ନୂଆଦିଲ୍ଲୀ : ଏନଇଇଟି ପେପର୍ ଲିକ୍ ସମ୍ପର୍କିତ ମାମଲାର ଶୁଣାଣି ପାଇଁ ରାଉଜ୍ ଆଭେନ୍ୟୁ କୋର୍ଟରେ ଗଠିତ ସ୍ୱତନ୍ତ୍ର ଫାଷ୍ଟ-ଟ୍ରାକ୍ କୋର୍ଟରେ କେନ୍ଦ୍ରୀୟ ତଦନ୍ତ ବ୍ୟୁରୋ(ସିବିଆଇ)୧୩ ଜଣ ଅଭିଯୁକ୍ତଙ୍କ ବିରୋଧରେ ୨୦ ହଜାର ପୃଷ୍ଠାର ଚାର୍ଜସିଟ୍ ଦାଖଲ କରିଛି। ଯେଉଁଥିରେ ସେମାନଙ୍କର ଅପରାଧିକ ଷଡ଼ଯନ୍ତ୍ର, ଠକେଇ, ଅପରାଧିକ ବିଶ୍ୱାସ ଭଙ୍ଗ, ପ୍ରମାଣ ନଷ୍ଟ, ଦୁର୍ନୀତି ଏବଂ ସାର୍ବଜନୀନ ପରୀକ୍ଷା ଆଇନ ଅନୁଯାୟୀ ଅପରାଧ ଅଭିଯୋଗ କରାଯାଇଛି। ସିବିଆଇ ଅନୁଯାୟୀ, ଚାର୍ଜସିଟରେ ୩୬୦ ଜଣ ସାକ୍ଷୀ, ୪୨୨ଟି ଦସ୍ତାବିଜ ଏବଂ ୪୩ ପ୍ରମାଣ ରହିଛି। ଉଚ୍ଚ ଶିକ୍ଷା ବିଭାଗରେ ଅଭିଯୋଗ ଆଧାରରେ ୨୦୨୬ ମେ’ ୧୨ ତାରିଖରେ ଏନେଇ ଏଫଆଇଆର ରୁଜୁ କରାଯାଇଥିଲା। ପେପର ଲିକ୍ ମାମଲାରେ ଗିରଫ ହୋଇଥିବା ସମସ୍ତ ଅଭିଯୁକ୍ତ ବର୍ତ୍ତମାନ ନ୍ୟାୟିକ ହେପାଜତରେ ଅଛନ୍ତି।
ସିବିଆଇ ଆଠ ଜଣ ସାଇବର ବିଶେଷଜ୍ଞଙ୍କ ସମେତ ୭୨ ଜଣ ଅଧିକାରୀଙ୍କ ଏକ ଦଳ ଗଠନ କରିଥିଲା ଏବଂ ମହାରାଷ୍ଟ୍ର, ରାଜସ୍ଥାନ, ହରିୟାଣା ଏବଂ ଦିଲ୍ଲୀ ସମେତ ବିଭିନ୍ନ ରାଜ୍ୟର ୯୨ଟି ସ୍ଥାନରେ ଚଢାଉ କରିଥିଲା। ଡିଜିଟାଲ୍ ଡିଭାଇସ୍ ଏବଂ ଡକ୍ୟୁମେଣ୍ଟଗୁଡ଼ିକୁ ଜବତ କରାଯାଇଥିଲା ଏବଂ ଫରେନସିକ୍ ଯାଞ୍ଚ କରାଯାଇଥିଲା। ସିବିଆଇ କହିଛି ଯେ ଫରେନସିକ୍, ହସ୍ତଲିଖନ ଏବଂ ପାଠ୍ୟ ତଥ୍ୟରୁ ପେପର ଲିକ୍ ହେବା ନିଶ୍ଚିତ ହୋଇଛି।
ସିବିଆଇ ଅନୁଯାୟୀ, ପ୍ରଥମ ଗିରଫଦାରୀ ୧୩ ମେ’ ୨୦୨୬ରେ କରାଯାଇଥିଲା। ପେପର ଲିକ୍ ମାମଲାରେ ଗିରଫ କରାଯାଇଥିବା ଅଭିଯୁକ୍ତଙ୍କ ମଧ୍ୟରେ ଏନଟିଏର ତିନି ଜଣ ବିଷୟ ବିଶେଷଜ୍ଞ ମଧ୍ୟ ଅଛନ୍ତି। ମଧ୍ୟସ୍ଥି ଏବଂ କୋଚିଂ ପ୍ରତିଷ୍ଠାନ ସହିତ ଜଡିତ ଦୁଇ ଜଣଙ୍କୁ ମଧ୍ୟ ଗିରଫ କରାଯାଇଛି। ସିବିଆଇ କହିଛି ଯେ, ଟଙ୍କା ହଡପର ତଦନ୍ତ କରାଯାଉଛି। ଅନେକ ବ୍ୟାଙ୍କ ଆକାଉଣ୍ଟ, ଲକର ଏବଂ ଏକ ଡିମାଟ୍ ଆକାଉଣ୍ଟକୁ ଫ୍ରିଜ୍ କରାଯାଇଛି।
ରାଉଜ୍ ଆଭେନ୍ୟୁ କୋର୍ଟରେ ଥିବା ସ୍ୱତନ୍ତ୍ର ଫାଷ୍ଟ ଟ୍ରାକ୍ କୋର୍ଟ ସିବିଆଇ ଚାର୍ଜସିଟ୍ ରେକର୍ଡରେ ଗ୍ରହଣ କରିଛନ୍ତି। ଚାର୍ଜସିଟ୍ ଉପରେ ଶୁଣାଣି ସମୟରେ କୋର୍ଟ ଉଲ୍ଲେଖ କରି କୋର୍ଟ ସିବିଆଇକୁ ପଚାରିଛନ୍ତି ଯେ, ଚାର୍ଜସିଟ୍ ସହିତ ଡକ୍ୟୁମେଣ୍ଟ,ବୟାନ ଏବଂ ଜିନିଷଗୁଡ଼ିକର ଏକ ତାଲିକା ସଂଲଗ୍ନ କରାଯାଇଛି କି ନାହିଁ। ଚାର୍ଜସିଟ୍ରେ ଉଦ୍ଧୃତ ବୟାନ ଏବଂ ଅନ୍ୟାନ୍ୟ ପ୍ରାସଙ୍ଗିକ ରେକର୍ଡ କେଉଁଠି ଅଛି। ସିବିଆଇ କୋର୍ଟକୁ ଜଣାଇଥିଲା, ୨୦ ହଜାର ପୃଷ୍ଠାର ପରିଶିଷ୍ଟ ଦସ୍ତାବିଜ ଗୁଡ଼ିକୁ ସ୍କାନ୍ କରାଯାଉଛି। ଚାର୍ଜସିଟ୍ ସହିତ ପରିଶିଷ୍ଟ ଡକ୍ୟୁମେଣ୍ଟ ଦାଖଲ କରିବା ପାଇଁ ସିବିଆଇ ସମୟ ମାଗିଥିଲା। ଏନେଇ କୋର୍ଟ ସିବିଆଇକୁ ଅତିରିକ୍ତ ତିନି ଦିନ ସମୟ ଦେଇଛନ୍ତି। ମାମଲାର ପରବର୍ତ୍ତୀ ଶୁଣାଣି ଅଗଷ୍ଟ ୩ ତାରିଖରେ ହେବ।
