ଖୋଲା ରାସ୍ତାରେ ଭାଜପା ନେତାଙ୍କୁ ହତ୍ୟା

ଚେନାଇ:ତାମିଲନାଡୁରେ ଆଉ ଜଣେ ରାଜନେତାଙ୍କୁ ହତ୍ୟା କରାଯାଉଛି। ବିଏସପି ନେତା ଆର୍ମଷ୍ଟ୍ରଙ୍ଗଙ୍କ ହତ୍ୟାକୁ ନେଇ ରାଜ୍ୟରେ ତଦନ୍ତ ଚାଲିଥିବାବେଳେ ଏବେ ଜଣେ ଭାଜପା କର୍ମୀଙ୍କ ହତ୍ୟା କରାଯାଇଛି। ସିଭଗଙ୍ଗା ଜିଲାରେ ଜଣେ ଭାଜପା କର୍ମୀଙ୍କୁ ରାସ୍ତାରେ କିଛି ଅଜ୍ଞାତ ବ୍ୟକ୍ତି ହତ୍ୟା କରିଛନ୍ତି। ଭାଜପା କର୍ମୀଙ୍କ ମୃତ୍ୟୁ ପରେ ତାମିଲନାଡୁର ଭାଜପା ସଭାପତି କେ ଆନ୍ନାମଲାଇ ଆଇନ ଶୃଙ୍ଖଳା ପରିସ୍ଥିତିକୁ ନେଇ ରାଜ୍ୟର ଡିଏମକେ ସରକାରଙ୍କୁ ଟାର୍ଗେଟ କରିଛନ୍ତି। ସିଭଗଙ୍ଗାଇ ଏମ୍‌ପି କାର୍ତ୍ତି ପି ଚିଦାମ୍ବରମ କହିଛନ୍ତି,ଏହି ହତ୍ୟାକାଣ୍ଡର କୌଣସି ରାଜନୈତିକ ସମ୍ପର୍କ ନାହିଁ।, ସିଭଗଙ୍ଗା ଭାଜପା ଜିଲା ସଚିବ ସେଲଭାକୁମାର ତାଙ୍କ ଇଟାଭାଟିରୁ ଦୁଇ ଚକିଆ ଯାନରେ ଘରକୁ ଫେରୁଥିଲେ। ଏହି ସମୟରେ କିଛି ଲୋକ ତାଙ୍କୁ ଘେରିଯାଇ ତାଙ୍କୁ ଆକ୍ରମଣ କରି ହତ୍ୟା କରିଥିଲେ। ହତ୍ୟା ପରେ ଅଭିଯୁକ୍ତ ସେଲଭାକୁମାରଙ୍କ ମୃତଦେହକୁ ରାସ୍ତାରେ ଛାଡି ପଳାଇଥିଲେ। ସ୍ଥାନୀୟ ଲୋକେ ସେଲଭାକୁମାରଙ୍କୁ ରକ୍ତ ଜୁଡୁବୁଡୁ ଅବସ୍ଥାରେ ପଡ଼ିଥିବାର ଦେଖି କର୍ତ୍ତୃପକ୍ଷଙ୍କୁ ଜଣାଇଥିଲେ। ପୋଲିସ ଘଟଣାସ୍ଥଳରେ ପହଞ୍ଚି ସେଲଭାକୁମାରଙ୍କ ମୃତଦେହ ଜବତ କରିଛି। ପୋଲିସ ସେଲଭକୁମାରଙ୍କ ମୃତଦେହକୁ ସରକାରୀ ଡାକ୍ତରଖାନାକୁ ନେଇଥିଲା।