ନୂଆଦିଲ୍ଲୀ: ଖଲିସ୍ତାନୀ ଆତଙ୍କବାଦୀ ହରଦୀପ ସିଂହ ନିଜାର ହତ୍ୟା ଷଡ଼ଯନ୍ତ୍ର ବିଷୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଅବଗତ ଅଛନ୍ତି ବୋଲି ଦାବି କରୁଥିବା କାନାଡାର ଏକ ରିପୋର୍ଟକୁ ଭାରତ କଡ଼ା ସମାଲୋଚନା କରିଛି। ବୈଦେଶିକ ବ୍ୟାପାର ମନ୍ତ୍ରାଳୟର ମୁଖପାତ୍ର ରଣଧୀର ଜୟସ୍ୱାଲ ଏହାକୁ ସେମାନଙ୍କର ବିଭ୍ରାନ୍ତକାରୀ ‘ମିଥ୍ୟା ପ୍ରଚାର’ ବୋଲି କହିଛନ୍ତି। କାନାଡାର ଗ୍ଲୋବ୍ ଆଣ୍ଡ ମେଲ୍ ଖବରକାଗଜ ରିପୋର୍ଟରେ କାନାଡାର ଅଜ୍ଞାତ ଅଧିକାରୀଙ୍କ ବୟାନ ଦେଇ କୁହାଯାଇଛି ଯେ, ମୋଦୀ ଖଲିସ୍ତାନୀ କାର୍ଯ୍ୟକର୍ତ୍ତାଙ୍କ ହତ୍ୟା ଷଡ଼ଯନ୍ତ୍ର ବିଷୟରେ ଅବଗତ ଥିଲେ। ରିପୋର୍ଟରେ ଆହୁରି ଦାବି କରାଯାଇଛି ଯେ ଭାରତୀୟ ଜାତୀୟ ସୁରକ୍ଷା ପରାମର୍ଶଦାତା ଓ ବୈଦେଶିକ ବ୍ୟାପାର ମନ୍ତ୍ରୀ ମଧ୍ୟ ଏହି ଷଡ଼ଯନ୍ତ୍ରରେ ସାମିଲ ଅଛନ୍ତି। ଏହାର ଜବାବରେ ଜୟସ୍ୱାଲ କହିଛନ୍ତି, କାନାଡା ସରକାରଙ୍କ ସୂତ୍ରରୁ ଏକ ଖବରକାଗଜକୁ ଦିଆଯାଇଥିବା ଏଭଳି ହାସ୍ୟାସ୍ପଦ ବୟାନକୁ ସେମାନେ ଖାରଜ କରିବା ଦରକାର। ଏଭଳି ମନ୍ଦ ଅଭିଯାନ ଆମର ପୂର୍ବରୁ ତିକ୍ତ ଥିବା ସମ୍ପର୍କକୁ ଆହୁରି କ୍ଷତି ପହଞ୍ଚାଉଛି। ଗତ ବର୍ଷ ଜୁନ୍ ମାସରେ କାନାଡା ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ ଦିଲ୍ଲୀର ଏଜେଣ୍ଟ ଏଥିରେ ସମ୍ପୃକ୍ତ ଥିବା ଅଭିଯୋଗ କରିବା ପରେ ଭାରତ ସହ କୂଟନୈତିକ ସଙ୍କଟ ଆରମ୍ଭ ହୋଇଥିଲା। ଗତ ମାସରେ କାନାଡା ଏହି ହତ୍ୟାକାଣ୍ଡରେ ଭାରତୀୟ ହାଇ କମିଶନର ସଞ୍ଜୟ ବର୍ମା ଓ ଅନ୍ୟ କିଛି କୂଟନୀତିଜ୍ଞଙ୍କୁ ଯୋଡ଼ିଥିଲା।
କାନାଡା ସରକାର କହିଛନ୍ତି ଯେ ଭାରତୀୟ କୂଟନୀତିଜ୍ଞମାନଙ୍କୁ ଦେଶରୁ ବହିଷ୍କାର କରାଯାଇଛି। ଭାରତ ମଧ୍ୟ କାନାଡାର ଷ୍ଟୁଆର୍ଟ ହ୍ୱିଲର ଓ ଅନ୍ୟ ୫ ଜଣ କୂଟନୀତିଜ୍ଞଙ୍କୁ ବହିଷ୍କାର କରିଛି। ନିଷିଦ୍ଧ ଆତଙ୍କବାଦୀ ସଂଗଠନ ଖଲିସ୍ତାନ ଟାଇଗର ଫୋର୍ସର ମାଷ୍ଟରମାଇଣ୍ଡ ନିଜାର ପଞ୍ଜାବରେ ହିନ୍ଦୁ ପୁରୋହିତଙ୍କ ହତ୍ୟା ସମେତ ଏକାଧିକ ଅପରାଧରେ ଦିଲ୍ଲୀର ‘ମୋଷ୍ଟ ୱାଣ୍ଟେଡ୍’ ଆତଙ୍କବାଦୀ ତାଲିକାରେ ଥିଲା।
