ସମ୍ବଲପୁର/କଟକ : ଲକ୍ଷ୍ନୌ ସ୍ଥିତ ଗ୍ରୀନ୍ ସିଟି ହସ୍ପିଟାଲ୍ସ ଓଡ଼ିଶା ପ୍ରିମିୟର ଲିଗ୍ ୨୦୨୬ ପୂର୍ବରୁ ସମ୍ବଲପୁର ୱାରିଅର୍ସର ସମ୍ପୂର୍ଣ୍ଣ ମାଲିକାନା ଅଧିଗ୍ରହଣ କରିଛି। ଏହି ଅଧିଗ୍ରହଣ ସହ ହେଲ୍ଥକେୟାର ଗ୍ରୁପ୍ ଫ୍ରାଞ୍ଚାଇଜି କ୍ରିକେଟ୍ରେ ପ୍ରବେଶ କରିଥିବା ବେଳେ ଗତ ସିଜନର ରନର୍ସଅପ୍ ଦଳ ପାଇଁ ଏକ ନୂଆ ଅଧ୍ୟାୟ ଆରମ୍ଭ ହୋଇଛି।
ଏହି ଅଧିଗ୍ରହଣ ପଛରେ ସମ୍ବଲପୁର ୱାରିଅର୍ସକୁ ଏକ ଦୃଢ଼ ଓ ପ୍ରତିସ୍ପର୍ଦ୍ଧି ଫ୍ରାଞ୍ଚାଇଜି ଭାବେ ଗଢ଼ି ତୋଳିବାର ଦୀର୍ଘମିଆଦି ଲକ୍ଷ୍ୟ ରହିଛି। ଏହା ସହ ଓଡ଼ିଶାର ଉଦୀୟମାନ କ୍ରିକେଟ୍ ପ୍ରତିଭାଙ୍କୁ ଆଗକୁ ବଢ଼ିବା ପାଇଁ ସୁଯୋଗ ସୃଷ୍ଟି କରିବା ଏବଂ ସମ୍ବଲପୁରକୁ ପ୍ରତିନିଧିତ୍ୱ କରୁଥିବା ଏକ ଦଳ ଗଢ଼ି ଅଞ୍ଚଳର ସମର୍ଥକମାନଙ୍କ ସହ ଗଭୀର ସମ୍ପର୍କ ସୃଷ୍ଟି କରିବା ନୂଆ ମାଲିକାନାର ପ୍ରମୁଖ ଲକ୍ଷ୍ୟ।
ୱାରିଅର୍ସ ନୂଆ ସିଜନରେ ହେଡ୍ କୋଚ୍ ତଥା ପୂର୍ବତନ ଭାରତୀୟ ଅନ୍ତର୍ଜାତୀୟ କ୍ରିକେଟର ସଞ୍ଜୟ ରାଉଳଙ୍କ ମାର୍ଗଦର୍ଶନରେ ମୈଦାନକୁ ଓହ୍ଲାଇବେ, ଯେତେବେଳେ ଗୌରବ ଚୌଧୁରୀ ଦଳର ନେତୃତ୍ୱ ନେବେ। ଗତ ସିଜନରେ ରନର୍ସ-ଅପ୍ ହୋଇଥିବା ଫ୍ରାଞ୍ଚାଇଜି ଏଥର ସେହି ଗତିକୁ ଆଗକୁ ନେଇ ଆଉ ଗୋଟିଏ ପାଦ ଆଗକୁ ବଢ଼ିବାକୁ ଲକ୍ଷ୍ୟ ରଖିଛି।
ସମ୍ବଲପୁର ୱାରିଅର୍ସର ମାଲିକ ଏବଂ ଗ୍ରୀନ୍ ସିଟି ହସ୍ପିଟାଲ୍ସର ନିର୍ଦ୍ଦେଶକ ଡା. ବିନୀତ କୁମାର ବର୍ମାଙ୍କ ପାଇଁ ଏହି ଅଧିଗ୍ରହଣ କେବଳ ଏକ କ୍ରିକେଟ୍ ଦଳର ମାଲିକାନା ନୁହେଁ। ଏହା ଅଞ୍ଚଳର ଆକାଂକ୍ଷାକୁ ପ୍ରତିନିଧିତ୍ୱ କରୁଥିବା ଏକ କ୍ରୀଡ଼ା ମଞ୍ଚ ଗଢ଼ିବା ସହ ପ୍ରତିଭାଶାଳୀ ଯୁବ କ୍ରିକେଟରମାନଙ୍କୁ ପ୍ରତିସ୍ପର୍ଦ୍ଧୀ ସ୍ତରରେ ନିଜ ଦକ୍ଷତା ପ୍ରଦର୍ଶନର ସୁଯୋଗ ଦେବାର ଏକ ପ୍ରୟାସ।
“କ୍ରିକେଟ୍ରେ ଲୋକ ଓ ସମୁଦାୟକୁ ଏକାଠି କରିବାର ଅଦ୍ଭୁତ କ୍ଷମତା ରହିଛି। ସମ୍ବଲପୁର ୱାରିଅର୍ସକୁ ଅଧିଗ୍ରହଣ କରିବାର ସୁଯୋଗ ଆସିବାବେଳେ ଆମେ ଏହାକୁ କେବଳ ଗୋଟିଏ ଟୁର୍ଣ୍ଣାମେଣ୍ଟରେ ଖେଳୁଥିବା ଦଳ ଭାବେ ଦେଖିନଥିଲୁ। ଆମେ ଚାହୁଁଛୁ ୱାରିଅର୍ସ ସମ୍ବଲପୁରର ଭାବନାକୁ ପ୍ରତିନିଧିତ୍ୱ କରୁ ଏବଂ ଏଠାର ଲୋକଙ୍କୁ ଏମିତି ଏକ ଦଳ ଦିଅ, ଯାହା ସହ ସେମାନେ ପ୍ରକୃତରେ ଯୋଡ଼ି ହୋଇପାରିବେ ଏବଂ ଗର୍ବ ଅନୁଭବ କରିପାରିବେ,” ଡା. ବର୍ମା କହିଛନ୍ତି।
ମୈଦାନରେ ସଫଳତା ସହିତ ନୂଆ ମାଲିକାନା ପ୍ରତିଭାଶାଳୀ ଖେଳାଳିଙ୍କୁ ଚିହ୍ନଟ କରିବା, ସେମାନଙ୍କୁ ପ୍ରୋତ୍ସାହନ ଦେବା ଏବଂ ଯୁବ କ୍ରିକେଟରମାନଙ୍କୁ ନିଜ ଦକ୍ଷତା ପ୍ରଦର୍ଶନ ପାଇଁ ସୁଯୋଗ ସୃଷ୍ଟି କରିବା ଉପରେ ବିଶେଷ ଗୁରୁତ୍ୱ ଦେବ। ଦୀର୍ଘମିଆଦି ଦୃଷ୍ଟିକୋଣ ସହ ମୈଦାନ ଭିତରେ ଓ ବାହାରେ ଫ୍ରାଞ୍ଚାଇଜିକୁ କ୍ରମାଗତ ଭାବେ ଶକ୍ତିଶାଳୀ କରିବା ଲକ୍ଷ୍ୟ ରହିଛି।
ଡା. ବର୍ମା ଆହୁରି କହିଛନ୍ତି, “ଆମର ତତ୍କାଳିକ ଲକ୍ଷ୍ୟ ଆଉ ଗୋଟିଏ ପାଦ ଆଗକୁ ବଢ଼ି ଟ୍ରଫିକୁ ସମ୍ବଲପୁରକୁ ଆଣିବା। କିନ୍ତୁ ଆମର ପ୍ରତିବଦ୍ଧତା ଗୋଟିଏ ସିଜନରେ ସୀମିତ ନୁହେଁ। ଆମେ ଯୁବ ଖେଳାଳିଙ୍କୁ ପ୍ରୋତ୍ସାହନ ଦେବା, ସୁଯୋଗ ସୃଷ୍ଟି କରିବା ଏବଂ ସମ୍ବଲପୁର ୱାରିଅର୍ସକୁ ଏକ ଦୃଢ଼ ଓ ସମ୍ମାନିତ ଫ୍ରାଞ୍ଚାଇଜି ଭାବେ ଗଢ଼ିବାକୁ ଚାହୁଁଛୁ। ଆମ ପାଇଁ ସଫଳତା ମୈଦାନର ଉପଲବ୍ଧି ସହ ମୈଦାନ ବାହାରେ ଆମେ ସୃଷ୍ଟି କରୁଥିବା ଐତିହ୍ୟରେ ମଧ୍ୟ ପ୍ରତିଫଳିତ ହେବ।”
ସମ୍ବଲପୁର ୱାରିଅର୍ସ ୨୦ ସେପ୍ଟେମ୍ବରରେ କଟକର ବାରବାଟୀ ଷ୍ଟାଡିୟମରେ ଗତଥର ଚାମ୍ପିଅନ୍ କଟକ ପାନ୍ଥର୍ସ ବିପକ୍ଷରେ ନିଜର ଓଡ଼ିଶା ପ୍ରିମିୟର ଲିଗ୍ ୨୦୨୬ ଅଭିଯାନ ଆରମ୍ଭ କରିବ। ଗତ ସିଜନର ଫାଇନାଲର ପୁନରାବୃତ୍ତି ହେବାକୁ ଯାଉଥିବା ଏହି ମୁକାବିଲା ସହ ୱାରିଅର୍ସ ଗ୍ରୀନ୍ ସିଟି ହସ୍ପିଟାଲ୍ସର ମାଲିକାନାରେ ନୂଆ ଉତ୍ସାହ ଓ ଆକାଂକ୍ଷା ସହ ନୂଆ ସିଜନ ଆରମ୍ଭ କରିବ।
