୀନ୍ ଟି ନିଅନ୍ତୁ ଏବଂ ଆବଶ୍ୟକତା ଅନୁଯାୟୀ ଏହାକୁ ଭଲ ଭାବରେ ପାଣିରେ ଫୁଟାନ୍ତୁ । ପରେ ଏଥିରେ ମୁଲତାନୀ ମାଟି ଏବଂ ଅଳ୍ପ ବୁନ୍ଦା ଲେମ୍ବୁ ରସ ମିଶାଇ ଏକ ସ୍ମଥ ପେଷ୍ଟ ପ୍ରସ୍ତୁତ କରନ୍ତୁ । ପ୍ରଥମେ ମୁହଁ ଧୁଅନ୍ତୁ ପରେ ତଉଲିଆରେ ମୁହଁ ଶୁଖାନ୍ତୁ । ବର୍ତ୍ତମାନ ଏହି ପ୍ୟାକ୍ କୁ ମୁହଁରେ ଲଗାଇ ପ୍ରାୟ ୧୫ ରୁ ୨୦ ମିନିଟ୍ ଛାଡି ଦିଅନ୍ତୁ ଏବଂ ପରେ ଏହାକୁ ସାଧା ପାଣିରେ ଧୋଇ ଦିଅନ୍ତୁ । ଏହି ଫେସ୍ ପ୍ୟାକ୍ ଅତିରିକ୍ତ ତେଲକୁ ବାହାର କରିଥାଏ ଏବଂ ବ୍ରଣରୁ ମଧ୍ୟ ମୁକ୍ତି ଦେଇଥାଏ । ତ୍ୱଚାର ରଙ୍ଗକୁ ଏହା ଉନ୍ନତ କରିଥାଏ ।
ମିଶ୍ରଣ ତ୍ୱଚା ପାଇଁ ଗ୍ରୀନ୍ ଟି ଫେସ୍ ପ୍ୟାକ୍ :
କିଛି ଲୋକଙ୍କ ତ୍ୱଚା ତେଲିଆ ସହ ଶୁଖିଲା ବି ହୋଇଥାଏ । ଏହି ଲୋକମାନେ ନିଜ ତ୍ୱଚା ପାଇଁ ଗ୍ରୀନ୍ ଟି ପାଣିରେ ଓଟମିଲ୍ ମିଶାଇବେ ଏବଂ ପରେ ଗୋଟିଏ ଚାମଚ ମହୁ ମିଶାଇ କିଛି ସମୟ ପାଇଁ ଛାଡିଦେବେ । ଯେତେବେଳେ ଓଟମିଲ୍ ଟିକେ ନରମ ହୋଇଯିବ ସେତେବେଳେ ଏହି ମିଶ୍ରଣକୁ ମୁହଁରେ ଲଗାନ୍ତୁ ଏବଂ ଅତି କମରେ ୧୫ ରୁ ୨୦ ମିନିଟ୍ ପରେ ମୁହଁ ଧୋଇ ଦିଅନ୍ତୁ ।
