ବାଲେଶ୍ୱର : ରାଜପଥ ପାର୍ଶ୍ଵରେ ଛିଡା ହୋଇଥିବା ଏକ ଟ୍ରଲରର ପଛପଟୁ ଧକ୍କା ଦେଲା ତୀର୍ଥଯାତ୍ରୀ ବସ l ୫ ଜଣ ତୀର୍ଥ ଯାତ୍ରୀ ଗୁରୁତର ଆହତ ହୋଇଥିବା ବେଳେ ଅନ୍ୟ କିଛି ଯାତ୍ରୀ ଆହତ ହୋଇଥିବା ଜଣାପଡିଛି l ବାଲେଶ୍ବର ଜିଲ୍ଲା ବସ୍ତା ଥାନା ଅନ୍ତର୍ଗତ ୬୦ ନମ୍ବର ଜାତୀୟ ରାଜପଥର ସନ୍ତୋଷପୁର ଛକ ନିକଟରେ ଆଜି ଭୋର ସମୟରେ ଘଟିଛି ଏହି ଦୁର୍ଘଟଣା l
ସୂଚନା ମୁତାବକ ପଶ୍ଚିମବଙ୍ଗ ହାୱଡାରୁ ୫୧ ଜଣ ଯାତ୍ରୀ ନେଇ ତୀର୍ଥଯାତ୍ରୀ ବସଟି ପୁରୀ ଅଭିମୁଖେ ଯାଉଥିଲା। ସନ୍ତୋଷପୁର ଛକ ନିକଟରେ ରାସ୍ତା କଡରେ ଛିଡା ହୋଇଥିବା ଏକ ଟ୍ରଲରକୁ ପଛପଟୁ ବସଟି ଭାରସାମ୍ୟ ହରାଇ ଜୋରରେ ଧକ୍କା ଦେଇ ଥିଲା l ଯାହା ଫଳରେ ବସ ଆଗ କ୍ୟାବିନ ଭାଙ୍ଗି ଚୂରମାର ହୋଇଯାଇଛି l ଖବର ପାଇ ଘଟଣା ସ୍ଥଳରେ ଜାତୀୟ ରାଜପଥ ପେଟ୍ରୋଲିଂ ପୋଲିସ ଏବଂ ବସ୍ତା ଥାନା ପୋଲିସ ପହଞ୍ଚି ଗୁରୁତରଙ୍କୁ ଉଦ୍ଧାର କରି ବସ୍ତା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ l ଅନ୍ୟ ଯାତ୍ରୀଙ୍କୁ ଆଉ ଏକ ବସ ଯୋଗେ ଗନ୍ତବ୍ୟସ୍ଥଳକୁ ପଠାଇବାର ବ୍ୟବସ୍ଥା କରାଯାଇଥିଲା। ଉଭୟ ଟ୍ରଲର ଓ ବସର ଡ୍ରାଇଭର ଫେରାର ହୋଇଥିବାବେଳେ ପୋଲିସ ଦୁଇଟି ଗାଡିକୁ ଜବତ କରି ଅଧିକ ତଦନ୍ତ ଜାରି ରଖିଛି l
